பலாப்பழம் பறித்த சம்பவம் தொடர்பாக ஏற்பட்ட வாக்குவாதம் முற்றியதில், தனது மகளை இரும்பு கம்பியால் அடித்துக் கொன்ற தந்தை ஒருவரை களுத்துறை வடக்கு பொலிஸார் கைது செய்துள்ளனர். இந்த துயர சம்பவத்தில் உயிரிழந்தவர் வஸ்கடுவ பிரதேசத்தைச் சேர்ந்த 35 வயதுடைய திலினி மதுஷானி என்ற ஒரு பிள்ளைத் தாயாவார்.
சந்தேகநபரான தந்தை களுத்துறை வடக்கு பிரதேசத்தைச் சேர்ந்த 63 வயதுடையவர் என பொலிஸார் உறுதிப்படுத்தியுள்ளனர்.பொலிஸ் விசாரணைகளின்படி, கொலை செய்யப்பட்ட மகளும் சந்தேகநபரான தந்தையும் இதற்கு முன்னர் களுத்துறை வடக்கு பிரதேசத்தில் அருகருகே உள்ள இரண்டு வீடுகளில் வசித்து வந்துள்ளனர். இருப்பினும், இருவருக்கும் இடையே நீண்டகாலமாக நிலவி வந்த தகராறு காரணமாக, மகள் தனது கணவர் மற்றும் சிறிய மகளுடன் வஸ்கடுவ பிரதேசத்தில் ஒரு வாடகை வீட்டில் குடியேறியுள்ளார். மகள் முன்பு வசித்த காணியில் இருந்த பலா மரத்திலிருந்து தந்தை ஒரு பலாப்பழத்தைப் பறித்துள்ளார், இது குறித்து ஒரு அண்டை வீட்டுக்காரர் தொலைபேசி அழைப்பு மூலம் மகளுக்குத் தெரிவித்துள்ளார்.
அந்தத் தகவலை அறிந்த மகள் உடனடியாக சம்பவ இடத்திற்கு வந்துள்ளார், அங்கு தந்தைக்கும் மகளுக்கும் இடையே கடுமையான வாக்குவாதம் ஏற்பட்டுள்ளது. இந்த சந்தர்ப்பத்தில், கோபமடைந்த சந்தேகநபர் வீட்டில் இருந்த இரும்பு கம்பியை எடுத்து மகளின் தலையில் தாக்கியுள்ளார் என்று இதுவரை மேற்கொள்ளப்பட்ட விசாரணைகளில் தெரியவந்துள்ளது. கொலையைச் செய்த பின்னர், தாக்குதலுக்குப் பயன்படுத்தப்பட்ட இரும்பு கம்பியுடன் சந்தேகநபரான தந்தை களுத்துறை வடக்கு பொலிஸில் சரணடைந்துள்ளார்.