லிபியாவின் முன்னாள் தலைவர் கேணல் முஅம்மர் கடாபியின் மகன் சைஃப் அல்-இஸ்லாம் கடாபி சுட்டுக் கொல்லப்பட்டுள்ளதாக சர்வதேச ஊடகங்கள் தெரிவிக்கின்றன. ஒரு காலத்தில் தனது தந்தையின் அரசியல் வாரிசாகக் கருதப்பட்ட 53 வயதான சைஃப் அல்-இஸ்லாமின் மரணம், அவரது அரசியல் குழுவின் தலைவரால் செவ்வாய்க்கிழமை லிபிய செய்தி நிறுவனத்திற்கு உறுதிப்படுத்தப்பட்டுள்ளது.
நான்கு பேர் கொண்ட சிறப்பு கமாண்டோ குழுவொன்று சின்டான் நகரில் உள்ள அவரது வீட்டில் வைத்து இந்த கொலையை நிகழ்த்தியுள்ளதாக அவரது வழக்கறிஞர் AFP செய்தி நிறுவனத்திடம் தெரிவித்துள்ளார். இந்த தாக்குதலுக்குப் பின்னால் யார் இருக்கிறார்கள் என்பது இன்னும் தெளிவாகத் தெரியவில்லை, மேலும் இந்த சம்பவம் குறித்து முரண்பட்ட கருத்துக்களும் வெளிவந்துள்ளன. குறிப்பாக, அவரது சகோதரி ஒரு லிபிய தொலைக்காட்சி அலைவரிசையிடம் அவர் லிபியா-அல்ஜீரியா எல்லைக்கு அருகில் இறந்துவிட்டதாகக் கூறியுள்ளார்.
1969 முதல் 2011 இல் ஒரு கிளர்ச்சியால் அதிகாரத்திலிருந்து அகற்றப்பட்டு கொல்லப்படும் வரை லிபியாவை ஆட்சி செய்த முஅம்மர் கடாபிக்குப் பிறகு நாட்டின் மிகவும் சக்திவாய்ந்த நபராக சைஃப் அல்-இஸ்லாம் கருதப்படுகிறார். 1972 இல் பிறந்த அவர், அரசாங்கத்தில் உத்தியோகபூர்வ பதவியை வகிக்கவில்லை என்றாலும், 2000 ஆம் ஆண்டு முதல் மேற்கு நாடுகளுடனான உறவுகளை மீண்டும் கட்டியெழுப்புவதிலும், லிபியாவின் அணு ஆயுத திட்டத்தை கைவிடுவது போன்ற முக்கியமான கொள்கை மாற்றங்களை மேற்கொள்வதிலும் முன்னோடியாக இருந்தார். இந்த நடவடிக்கைகள் லிபியாவுக்கு எதிராக விதிக்கப்பட்ட சர்வதேச தடைகளை நீக்க உதவியது, மேலும் அந்த நேரத்தில் அவர் ஒரு சீர்திருத்தவாத தலைவராக மேற்குலகின் கவனத்தை ஈர்த்தார்.
கடாபி ஆட்சி வீழ்ச்சியடைந்த பின்னர் அரசாங்கத்திற்கு எதிரான போராட்டங்களை அடக்குவதில் பங்களித்ததாக குற்றம் சாட்டப்பட்ட சைஃப் அல்-இஸ்லாம், சின்டான் நகரில் ஒரு போட்டி ஆயுதக் குழுவால் சுமார் ஆறு ஆண்டுகள் சிறைவைக்கப்பட்டார். 2011 போராட்டங்களை அடக்கியதில் மனிதகுலத்திற்கு எதிரான குற்றங்களைச் செய்ததாக சர்வதேச குற்றவியல் நீதிமன்றம் (ICC) அவருக்கு எதிராக பிடியாணை பிறப்பித்திருந்தது. மேலும், ஐக்கிய நாடுகள் சபையின் ஆதரவுடன் இயங்கும் திரிபோலி அரசாங்கத்தின் கீழ் செயல்பட்ட நீதிமன்றம் 2015 இல் அவர் இல்லாத நிலையில் அவருக்கு மரண தண்டனை விதித்தது.
எவ்வாறாயினும், 2017 ஆம் ஆண்டில் கிழக்கு லிபியாவின் டோப்ரூக் ஆட்சியின் கீழ் நிறைவேற்றப்பட்ட பொது மன்னிப்புச் சட்டத்தின் கீழ் அவர் விடுதலை செய்யப்பட்டார். அரசு அதிகாரத்தை பரம்பரை வழியாகப் பெற தனக்கு எண்ணம் இல்லை என்று அவர் முன்பு கூறியிருந்தாலும், காலவரையின்றி ஒத்திவைக்கப்பட்ட 2021 ஜனாதிபதித் தேர்தலில் போட்டியிட அவர் தயாராக இருந்தார். கடாபி ஆட்சி வீழ்ச்சியடைந்த பின்னர் லிபியா பல்வேறு ஆயுதக் குழுக்கள் மற்றும் இரண்டு போட்டி அரசாங்கங்களின் கீழ் பிளவுபட்டுள்ள நிலையில் இந்த கொலை நடந்துள்ளது.
