தீப்பந்தக் கிளைகளால் எரிக்கப்பட்டு கொல்லப்பட்ட ஒரு ஊனமுற்ற காட்டு யானையின் கொடூர சம்பவத்தை வீடியோ எடுத்த பல்கலைக்கழக மாணவனின் கையடக்கத் தொலைபேசியை அரச இரசாயன பகுப்பாய்வாளரிடம் சமர்ப்பித்து, அது தொடர்பான அறிக்கையை நீதிமன்றத்திற்கு அழைக்குமாறு அநுராதபுரம் மேலதிக நீதவான் திருமதி தசுனி ஹபுஆரச்சி மிஹிந்தலை பொலிஸாருக்கு உத்தரவிட்டுள்ளார். கண் பார்வை குறைபாடுகள் மற்றும் நடப்பதில் கடுமையான சிரமங்கள் கொண்ட இந்த பரிதாபகரமான காட்டு யானை கொலை தொடர்பான வழக்கு அநுராதபுரம் இலக்கம் இரண்டு மேலதிக நீதவான் நீதிமன்றத்தில் கடந்த 23ஆம் திகதி மீண்டும் அழைக்கப்பட்டபோது நீதவான் இந்த உத்தரவை பிறப்பித்தார்.
இந்த மனிதாபிமானமற்ற குற்றம் தொடர்பாக குற்றம் சாட்டப்பட்ட சந்தேக நபர்கள் தற்போது விளக்கமறியலில் வைக்கப்பட்டு பிணையில் விடுவிக்கப்பட்டுள்ளனர். மிஹிந்தலை, சீப்புக்குளம் பிரதேசத்தின் அம்பகஹவெல சந்தியில் வசிக்கும் ஒரே குடும்பத்தைச் சேர்ந்த உறவினர்களான ஜே. எம். சிசிர சேனாதிர், ஜே. எம். பிரசன்ன சலிந்த குமார மற்றும் ஜே. எம். வசந்த விஜய குமார ஆகியோர் இவ்வாறு பிணையில் விடுவிக்கப்பட்டுள்ள சந்தேக நபர்களாவர். வனவிலங்கு திணைக்களத்தின் சார்பில் சட்டமா அதிபரை பிரதிநிதித்துவப்படுத்தும் அரச சட்டத்தரணி கலண கொத்தலாவல, இந்த சந்தேக நபர்களுக்கு எதிராக பொதுச் சொத்துச் சட்டத்தின் கீழ் வழக்குத் தொடருவதற்காக தேவையான சட்ட நடவடிக்கைகளை எடுத்து வருகிறார்.
இந்த வழக்கு அழைக்கப்பட்டபோது, முறைப்பாட்டாளர் தரப்பை பிரதிநிதித்துவப்படுத்தி மிஹிந்தலை பொலிஸ் நிலைய பொறுப்பதிகாரி பிரதான பொலிஸ் பரிசோதகர் ரஞ்சித் சந்திரசிறி மற்றும் சார்ஜன்ட் பண்டார (33198) ஆகியோருடன் வனவிலங்கு திணைக்கள அதிகாரிகள் நீதிமன்றத்தில் ஆஜராகினர். சந்தேக நபர்கள் சார்பில் சட்டத்தரணிகளான நளீன் திமுது பண்டார, இந்துனில் ஹெட்டியாராச்சி மற்றும் பிரியதர்ஷினி அத்தநாயக்க ஆகியோர் விடயங்களை முன்வைத்தனர். மேலும், அவதானிப்பு தரப்பினராக இலங்கை சட்டத்தரணிகள் சங்கத்தை பிரதிநிதித்துவப்படுத்தி சட்டத்தரணி சதுர தனஞ்சய ரணதுங்க உட்பட சட்டத்தரணிகளான தக்சலா ஏகநாயக்க மற்றும் ருவினி ஜயதிலக்க, மற்றும் சுரக்கிமு லங்கா அமைப்பின் சார்பில் சட்டத்தரணிகளான சுசில் சிறிவர்தன மற்றும் பிரதீப் திசாநாயக்க ஆகியோருடன் சட்டத்தரணி மதுகா சல்வடோர் ஆகியோரும் நீதிமன்றத்தில் ஆஜராகினர்.