வடக்கு லண்டனில் பாடசாலைக்குச் சென்று கொண்டிருந்த 16 வயது பாடசாலை மாணவி ஒருவர் வீதி விபத்தில் சிக்கி உயிரிழந்துள்ளார். அவர் இலங்கை வம்சாவளியைச் சேர்ந்த மெலிசா பிரேமரத்ன (Melissa Premaratne) என அடையாளம் காணப்பட்டுள்ளார். வியாழக்கிழமை காலை 8:15 மணியளவில் ஹைகேட் (Highgate) பாடசாலைக்கு அருகில் உள்ள நோர்த் ரோட் (North Road) பகுதியில் இந்த துயரச் சம்பவம் இடம்பெற்றுள்ளதாக தெரிவிக்கப்படுகிறது.
ஒரு தனியார் வாடகை வண்டியால் மோதப்பட்ட அவர், சம்பவ இடத்திலேயே உயிரிழந்துவிட்டதாக மருத்துவர்களால் உறுதிப்படுத்தப்பட்டது.
விபத்துடன் தொடர்புடைய 68 வயதுடைய சாரதி, கவனக்குறைவாக வாகனம் ஓட்டி மரணத்தை ஏற்படுத்திய சந்தேகத்தின் பேரில் பொலிஸாரால் கைது செய்யப்பட்டு, பின்னர் பிணையில் விடுவிக்கப்பட்டுள்ளார். இந்தச் சம்பவம் தொடர்பில் தொடர்ச்சியான விசாரணைகள் நடைபெற்று வருவதாகவும், விபத்து தொடர்பான ஏதேனும் தகவல், CCTV அல்லது டாஷ்கேம் காட்சிகள் இருந்தால் வழங்குமாறும் லண்டன் மெட்ரோபொலிட்டன் பொலிஸின் துப்பறியும் அதிகாரி சைமன் ஏகர் பொதுமக்களிடம் கோரிக்கை விடுத்துள்ளார்.
மெலிசா, GCSE பரீட்சையில் 10 'A' தர (Grade 9) பெறுபேறுகளைப் பெற்று, ஒக்ஸ்போர்ட் பல்கலைக்கழகத்தில் சேர்ந்து கணிதம் மற்றும் தத்துவம் கற்க வேண்டும் என்ற கனவுடன் இருந்த ஒரு திறமையான 12 ஆம் ஆண்டு மாணவி ஆவார். தங்கள் வாழ்க்கையை ஒளிரச் செய்த அவளது இழப்பு ஒருபோதும் ஈடுசெய்ய முடியாத இழப்பு என்று குடும்ப உறவினர்கள் கூறுகின்றனர். மேலும், அவள் தனது தாய்க்கும் இளைய சகோதரிக்கும் அளித்த ஆதரவு அளப்பரியது என்பதையும் அவர்கள் நினைவு கூர்ந்தனர்.
ஹைகேட் பாடசாலையின் பேச்சாளர் ஒருவர், எதிர்கால நம்பிக்கைகள் பலவற்றைச் சுமந்திருந்த இந்த இளம் பெண்ணின் அகால மரணம் முழு பாடசாலை சமூகத்திற்கும் பெரும் அதிர்ச்சியை ஏற்படுத்தியுள்ளது என்று குறிப்பிட்டார். மேலும், விபத்துடன் தொடர்புடைய வாகனம் தங்கள் நிறுவனத்திற்கு சொந்தமானது என்பதை உறுதிப்படுத்திய 'அடிசன் லீ' (Addison Lee) வாடகை கார் சேவை, பொலிஸ் விசாரணைகளுக்கு முழு ஒத்துழைப்பு வழங்குவதாக அறிவித்துள்ளது.
விளையாட்டு, பியானோ வாசிப்பு மற்றும் பாடுவதிலும் திறமை காட்டிய மெலிசாவின் இறுதிச் சடங்குகளுக்காகவும், இலங்கையில் உள்ள அவரது பாட்டி மற்றும் தாத்தா லண்டனுக்கு வரத் தேவையான நிதி வசதிகளை வழங்குவதற்காகவும் தற்போது ஒரு நிதி திரட்டப்பட்டுள்ளது. குடும்ப நண்பர்கள் மற்றும் உள்ளூர் மக்களின் தாராளமான பங்களிப்புடன் தொடங்கப்பட்ட இந்த நிதி, அதன் ஆரம்ப இலக்கான 55,000 பவுண்டுகளையும் தாண்டி, தற்போது 90,000 பவுண்டுகளுக்கு அருகில் திரட்டப்பட்டுள்ளது.
