மொணராகலை மேல் நீதிமன்ற நீதிபதி கலாநிதி தமித் நலிந்த ஹேவாவசம் அவர்கள், கடந்த வியாழக்கிழமை (30) அன்று, ஒரு சிறுவனை கடுமையான பாலியல் துஷ்பிரயோகம் செய்த குற்றவாளியான தர்ம பாடசாலை ஆசிரியர் ஒருவருக்கு 24 வருட கடூழிய சிறைத்தண்டனை விதித்து தனது தீர்ப்பை அறிவித்தார். இவ்வாறு தண்டனை விதிக்கப்பட்டவர் அத்திமலை, 70 சந்தி, பில்டிங் பிரதேசத்தைச் சேர்ந்த 47 வயதுடைய தர்ம பாடசாலை ஆசிரியர் ஆவார். அவருக்கு எதிராக சுமத்தப்பட்ட குற்றச்சாட்டுகள் நியாயமான சந்தேகத்திற்கு இடமின்றி நிரூபிக்கப்பட்டதால் இந்தத் தீர்ப்பு வழங்கப்பட்டுள்ளது.
சம்பவம் தொடர்பாக வெளிப்படுத்தப்பட்ட தகவல்களின்படி, 2015 ஆம் ஆண்டில் இந்த பிரதிவாதி அதே பிரதேசத்தைச் சேர்ந்த ஒரு சிறுவனை தனது மிதிவண்டியில் ஏற்றிச் சென்று குளக்கரைக்கு அருகில் உள்ள காட்டுப் பகுதிக்கு அழைத்துச் சென்று அங்கு இந்த கடுமையான பாலியல் துஷ்பிரயோகத்தைச் செய்துள்ளார். மொணராகலை மேல் நீதிமன்றத்தில் நீண்ட காலமாக விசாரிக்கப்பட்ட இந்த வழக்கில் சமர்ப்பிக்கப்பட்ட சாட்சியங்களையும் உண்மைகளையும் நன்கு ஆராய்ந்த நீதிபதி, பிரதிவாதிக்கு எதிராக சுமத்தப்பட்ட இரண்டு குற்றச்சாட்டுகளுக்கும் குற்றவாளி என்று அறிவித்தார்.
ஒரு குற்றச்சாட்டுக்கு 12 வருடங்கள் வீதம் 24 வருட சிறைத்தண்டனை விதிக்கப்பட்ட போதிலும், அந்த தண்டனைக் காலம் 12 வருடங்களில் முடிவடையும் வகையில் அமுல்படுத்த நீதிமன்றம் உத்தரவிட்டது. சிறைத்தண்டனைக்கு மேலதிகமாக, ஒரு குற்றச்சாட்டுக்கு ஒரு லட்சம் ரூபாய் வீதம் இரண்டு லட்சம் ரூபாய் அபராதத்தை அரசுக்கு செலுத்தவும், துஷ்பிரயோகத்திற்கு உள்ளான குழந்தைக்கு ஐந்து லட்சம் ரூபாய் நஷ்டஈடு செலுத்தவும் இங்கு உத்தரவிடப்பட்டது.
விதிக்கப்பட்ட அபராதத் தொகையை செலுத்தத் தவறினால் ஒரு வருட சாதாரண சிறைத்தண்டனையும், நஷ்டஈட்டுத் தொகையை செலுத்தத் தவறினால் மூன்று வருட சாதாரண சிறைத்தண்டனையும் பிரதிவாதிக்கு மேலதிகமாக அனுபவிக்க நேரிடும் என்பதையும் நீதிபதி தனது தீர்ப்பில் மேலும் குறிப்பிட்டார்.