அனுராதபுரம் பிரதேசத்தில் இடம்பெற்ற சிறுமி துஷ்பிரயோகம் தொடர்பான விசாரணைகளின் தற்போதைய நிலை குறித்து பாராளுமன்ற பெண் உறுப்பினர்கள் மன்றத்தில் நடைபெற்ற கலந்துரையாடலை அறிக்கையிட்டமை தொடர்பில், பி.பி.சி. சிங்கள சேவையின் ஊடகவியலாளர்களை பாராளுமன்ற ஒழுக்கம் மற்றும் சலுகைகள் தொடர்பான குழுவின் முன் ஆஜராக அழைத்திருந்த தீர்மானம் இடைநிறுத்தப்பட்டுள்ளதாக தெரிவிக்கப்படுகிறது.
பல்லேகம ஹேமரத்ன தேரருக்கு எதிராக முன்வைக்கப்பட்டுள்ள சிறுவர் துஷ்பிரயோக குற்றச்சாட்டு தொடர்பான அறிக்கையின் அடிப்படையில், பிபிசி சிங்கள இணையத்தளத்தின் பிரதம ஆசிரியர் இஷாரா தனசேகர மற்றும் ஊடகவியலாளர் சம்பத் திசாநாயக்க ஆகியோர் ஜூலை 23 ஆம் திகதி பிற்பகல் 2.00 மணிக்கு சபாநாயகரின் உத்தரவின் பேரில் குழுவின் முன் இவ்வாறு அழைக்கப்பட்டிருந்தனர்.இந்த அழைப்பு விடுக்கப்படுவதற்கு முன்னர் அறிக்கை ஒன்றை வெளியிட்ட இணைய ஊடகச் செயற்பாட்டு அமைப்பு (IMA), ஊடகவியலாளர்களை சலுகைகள் குழுவிற்கு அழைப்பது முழு ஊடகத் துறையையும் அச்சுறுத்துவதற்கும் தணிக்கை செய்வதற்கும் மேற்கொள்ளப்பட்ட ஒரு தீவிர முயற்சி என்று குறிப்பிட்டது. நிர்வாக பலவீனங்களை மறைக்கும் நோக்குடன் பாராளுமன்ற சலுகைகள் சட்டத்தை ஒரு ஒழுங்கற்ற தணிக்கை கருவியாகப் பயன்படுத்துவது மக்களின் தகவல் அறியும் உரிமைக்கும் ஊடக சுதந்திரத்திற்கும் நேரடியான அச்சுறுத்தல் என்று அந்த அமைப்பின் அழைப்பாளர் சம்பத் சமரகோன் சுட்டிக்காட்டியிருந்தார்.
சம்பந்தப்பட்ட சம்பவத்திற்கு அடிப்படையாக அமைந்த பாராளுமன்ற பெண் உறுப்பினர்கள் மன்றம், உத்தியோகபூர்வமாக வெளியீடுகளைத் தடை செய்யும் அதிகாரங்களைக் கொண்ட ஒரு சட்டரீதியான குழு அல்ல என்பதால், அதன் தகவல்களை அறிக்கையிடுவது சலுகைகளை மீறுவதாகக் கருதுவது ஆதாரமற்றது என்றும் இணைய ஊடகச் செயற்பாட்டு அமைப்பு வலியுறுத்தியது. மேலும், சர்வதேச தரங்களுக்கு அமைய ஊடகவியலாளர்களின் மூலங்களை பாதுகாக்கும் உரிமையை ரத்து செய்ய அழுத்தம் கொடுப்பதன் மூலம், துறை முழுவதும் சுய தணிக்கை உருவாகி, ஊழல் மற்றும் அதிகார துஷ்பிரயோகம் குறித்த உண்மையான தகவல்கள் மக்களுக்கு கிடைப்பது தடைபடும் என்று சுட்டிக்காட்டிய அந்த அமைப்பு, இந்த அழைப்பை உடனடியாக இடைநிறுத்துமாறும் கோரியது.