பேராதனைப் பல்கலைக்கழகத்தில் இடம்பெறும் பாலியல் துன்புறுத்தல்களைத் தடுப்பதற்கு துரித நடவடிக்கை எடுக்குமாறு அப்பல்கலைக்கழகத்தின் செனட் சபைக்கு உயர் நீதிமன்றம் கடுமையான உத்தரவைப் பிறப்பித்துள்ளது. பல்கலைக்கழகத்தின் பல் மருத்துவ பீடத்தின் விரிவுரையாளர் ஒருவரால் தாக்கல் செய்யப்பட்ட அடிப்படை உரிமை மனுவை விசாரித்ததன் பின்னர் இந்தத் தீர்ப்பு அறிவிக்கப்பட்டுள்ளதுடன், அதனுடன் தொடர்புடைய குற்றச்சாட்டுக்கு உள்ளான பேராசிரியருக்கு பல்கலைக்கழக முறைமையில் எந்தப் பதவியையும் வகிக்கவும் நீதிமன்றம் தடை விதித்துள்ளது.
உயர் நீதிமன்ற நீதிபதிகளான அச்சல வெங்காப்புலி மற்றும் பிரியந்த பெர்னாண்டோ ஆகியோரின் ஒப்புதலுடன் நீதிபதி ஜனக் டி சில்வா இந்தத் தீர்ப்பை அறிவித்தார். பேராதனைப் பல்கலைக்கழகத்தின் பல் மருத்துவ பீடத்தின் இரண்டாம் தர விரிவுரையாளரும், தத்துவமாணிப் பட்டம் பயின்று வந்தவருமான பல் மருத்துவர் உதாரி அபேசிங்கவால் இந்த அடிப்படை உரிமை மனு தாக்கல் செய்யப்பட்டது. தனது பட்டப்படிப்பு மேற்பார்வையாளரான பேராதனைப் பல் மருத்துவ பீடத்தின் பீடாதிபதி பேராசிரியர் டபிள்யூ.ஏ. திலகரத்ன, பல்கலைக்கழக உபவேந்தர் மற்றும் செனட் சபை உள்ளிட்ட பலரை பிரதிவாதிகளாக அவர் குறிப்பிட்டிருந்தார்.
முதல் பிரதிவாதியான பேராசிரியர் மனுதாரருக்கு பல சந்தர்ப்பங்களில் பாலியல் துன்புறுத்தல்களைச் செய்ததாகக் கூறப்படும் விடயம் தொடர்பாக அவரது தாயார் பல்கலைக்கழக அதிகாரிகளிடம் ஆரம்பப் புகார் ஒன்றைச் சமர்ப்பித்திருந்தார். அந்தப் புகாரின் அடிப்படையில் மேற்கொள்ளப்பட்ட விசாரணையின் பின்னர் பேராசிரியருக்கு எதிராக குற்றப்பத்திரிகை தாக்கல் செய்யப்பட்டதுடன், சில குற்றச்சாட்டுகளுக்கு அவர் குற்றவாளியாகக் காணப்பட்ட போதிலும், பல்கலைக்கழக செனட் சபை அவருக்கு எதிராக எந்த ஒழுங்கு நடவடிக்கையும் எடுக்கவில்லை என்பது நீதிமன்றத்தில் தெரியவந்தது.
இந்த நிலைமையின் கீழ் மனுதாரர் மனித உரிமைகள் ஆணைக்குழுவிடம் புகார் அளித்திருந்ததுடன், பின்னர் உயர் நீதிமன்றத்தில் இந்த அடிப்படை உரிமை மனுவைத் தாக்கல் செய்தார். மனுவை விசாரணைக்கு எடுத்துக் கொண்டபோது, பிரதிவாதி செனட் சபை இது காலாவதியாகிவிட்டதாக ஆரம்ப ஆட்சேபனையை எழுப்பியதுடன், 'கண்டம்பி எதிர் அரச மரக் கூட்டுத்தாபனம்' என்ற சட்ட முன்னுதாரணத்தின்படி அந்த ஆட்சேபனை ஏற்றுக்கொள்ளத்தக்கது என்று நீதிமன்றம் தீர்ப்பளித்தது. இருப்பினும், அரசியலமைப்பின் 14 (1) ஆம் பிரிவின் மூலம் குடிமக்களுக்கு உறுதிப்படுத்தப்பட்டுள்ள தொழில் செய்யும் சுதந்திரம், நியாயம் மற்றும் சமத்துவம் தொடர்பாக உயர் நீதிமன்றத்திற்கு உள்ள பரந்த அதிகாரங்களின்படி மனுதாரருக்கு நிவாரணம் வழங்க நீதிபதிகள் குழு தீர்மானித்துள்ளது.
அதன்படி, முதல் பிரதிவாதியான பேராசிரியர் டபிள்யூ.ஏ. திலகரத்ன இலங்கையில் எந்தவொரு பல்கலைக்கழகத்திலும் அல்லது உயர்கல்வி நிறுவனத்திலும் எந்தவிதமான உத்தியோகபூர்வ பதவியையோ அல்லது கௌரவப் பதவியையோ வகிப்பதற்கு முற்றிலும் தடை விதித்து உயர் நீதிமன்றம் பல்கலைக்கழக மானியங்கள் ஆணைக்குழுவுக்கு உத்தரவிட்டுள்ளது. அத்துடன், பேராதனைப் பல்கலைக்கழக ஊழியர்களுக்கும் மாணவர்களுக்கும் ஏற்படும் பாலியல் துன்புறுத்தல்களைத் தடுப்பதற்கு தெளிவான வழிகாட்டல் தொகுப்பை உருவாக்கி உடனடியாக அமுல்படுத்துமாறும் செனட் சபைக்கு உத்தரவிடப்பட்டுள்ளது. இந்த வழக்கில் மனுதாரர் சார்பில் சட்டத்தரணி அமீஷா டீக்கல் ஆஜரானார். முதல் பிரதிவாதி சார்பில் ஜனாதிபதி சட்டத்தரணி சலிய பீரிஸ் மற்றும் ஏனைய பிரதிவாதிகள் சார்பில் சிரேஷ்ட அரச சட்டத்தரணி சுரேகா அஹமட் ஆகியோர் ஆஜரானார்கள்.