கொழும்பு ஹென்றி பெட்ரிஸ் விளையாட்டரங்கில் இன்று (01) நடைபெற்ற சர்வஜன பலய மே தின பேரணியில் உரையாற்றிய அப்பக்கத்தின் தேசிய அமைப்பாளரும் முன்னாள் அமைச்சருமான திலும் அமுனுகம அவர்கள், இலங்கையின் 10வது கௌரவமிக்க நிறைவேற்று ஜனாதிபதியாக பிரபல தொழிலதிபர் திலித் ஜயவீர அவர்கள் நியமிக்கப்படுவார் எனத் தெரிவித்தார்.
அந்த மே தின கொண்டாட்ட நிகழ்வில் கலந்துகொண்டு சர்வஜன பலய கட்சியின் தலைவர், பாராளுமன்ற உறுப்பினர் திலித் ஜயவீர அவர்கள் தற்போதைய அரசாங்கத்தை கடுமையாக விமர்சித்தார். ஜனாதிபதி அநுர குமார திசாநாயக்க அவர்களின் அரசியலுக்கு இனி எதிர்காலம் இல்லை என்றும், தற்போதைய அரசாங்கம் மிகக் குறுகிய காலத்தில் இநாட்டில் மிகப்பெரிய ஊழல்களைச் செய்துள்ளதால் அவர்களுக்கு இனி நேர்மை பற்றி பேச முடியாது என்றும் அவர் வலியுறுத்தினார். இம்முறை மே தினம் மிகவும் சோகமான பின்னணியில் கொண்டாடப்பட வேண்டியுள்ளதாகக் குறிப்பிட்ட அவர், ஹேக்கர்களால் மில்லியன் கணக்கான டொலர்கள் திருடப்பட்ட சம்பவத்தின் உண்மையை வெளிப்படுத்திய நிதி அமைச்சக அதிகாரி ஒருவர் மர்மமான முறையில் உயிரிழந்ததை அதற்கு உதாரணமாக சுட்டிக்காட்டினார்.
ஒரு வளர்ந்த இலங்கையை உருவாக்குவதன் மூலம் நாட்டை விட்டு வெளியேற நினைக்கும் இளம் தலைமுறைக்கு புதிய நம்பிக்கையை அளிப்பதும், பிராந்திய மற்றும் உலகளாவிய ரீதியில் பொருத்தமான பொருளாதார, அரசியல் சூழலை உருவாக்குவதும் தனது கட்சியின் நோக்கம் என்று திலித் ஜயவீர அவர்கள் தெரிவித்தார். சர்வஜன பலய கட்சி நிச்சயமாக எதிர்காலத்தில் அதிகாரத்தைப் பெறும் என்று உறுதியான நம்பிக்கையை வெளிப்படுத்திய தலைவர், நாட்டை நேசிக்கும் அனைத்து தரப்பினரையும் நிபந்தனையின்றி ஒன்றிணைத்து தற்போதைய அரசாங்கத்தையும் அதற்கு ஆதரவளிக்கும் சக்திகளையும் தோற்கடிப்பதாக உறுதியளித்தார். மக்களுக்கு உண்மையை உணர்த்துவதற்காக தரவுகளும் தகவல்களும் சகிதம் கிராமங்களுக்குச் சென்று மக்களை அறிவூட்டி அவர்களை ஊக்குவிக்குமாறு அவர் தனது கட்சி உறுப்பினர்களிடம் கேட்டுக்கொண்டார்.