பாராளுமன்ற உறுப்பினர் நாமல் ராஜபக்ஷவுக்கு 70 மில்லியன் ரூபாய் இலஞ்சம் வழங்கிய சம்பவம் தொடர்பில் இலஞ்சம் அல்லது ஊழல் விசாரணை ஆணைக்குழுவினால் கைது செய்யப்பட்ட கிரிஷ் நிறுவனத்தின் முன்னாள் பணிப்பாளர் ஜனகி சிறிவர்தனவை எதிர்வரும் ஒக்டோபர் மாதம் 06ஆம் திகதி வரை விளக்கமறியலில் வைக்குமாறு கொழும்பு பிரதான நீதவான் அசங்க எஸ். போதரகம இன்று (24) உத்தரவிட்டார்.
இலஞ்ச ஆணைக்குழு அதிகாரிகள் மற்றும் சந்தேகநபரின் சட்டத்தரணிகள் முன்வைத்த விடயங்களை பரிசீலித்த பின்னர் நீதவான் இந்த உத்தரவை பிறப்பித்தார்.நகர அபிவிருத்தி அதிகார சபைக்கு சொந்தமான கொழும்பு கோட்டை ட்ரான்ஸ்வேர்க் சதுக்கம் என்ற காணியை விரைவாகப் பெற்றுக்கொள்வதற்கு ஆதரவளிப்பதற்காக, ஜனகி சிறிவர்தன மூன்று சந்தர்ப்பங்களில் நாமல் ராஜபக்ஷவுக்கு 70 மில்லியன் ரூபாய் இலஞ்சமாக வழங்கியதாக குற்றச்சாட்டுகள் முன்வைக்கப்பட்டுள்ளன. இந்த குற்றச்சாட்டுகள் தொடர்பான விசாரணைகளின் அடிப்படையில் இலஞ்ச ஆணைக்குழு அவரை கைது செய்துள்ளது.
அத்துடன், தற்போது விளக்கமறியலில் வைக்கப்பட்டுள்ள பாராளுமன்ற உறுப்பினர் நாமல் ராஜபக்ஷவிடம் இந்த விசாரணை தொடர்பான வாக்குமூலத்தைப் பதிவு செய்ய இலஞ்ச ஆணைக்குழுவுக்கு அனுமதி வழங்குமாறு நீதவான் சிறைச்சாலை அத்தியட்சகருக்கு உத்தரவிட்டார்.
ஜனகி வரக்காகொட எனவும் அறியப்படும் இவர், பாரிய நிதி மோசடி குற்றச்சாட்டுகளுக்கு உள்ளாகியிருந்த திலினி பிரியமாலியின் சம்பவங்களுடன் தொடர்புடையவர் என 2022ஆம் ஆண்டு குற்றப் புலனாய்வுத் திணைக்களத்தால் கைது செய்யப்பட்டார். கோட்டை கிரிஷ் கட்டிடத்தில் அமைந்துள்ள அலுவலகத்தில் நடந்த இந்த கைது, காலி முகத்திடல் பகுதியில் கட்ட திட்டமிடப்பட்டிருந்த நாட்டின் மிக உயரமான கட்டிடத்தின் வணிக மற்றும் குடியிருப்பு அலகுகளை விற்பனை செய்வதாகக் கூறி வணிகர்களிடமிருந்து முற்பணம் பெற்றுக்கொண்டு செய்யப்பட்ட மோசடி விசாரணைகளின் ஒரு பகுதியாகும். திலினி பிரியமாலியின் பல நிதி பரிவர்த்தனைகள் ஜனகி சிறிவர்தனவுடன் இணைந்து மேற்கொள்ளப்பட்டதாக அரசியல்வாதி ஆசாத் சாலி அப்போதே தகவல்களை வெளியிட்டிருந்தார்.
கிரிஷ் காணி ஒப்பந்தம் தொடர்பான விசாரணைகள் ஆரம்பமானதும் ஜனகி சிறிவர்தனவின் பெயர் ஊடகங்களில் பரவலாகப் பேசப்பட்டது. இந்த விசாரணைகளின் போது பான் ஏசியா வங்கியின் முன்னாள் தலைவர் நிமல் பெரேரா நீதவான் முன்னிலையில் அளித்த வாக்குமூலத்தில், நாமல் ராஜபக்ஷவுக்கும் ஜனகி சிறிவர்தனவுக்கும் இடையிலான உறவுகள் குறித்த பல தகவல்கள் வெளிப்படுத்தப்பட்டன. இந்தியாவின் மகாதேவன் நிறுவனம் அல்லது கிரிஷ் லங்கா நிறுவனத்தின் தாய் நிறுவனத்தின் முதலீட்டாளர்களை இலங்கையில் முதலீடு செய்ய அழைத்து வந்த முக்கிய ஒருங்கிணைப்பாளராகவும் அவர் செயல்பட்டார்.
இலங்கையில் ரக்பி விளையாட்டை மேம்படுத்துவதற்கான அனுசரணையாகக் கூறி, கிரிஷ் வர்த்தகர்கள் 70 மில்லியன் ரூபாய் பணத்தை இந்த காணி ஒப்பந்தத்திற்கு முன்னதாகவே பரிமாறிக்கொண்டனர். கொழும்பு கோட்டை ட்ரான்ஸ்வேர்க் சதுக்க காணிக்கு மேலதிகமாக, அம்பாந்தோட்டை துறைமுகத்திற்கு அருகிலுள்ள ஒரு திட்டத்தைப் பெறுவதற்கும், கற்பிட்டி பிரதேசத்தில் முப்பது ஏக்கர் காணியை வாங்குவதற்கும் ராஜபக்ஷக்களுடன் ஒருங்கிணைந்து பாரிய தரகுப் பணத்தை பரிமாறிக்கொள்வதில் அவர் ஈடுபட்டதாக பல்வேறு அறிக்கைகள் வெளியாகின.
இது தவிர, நல்லாட்சி அரசாங்கத்தின் போது இந்திய கோடீஸ்வரர் முகேஷ் அம்பானியை இலங்கைக்கு அழைத்து வந்து அப்போதைய பிரதமர் ரணில் விக்கிரமசிங்கவுடன் ஒரு சந்திப்பை ஏற்பாடு செய்வதிலும் அவர் ஈடுபட்டிருந்தார்.
