முன்னாள் பிரித்தானிய பிரதமர் போரிஸ் ஜான்சன் மற்றும் சிஐஏ (CIA) இன் முன்னாள் தலைவர் டேவிட் பெட்ரேயஸ் ஆகியோர் பயணித்த ரயில் போலந்து-உக்ரைன் எல்லையில் ரஷ்ய ட்ரோன் தாக்குதலுக்கு இலக்காகியிருக்கலாம் என உக்ரைன் ரயில்வே அதிகாரிகள் சந்தேகம் தெரிவிக்கின்றனர். இராஜதந்திரிகளை ஏற்றிச் சென்ற இந்த ரயில் எல்லையைக் கடந்து சிறிது நேரத்திற்குப் பிறகு, ஒரு ரஷ்ய ட்ரோன் மூலம் உக்ரைன் ரயில் எஞ்சின் ஒன்று அழிக்கப்பட்டதாகத் தெரிவிக்கப்பட்டுள்ளது.
இந்தச் சம்பவம் உக்ரைன் முழுவதும் ரஷ்யாவால் நடத்தப்பட்ட பாரிய இரவுநேரத் தாக்குதல் தொடரின் ஒரு விளைவாகும். 450க்கும் மேற்பட்ட ட்ரோன்கள் மற்றும் ஏவுகணைகளைப் பயன்படுத்தி நடத்தப்பட்ட இந்தத் தாக்குதல்களில் குறைந்தது ஆறு பேர் உயிரிழந்துள்ளதுடன், 40க்கும் மேற்பட்டோர் காயமடைந்துள்ளனர். உக்ரைனிய விமானப்படை 405 ட்ரோன்களையும் நான்கு ஏவுகணைகளையும் இடைமறித்து அழித்துள்ளது. பொதுவாக போர் மோதல்கள் குறைவாக இருக்கும் மேற்கு உக்ரைன் மீதும் இம்முறை கடுமையான தாக்குதல்கள் நடத்தப்பட்டிருப்பது குறிப்பிடத்தக்கது.
இந்த நிலைமை காரணமாக மற்ற ரயில் பயணிகள் பெரும் அசௌகரியத்திற்கு உள்ளாகினர். கீவ்வில் இருந்து போலந்தின் செம் (Chelm) வரை இரவு ரயிலில் பயணித்துக் கொண்டிருந்த பயணிகள் எல்லையில் சுமார் 10 மணி நேரம் செலவழித்துள்ளனர், மேலும் அவர்கள் மூன்று சந்தர்ப்பங்களில் ரயிலில் இருந்து வெளியேற்றப்பட்டு பாதுகாப்பான இடங்களுக்கு அனுப்பப்பட்டனர். பயணிகளின் பாதுகாப்பை உறுதி செய்வதற்காக, ஒரு ஏரிக்கு அருகில் புதர்களுக்குள் மறைந்திருக்குமாறு ரயில்வே அதிகாரிகள் அவர்களுக்கு அறிவுறுத்தியிருந்தனர், தாக்குதலில் எந்தப் பயணியும் உயிரிழக்கவில்லை. மேலும், எல்லையில் இருந்து ஒரு கிலோமீட்டருக்கும் குறைவான தூரத்தில் இருந்த ஒரு லாரிக்கும் தாக்குதலில் சேதம் ஏற்பட்டுள்ளது.
இந்தத் தாக்குதல் குறித்து தனது X கணக்கில் கருத்துத் தெரிவித்த போரிஸ் ஜான்சன், இது ரஷ்யாவின் மற்றொரு நியாயமற்ற மற்றும் அர்த்தமற்ற செயல் என்று கூறினார். ரஷ்யாவின் இந்த நடவடிக்கை இப்போது ஐரோப்பிய ஒன்றியம் மற்றும் நேட்டோ (NATO) இன் வாசலுக்கே வந்துவிட்டது என்று உக்ரைனிய வெளியுறவு அமைச்சர் சுட்டிக்காட்டுகிறார். இதற்கிடையில், போலந்து பிரதமர் டொனால்ட் டஸ்க் அவசரக் கூட்டத்திற்கு அழைப்பு விடுத்து, உக்ரைனில் தீவிரமடைந்து வரும் இந்தத் தாக்குதல் தொடர் வரும் வாரங்களில் போலந்தையும் நேரடியாகப் பாதிக்கலாம் என்று எச்சரித்தார்.
