இலங்கையின் சுற்றுலாத் துறை 2026 ஆம் ஆண்டின் முதல் இரண்டு மாதங்களில் குறிப்பிடத்தக்க வளர்ச்சியைப் பதிவு செய்துள்ளது. இலங்கை சுற்றுலா அபிவிருத்தி அதிகாரசபையினால் வெளியிடப்பட்ட சமீபத்திய வாராந்த அறிக்கையின்படி, 2026 பெப்ரவரி மாதம் 01 ஆம் திகதி முதல் 28 ஆம் திகதி வரையான காலப்பகுதியில் மாத்திரம் 279,328 சுற்றுலாப் பயணிகள் நாட்டிற்கு வருகை தந்துள்ளனர்.
இது கடந்த ஆண்டுகளுடன் ஒப்பிடுகையில் தெளிவான வளர்ச்சியைக் காட்டும் ஒரு சந்தர்ப்பமாகும்.பெப்ரவரி மாதத் தரவுகளை பகுப்பாய்வு செய்யும் போது, 2026 ஆம் ஆண்டில் வருகை தந்த 279,328 சுற்றுலாப் பயணிகளின் எண்ணிக்கை, 2025 ஆம் ஆண்டு பெப்ரவரி மாதத்தில் பதிவு செய்யப்பட்ட 240,217 வருகையை விட 16.2 சதவீத வளர்ச்சியாகும். மேலும், 235,618 சுற்றுலாப் பயணிகள் வருகை தந்த 2018 ஆம் ஆண்டுடன் ஒப்பிடுகையில், இந்த ஆண்டு பெப்ரவரி மாதத்தில் சுற்றுலாப் பயணிகளின் வருகை 18.5 சதவீதம் அதிகரித்துள்ளதாக தரவுகள் உறுதிப்படுத்துகின்றன.
இந்த நேர்மறையான போக்கு 2026 ஆம் ஆண்டு ஜனவரி மாதத்திலும் காணப்பட்டது, அந்த மாதத்தில் 277,327 சுற்றுலாப் பயணிகள் நாட்டிற்கு வருகை தந்தனர். இது 2025 ஜனவரி மாதத்துடன் (252,761 சுற்றுலாப் பயணிகள்) ஒப்பிடுகையில் 9.7 சதவீதமும், 2018 ஜனவரி மாதத்துடன் (238,924 சுற்றுலாப் பயணிகள்) ஒப்பிடுகையில் 16.0 சதவீதமும் அதிகரிப்பாகும். இந்த தொடர்ச்சியான சுற்றுலாப் பயணிகளின் வருகையுடன், 2026 ஆம் ஆண்டின் ஜனவரி மற்றும் பெப்ரவரி ஆகிய முதல் இரண்டு மாதங்கள் முடிவடைந்த நிலையில் இலங்கைக்கு வருகை தந்த மொத்த சுற்றுலாப் பயணிகளின் எண்ணிக்கை 556,655 ஆகப் பதிவு செய்யப்பட்டுள்ளது.
