மாகாண சபைத் தேர்தலை நடத்துவது தொடர்பான தற்போதைய சட்டச் சிக்கல்கள் மற்றும் அதற்கு ஏற்பட்டுள்ள தடைகள் குறித்து விசாரிப்பதற்காக சட்டமா அதிபர் திணைக்களம் மற்றும் தேர்தல் ஆணைக்குழுவின் தலைவர்களை அழைப்பதற்கு பாராளுமன்ற விசேட குழு தீர்மானித்துள்ளது. இந்தத் தீர்மானம், அமைச்சர் விஜேரத் ஹேரத் தலைமையில் கடந்த 17ஆம் திகதி பாராளுமன்றத்தில் முதன்முறையாகக் கூடிய, மாகாண சபைத் தேர்தல் குறித்து ஆராயும் விசேட குழுவில் எடுக்கப்பட்டது.
மாகாண சபைத் தேர்தலை எந்தத் தேர்தல் முறைமையின் கீழ் நடத்த வேண்டும் என்பதை ஆராய்ந்து, அது தொடர்பான தேவையான பரிந்துரைகளையும் யோசனைகளையும் சமர்ப்பிப்பதே இந்தக் குழுவிடம் ஒப்படைக்கப்பட்டுள்ள முக்கிய பொறுப்பாகும்.இங்கு கருத்துத் தெரிவித்த குழுவின் தலைவர், 2017 ஆம் ஆண்டு 17 ஆம் இலக்கச் சட்டத்தின் மூலம் அறிமுகப்படுத்தப்பட்ட கலப்பு விகிதாசாரப் பிரதிநிதித்துவ முறையை நடைமுறைப்படுத்துவதற்கான வட்டார எல்லை நிர்ணயப் பணிகள் இதுவரை நிறைவடையாததால், தேர்தலை நடத்துவதற்கு சட்டரீதியான தடைகள் ஏற்பட்டுள்ளதாக சுட்டிக்காட்டினார். இதற்கிடையில், எதிர்க்கட்சியைப் பிரதிநிதித்துவப்படுத்தும் பாராளுமன்ற உறுப்பினர்கள், சுகாதாரம் மற்றும் கல்வி போன்ற பல மிக முக்கியமான துறைகளைக் கட்டுப்படுத்தும் மாகாண சபை நிறுவனங்கள் கிட்டத்தட்ட ஒன்பது ஆண்டுகளாக செயலிழந்துள்ளதால் பல பிரச்சினைகள் எழுந்துள்ளதாக வலியுறுத்தினர். எனவே, தற்போதுள்ள பழைய விகிதாசாரத் தேர்தல் முறைமையின் கீழாவது தேர்தலை விரைவாக நடத்தி, அதன் பின்னர் தேர்தல் முறைமையை திருத்துவதற்கு நடவடிக்கை எடுக்குமாறு அந்த உறுப்பினர்கள் அங்கு பரிந்துரைத்தனர்.
இந்தத் தேர்தலில் பெண்களின் பிரதிநிதித்துவத்தை கட்டாயமாக்குவதுடன், இளைஞர்களின் பிரதிநிதித்துவத்தையும் உறுதிப்படுத்தும் புதிய தேர்தல் முறைமையை உருவாக்குவதன் முக்கியத்துவம் குறித்து பரந்த கலந்துரையாடல் நடைபெற வேண்டும் என்று குழுவின் தலைவர் அமைச்சர் விஜேரத் ஹேரத் மேலும் தெரிவித்தார். அதன்படி, அடுத்த குழு கூட்டத்திற்கு சட்டமா அதிபர் உட்பட தேர்தல் ஆணைக்குழுவின் அதிகாரிகளை அழைத்து, தற்போதுள்ள சட்டரீதியான தடைகள் குறித்து அவர்களின் கருத்துக்களைக் கேட்க திட்டமிடப்பட்டுள்ளது. இந்த விசேட பாராளுமன்றக் குழு தனது முதல் கூட்டத்தை நடத்திய நாளிலிருந்து மூன்று மாத காலத்திற்குள் தொடர்புடைய அறிக்கையை பாராளுமன்றத்திற்கு சமர்ப்பிக்க வேண்டும்.
சமீபத்தில் நடைபெற்ற இந்த ஆரம்பக் கலந்துரையாடலில் பிரதி அமைச்சர்களான அருண் ஹேமச்சந்திர, சட்டத்தரணி சுனில் வட்டகல மற்றும் முனீர் முலாஃபர் ஆகியோர் கலந்துகொண்டனர். அத்துடன், குழுவின் உறுப்பினர்களான ஆர்.எம். ரஞ்சித் மத்தும பண்டார, மனோ கணேசன், பாணக்கியன் ராஜபுத்திரன் ராசமாணிக்கம், ஜனாதிபதி சட்டத்தரணி எம். நிசாம் காரியப்பர், சந்தன சூரியாராச்சி, தர்மப்பிரிய விஜேசிங்க மற்றும் லக்ஷ்மன் நிபுணாராச்சி ஆகியோரின் பங்கேற்புடன் இந்த கூட்டம் நடைபெற்றது.