பத்தேகம பொலிஸ் பிரிவின் ஹல்பதோட்ட, வவுலகல பிரதேசத்தில் பத்தேகம - ஹிக்கடுவ வீதியில் பயணித்துக்கொண்டிருந்த முச்சக்கர வண்டி மீது மோட்டார் காரில் வந்த இனந்தெரியாத நபர்கள் நடத்திய ரி-56 துப்பாக்கிச் சூட்டில் இருவர் உயிரிழந்துள்ளதுடன், மேலும் ஒரு பெண் படுகாயமடைந்துள்ளார். இன்று (27) காலை இடம்பெற்ற இந்த துப்பாக்கிச் சூட்டில் முச்சக்கர வண்டியின் சாரதி சம்பவ இடத்திலேயே உயிரிழந்ததுடன், அதில் பயணித்த இரண்டு பெண்களில் ஒருவர் பத்தேகம வைத்தியசாலையில் அனுமதிக்கப்பட்ட பின்னர் உயிரிழந்துள்ளார்.
இவ்வாறு உயிரிழந்தவர்கள் அம்பலாங்கொடை, குலீகொட / மீட்டியாகொட பிரதேசத்தைச் சேர்ந்த 46 வயதுடைய மூன்று பிள்ளைகளின் தந்தையான லலித் சுசந்த டி சில்வா என்ற முச்சக்கர வண்டி சாரதியும், அம்பலாங்கொடை, கொடஹேன, செஞ்சிலுவைச் சங்க வீட்டுத் திட்டத்தில் வசித்து வந்த 'களு நோனி' என்ற புனைப்பெயரால் அறியப்படும் 47 வயதுடைய சுசிதா இரோஷனி என்ற பெண்ணும் ஆவர். தாக்குதலில் படுகாயமடைந்த டி.என்.ஜி. மல்லிகா என்ற மற்றைய பெண், உயிரிழந்த சுசிதா இரோஷனியின் தாயார் ஆவார். அவர் தற்போது காலி கராப்பிட்டிய தேசிய வைத்தியசாலையின் தீவிர சிகிச்சைப் பிரிவில் சிகிச்சை பெற்று வருகிறார்.
உயிரிழந்த பெண், பத்தேகமவில் அமைந்துள்ள காலி மாவட்ட குற்றப் பிரிவில் நடைபெற்ற வழக்கு தொடர்பான ஞாயிற்றுக்கிழமை கையெழுத்திடுவதற்காக வந்து மீண்டும் அம்பலாங்கொடை நோக்கிச் சென்று கொண்டிருந்தபோது இந்தத் தாக்குதலுக்கு உள்ளாகியுள்ளார். மோட்டார் காரில் வந்த துப்பாக்கிதாரி காரில் இருந்து இறங்கி முச்சக்கர வண்டியின் பாதையை மறித்து சுடும் காட்சிகள் அருகிலுள்ள சிசிடிவி கமராக்களில் பதிவாகியுள்ளதுடன், தாக்குதலுக்குப் பின்னர் சந்தேகநபர்கள் ஹிக்கடுவ நோக்கி தப்பிச் சென்றுள்ளனர்.
உயிரிழந்த பெண், லத்துவா சந்தி சுஜீவ ருவன் குமார அல்லது 'லொக்கு பெட்டி' என்பவரின் போதைப்பொருள் கடத்தலுடன் தொடர்புடையவர் எனத் தகவல் வெளியாகியுள்ளதுடன், இந்த கொலை ஒழுங்கமைக்கப்பட்ட குற்றச் செயல்கள் மற்றும் போதைப்பொருள் கடத்தல்காரரான சோபனாஹந்தி ஜயலத் டி சில்வா அல்லது 'கரந்தெனிய சுத்தா' என்பவரால் திட்டமிடப்பட்டதாக பொலிஸார் சந்தேகிக்கின்றனர். தாக்குதலுக்குப் பொறுப்பான சந்தேகநபர்களை அடையாளம் கண்டு கைது செய்வதற்காக பத்தேகம பொலிஸார் மேலதிக விசாரணைகளை மேற்கொண்டு வருகின்றனர்.
