பொலிஸ் விசாரணைகளின்படி, இந்த நுட்பமான மோசடி சுமார் இரண்டரை மாதங்களாக தொடர்ச்சியாக மேற்கொள்ளப்பட்டு வந்துள்ளது.
அங்கு கசினோ சூதாட்டத்தில் சீட்டுக்கட்டுகளைக் கலக்கும் (Shuffle) பணியில் ஈடுபட்டிருந்த இந்த ஊழியர், தனக்கு முன்னால் இருப்பவர்களுக்குத் தெரியும் வகையில் அந்தச் செயலைச் செய்து, அதை வீடியோ பதிவு செய்யவும் வாய்ப்பளித்துள்ளார். விளையாட்டுக்காக 8 சீட்டுக்கட்டுகள் வழங்கப்பட்டிருந்தாலும், இவர்கள் ஒரே சீட்டுக்கட்டை எடுத்து கலக்குவது போல் பாசாங்கு செய்து, எந்த மாற்றமும் செய்யாமல் அது இருந்தபடியே வைத்து வீடியோ பதிவு செய்ய அனுமதித்துள்ளனர். பின்னர் அந்த வீடியோ காட்சிகள் வெளியிலிருந்து வரும் ஒரு கசினோ வீரருக்கு வழங்கப்பட்டுள்ளதுடன், அவர் அந்த காட்சிகளின் உதவியுடன் எந்தத் தடங்கலும் இன்றி விளையாட்டில் மிகப்பெரிய தொகையை வென்றுள்ளார். அவ்வாறு மோசடியாகப் பெறப்பட்ட பணத்தில் சுமார் ஐந்து கோடி ரூபா இந்த சந்தேகநபரான ஊழியருக்கு வழங்கப்பட்டுள்ளதாக விசாரணைகளில் தெரியவந்துள்ளது.
இந்த ஒழுங்கமைக்கப்பட்ட நிதி மோசடிக்கு, குறித்த கசினோ நிறுவனத்திலேயே பணிபுரிந்த மற்றொரு நபரும் நேரடியாகப் பங்களித்துள்ளதாகவும், சந்தேகநபர் கடமையாற்றிய மேசையில் பணிபுரிந்த அவர் உட்பட ஆறு ஊழியர்கள் இதில் சம்பந்தப்பட்டுள்ளதாகவும் பொலிஸார் கண்டறிந்துள்ளனர். நிறுவனத்தின் தரவு அமைப்பை பரிசோதித்தபோது சுமார் ஐந்து கோடி ரூபா மோசடி செய்யப்பட்டுள்ளது உறுதிப்படுத்தப்பட்டுள்ளதாக ஒரு சிரேஷ்ட பொலிஸ் அதிகாரி தெரிவித்தார். சம்பவத்தின் தீவிரத்தன்மையைக் கருத்தில் கொண்டு, சந்தேகநபர் மேலதிக விசாரணைகளுக்காக குற்றப் புலனாய்வுத் திணைக்களத்திடம் (CID) ஒப்படைக்கப்பட்டுள்ளார். கொள்ளுப்பிட்டி பொலிஸ் நிலைய பொறுப்பதிகாரி பிரதான பொலிஸ் பரிசோதகர் லலித் சிலோகமகேவின் அறிவுறுத்தலின் பேரில், பல்வேறு முறைப்பாடுகள் பிரிவின் பொறுப்பதிகாரி பொலிஸ் பரிசோதகர் ரங்கன சில்வா மற்றும் குற்றப் புலனாய்வுப் பிரிவின் பொறுப்பதிகாரி உப பொலிஸ் பரிசோதகர் தமயந்த உள்ளிட்ட அதிகாரிகள் குழுவொன்று இந்த விசாரணைகளை மேற்கொண்டு வருகிறது.