பதினைந்து வயது சிறுமி ஒருவரை கடுமையான பாலியல் துஷ்பிரயோகத்திற்கு உட்படுத்திய சம்பவம் தொடர்பாக அட்டமஸ்தானாதிபதி பல்லேகம ஹேமரத்ன தேரரிடம் பொலிஸார் வாக்குமூலம் பதிவு செய்துள்ள நிலையில், அவரை கைது செய்வதற்காக நிட்டம்புவ பொலிஸ் அதிகாரிகள் குழுவொன்று நேற்று அனுராதபுரத்திற்கு சென்று அவர் வசிக்கும் விகாரையை சுற்றிவளைத்துள்ளது. சமூகத்தில் பெரும் பரபரப்பையும் வருத்தத்தையும் ஏற்படுத்தியுள்ள அனுராதபுரம் புனித தலத்தை மையமாகக் கொண்ட இந்த குற்றத்தின் பிரதான சந்தேக நபராக அட்டமஸ்தானாதிபதி தேரர் கருதப்படுவதாக பொலிஸ் வட்டாரங்கள் உறுதிப்படுத்துகின்றன.
கம்பஹா பிரதேச சிறுவர் மற்றும் மகளிர் பணியகத்திற்கு கிடைத்த தகவலின்படி, நிட்டம்புவ பிரதேசத்தில் உள்ள ஒரு விடுதியில் தனது காதலன் என்று கூறப்படும் ஒருவருடன் தங்கியிருந்தபோது முதலில் இந்த சிறுமி பொலிஸ் காவலில் எடுக்கப்பட்டுள்ளார். அங்கு பாதிக்கப்பட்ட சிறுமி பொலிஸாரிடம் வெளிப்படுத்தியதாவது, தனது தாயார் பணம் பெற்றுக்கொண்டு அதற்கு ஈடாக சம்பந்தப்பட்ட விகாராதிபதிக்கும் மேலும் ஒரு வர்த்தகருக்கும் தன்னை துஷ்பிரயோகம் செய்ய கொடுத்ததாக. அவ்வப்போது பல சந்தர்ப்பங்களில் சம்பந்தப்பட்ட தேரர் மற்றும் மேலும் இருவரால் தான் துஷ்பிரயோகத்திற்கு உள்ளானதாக சிறுமி அளித்த வாக்குமூலத்தின் அடிப்படையில் பொலிஸார் நீதிமன்றத்திற்கு விடயங்களை அறிவித்துள்ள நிலையில், சம்பவம் தொடர்பாக விரிவான விசாரணையை மேற்கொள்ளுமாறு அனுராதபுரம் பிரதான நீதவான் உத்தரவிட்டுள்ளார்.
ஒரு சிரேஷ்ட பொலிஸ் அதிகாரி கருத்து தெரிவிக்கையில், சம்பந்தப்பட்ட தேரரிடம் விடயங்களை விசாரித்த பின்னர், குற்றம் நடந்ததாக கூறப்படும் பிரதேசத்தில் களப் பரிசோதனையும் மேற்கொள்ளப்பட்டதாக தெரிவித்தார். தற்போது விஞ்ஞான மற்றும் களப் பரிசோதனைகள் நிறைவடைந்து மேலதிக சாட்சியங்களை சேகரிக்கும் நடவடிக்கைகள் இடம்பெற்று வரும் நிலையில், கைதுகள் தொடர்பாக அடுத்த நீதிமன்ற அமர்வுகளில் விடயங்கள் அறிவிக்கப்படவுள்ளன. அத்துடன், பாதிக்கப்பட்ட சிறுமியின் பாதுகாப்பு மற்றும் அவருக்கு தேவையான உளவியல் ஆலோசனை வழங்குவதிலும் சம்பந்தப்பட்ட பிரிவுகளின் கவனம் செலுத்தப்பட்டுள்ளது.
இந்த பாரதூரமான சம்பவம் தொடர்பாக அரசாங்கத்தின் உயர்மட்ட கவனம் செலுத்தப்பட்டுள்ள நிலையில், சமூகத்தில் ஏற்பட்டுள்ள பெரும் ஆர்வத்தை அடிப்படையாகக் கொண்டு, அது தொடர்பான முழுமையான அறிக்கையை உடனடியாக தனக்கு வழங்குமாறு மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ் அம்மையார் அமைச்சின் அதிகாரிகளுக்கு பணிப்புரை விடுத்துள்ளார்.