கொழும்பில் நிலவும் கடும் வெப்பமான காலநிலை காரணமாகப் பாதிக்கப்பட்டுள்ள கொழும்பு பொலிஸ் குதிரைப்படைப் பிரிவின் குதிரைகளை கண்டி பொலிஸ் குதிரைப்படைப் பிரிவுக்கு மாற்ற இலங்கை பொலிஸ் தீர்மானித்துள்ளது. உபசேவா உதவிப் பொலிஸ் அத்தியட்சகர் (கால்நடை மருத்துவர்) மஞ்சுள விஜயகோன் குறிப்பிட்டது போல, இந்தத் தீர்மானத்தின்படி, ஏற்கனவே இரண்டு குதிரைகள் கொழும்பிலிருந்து கண்டிக்கு அனுப்பப்பட்டுள்ளன.
கண்டிக்கு மாற்றப்படாத கொழும்பில் தங்கியுள்ள ஏனைய குதிரைகளை அதிக வெப்பத்திலிருந்து பாதுகாக்க பல விசேட நடவடிக்கைகள் எடுக்கப்பட்டுள்ளதாக பொலிஸ் தெரிவித்துள்ளது. அதன்படி, அவை தங்கும் கொட்டகைகளில் ஏற்கனவே மின்விசிறிகள் பொருத்தப்பட்டுள்ளன, மேலும் தினமும் இரண்டு மூன்று முறை குளிப்பாட்டுவதற்கான வசதிகளும் செய்யப்பட்டுள்ளன. அத்துடன், குதிரைகளின் உடல் வெப்பநிலையைக் கட்டுப்படுத்தி, அவற்றுக்குத் தேவையான குளிர்ச்சியை வழங்குவதற்காக மேலும் பல முறைகள் பின்பற்றப்படுவதாகவும் தெரிவிக்கப்பட்டுள்ளது.
குதிரைகளுக்கு மேலதிகமாக, பொலிஸ் உத்தியோகபூர்வ நாய்கள் தொடர்பாகவும் இக்காலப்பகுதியில் விசேட கவனம் செலுத்தப்பட்டுள்ளது. பொலிஸ் நாய்ப் பிரிவின் பொறுப்பதிகாரி, கால்நடை மருத்துவர் அமல் திசாநாயக்க தெரிவித்ததாவது, தற்போது நிலவும் வெப்பமான காலநிலையிலிருந்து உத்தியோகபூர்வ நாய்களைப் பாதுகாக்கும் நோக்கில் பொலிஸ் திணைக்களம் தேவையான அனைத்து பாதுகாப்பு நடவடிக்கைகளையும் ஏற்கனவே எடுத்துள்ளது.
