கொழும்பு பண்டாரநாயக்க சர்வதேச மாநாட்டு மண்டப வளாகத்தில் படமாக்கப்பட்டு வந்த இந்திய திரைப்படத்தில் பங்கேற்க வந்த ஒருவர் திடீரென நோய்வாய்ப்பட்டு விழுந்து உயிரிழந்துள்ளார். குருந்துவத்தை பொலிஸார் இந்த மரணம் தொடர்பான தகவல்களை உறுதிப்படுத்தியுள்ளனர், குறித்த நபர் அங்கு இந்திய பாராளுமன்ற உறுப்பினர் ஒருவரின் கதாபாத்திரத்தில் நடிக்க வேடமிட்டு தயாராகிக் கொண்டிருந்தபோது இந்த துரதிர்ஷ்டவசமான நிலைக்கு முகங்கொடுத்துள்ளார்.
இவ்வாறு உயிரிழந்தவர் மாத்தளை, களுதேவல ரத்தோட்ட வீதிப் பிரதேசத்தைச் சேர்ந்த 52 வயதுடைய அழகர் கரப்புசாமி என்பவராவார். அவர் திருமணமாகாதவர், படப்பிடிப்புக்கு தயாராகிக் கொண்டிருந்தபோது குளியலறைக்குச் சென்ற வேளையில் திடீரென விழுந்துள்ளார். பின்னர் மயக்கமடைந்த அவரை அங்கிருந்த படப்பிடிப்புக் குழுவினர் உடனடியாக கொழும்பு தேசிய வைத்தியசாலையில் அனுமதிப்பதற்கு நடவடிக்கை எடுத்த போதிலும் அவரது உயிரைக் காப்பாற்ற முடியவில்லை.
இந்த படப்பிடிப்பு இந்திய சினிமாவின் பிரபலமான நட்சத்திர ஜோடிகளான சரவணன் சிவகுமார் என்ற சூர்யா மற்றும் திரிஷா கிருஷ்ணன் ஆகிய நடிகர், நடிகைகளின் முக்கிய பங்களிப்புடன் நடைபெறவிருந்தது. பொலிஸாரின் ஆரம்பகட்ட விசாரணைகளின்படி, நேற்று (21) பிற்பகல் 2.30 மணியளவில் இந்திய பாராளுமன்ற சபையை சித்தரிக்கும் ஒரு காட்சி மாநாட்டு மண்டப வளாகத்தில் படமாக்க திட்டமிடப்பட்டிருந்தது, அதற்காக சம்பந்தப்பட்டவர்கள் நண்பகல் 12.30 மணியளவில் இருந்து தயாராகிக் கொண்டிருந்தபோது இந்த திடீர் மரணம் நிகழ்ந்துள்ளது.