பத்தேகம, ஹல்பதொட்ட பிரதேசத்தில் நேற்று (27) காலை இடம்பெற்ற மனிதாபிமானமற்ற துப்பாக்கிச் சூட்டுச் சம்பவத்தில் படுகாயமடைந்து காலி தேசிய வைத்தியசாலையின் தீவிர சிகிச்சைப் பிரிவில் சிகிச்சை பெற்று வந்த இரண்டாவது பெண்ணும் இன்று உயிரிழந்துள்ளார். அவர் அம்பலாங்கொடை, கொடஹேன செஞ்சிலுவைச் சங்க வீட்டுத் திட்டத்தில் வசித்து வந்த டி.என்.ஜி. மல்லிகா என்பவராவார்.
இந்தக் கொடூரத் தாக்குதலில் நேற்று அதே இடத்தில் மேலும் இருவர் உயிரிழந்தனர். அவர்கள் அம்பலாங்கொடை குலிகொட பிரதேசத்தைச் சேர்ந்த முச்சக்கரவண்டி சாரதி லலித் சுசந்த டி சில்வா மற்றும் உயிரிழந்த மல்லிகா என்பவரின் மகள் 'களு நோனி' என்ற புனைப்பெயரில் அறியப்படும் பெண் ஆகியோராவர். இவர்கள் பத்தேகமவில் அமைந்துள்ள காலி மாவட்ட குற்றப் பிரிவுக்குச் சென்று கையொப்பமிட்டு மீண்டும் முச்சக்கரவண்டியில் பயணித்துக் கொண்டிருந்தபோதே இந்த துயரச் சம்பவத்தை எதிர்கொண்டுள்ளனர்.
இது இரண்டு பாதாள உலகக் குழுக்களுக்கிடையேயான மோதலின் விளைவு என பொலிஸ் விசாரணைகள் மூலம் தெரியவந்துள்ளது. கொல்லப்பட்ட 'களு நோனி' என்பவர், கடந்த 2024 ஆம் ஆண்டு அத்துருகிரியவில் 'கிளப் வசந்த' கொலை செய்யப்பட்ட சம்பவத்தின் பிரதான சந்தேக நபரான லந்துஹந்தி சுஜீவ ருவன் குமார டி சில்வா அல்லது 'லொக்கு பெட்டி' எனப்படும் ஒழுங்கமைக்கப்பட்ட குற்றவாளியின் தரப்புடன் தொடர்புடையவர் என அடையாளம் காணப்பட்டுள்ளார். லொக்கு பெட்டி கடந்த மே 04 ஆம் திகதி வெளிநாட்டிலிருந்து நாட்டிற்கு அழைத்து வரப்பட்டவர்.
இந்தக் கொலையை வெளிநாட்டில் தலைமறைவாக இருக்கும் சக்திவாய்ந்த போதைப்பொருள் கடத்தல்காரனும் பாதாள உலகக் குழுத் தலைவனுமான சோபன ஹந்தி ஜயலத் டி சில்வா அல்லது 'கரந்தெனிய சுத்தா' என்பவரின் சீடர்கள் இயக்கியுள்ளதாக பொலிஸார் தற்போது தகவல்களை உறுதிப்படுத்தியுள்ளனர். துப்பாக்கிச் சூட்டுக்காக நான்கு பேர் கொண்ட குழுவொன்று மோட்டார் வாகனத்தில் வந்துள்ளதுடன், அவர்கள் டி-56 ரக துப்பாக்கிகள் இரண்டைக் கொண்டு வந்து ஒரு துப்பாக்கியால் மாத்திரம் தாக்குதலை நடத்தியுள்ளனர்.
கொலையாளிகள் வழிமறித்து முச்சக்கரவண்டி மீது துப்பாக்கிச் சூடு நடத்தி தப்பிச் செல்லும் காட்சிகள் அருகிலுள்ள சிசிடிவி கமராக்களில் தெளிவாகப் பதிவாகியுள்ளன. குற்றவாளிகள் தங்கள் பயணப் பாதையில் பல சந்தர்ப்பங்களில் பல மோட்டார் வாகனங்களை மாற்றிப் பயணித்துள்ளதாக விசாரணை அதிகாரிகள் கண்டறிந்துள்ளனர்.
சம்பவத்துடன் தொடர்புடையதாக சந்தேகிக்கப்படும், இலக்கத் தகடுகள் மாற்றப்பட்ட சிறிய சிவப்பு நிற மோட்டார் வாகனம் ஒன்று பத்தேகம, வவுலகல பிரதேசத்தில் உள்ள ஒரு வெறிச்சோடிய வீதியில் கைவிடப்பட்ட நிலையில் பொலிஸாரால் தற்போது கண்டுபிடிக்கப்பட்டுள்ளது.
