போலி வேலைவாய்ப்பு முகவர் ஒருவரின் மோசடிக்கு இலக்காகி, அசர்பைஜானில் 15 ஆண்டுகள் சிறைத்தண்டனை அனுபவித்து வரும் மூன்று இலங்கையர்களை விடுவிப்பது குறித்து அசர்பைஜான் அரசாங்கத்தின் கவனம் திரும்பியுள்ளது. வெளிவிவகார, வெளிநாட்டு வேலைவாய்ப்பு மற்றும் சுற்றுலா அமைச்சர் விஜேதா ஹேரத் மற்றும் அசர்பைஜான் ஜனாதிபதி இல்ஹாம் அலியேவ் ஆகியோருக்கு இடையில் இடம்பெற்ற விசேட கலந்துரையாடலின் விளைவாக இந்த இணக்கப்பாடு எட்டப்பட்டுள்ளதாக வெளிவிவகார அமைச்சு தெரிவித்துள்ளது.
ஆசியாவில் இடைச்செயற்பாடு மற்றும் நம்பிக்கையை கட்டியெழுப்பும் நடவடிக்கைகள் தொடர்பான மாநாட்டில் (CICA) பங்கேற்பதற்காக அசர்பைஜான் சென்றிருந்தபோது, அமைச்சர் அந்நாட்டு ஜனாதிபதியை சந்தித்து இது குறித்து விளக்கமளித்துள்ளார். கணவன்-மனைவி மற்றும் மற்றுமொருவர் உட்பட இந்த மூன்று இலங்கையர்களும் எதிர்கொண்டுள்ள துரதிர்ஷ்டவசமான நிலைமையை அமைச்சர் அங்கு சுட்டிக்காட்டியுள்ளார்.
இந்த சம்பவத்திற்கு வெளிநாட்டு வேலைவாய்ப்பு கனவே முக்கிய காரணமாகும். வெளிவிவகார அமைச்சு குறிப்பிடுவதன்படி, இந்த மூவரும் அசர்பைஜானில் வசித்த ஒரு இலங்கையருக்கு, அவர் வேலைவாய்ப்பு முகவராக நடித்து அந்நாட்டில் வேலைவாய்ப்புகளை வழங்குவதாக அளித்த வாக்குறுதியின் பேரில் பெரும் தொகையை வழங்கியுள்ளனர். ஆனால் அந்த வாக்குறுதியை நம்பி அசர்பைஜான் சென்ற அவர்களுக்கு எதிர்பாராத நிலைமையே ஏற்பட்டது. பணத்தைப் பெற்றுக்கொண்ட போலி வேலைவாய்ப்பு முகவர் அவர்களை ஏமாற்றி தலைமறைவாகிவிட்டார்.
பின்னர் வேறு ஒரு நாளில் இந்த மூவரும் சம்பந்தப்பட்ட போலி வேலைவாய்ப்பு முகவரை சந்தித்தபோது, அங்கு ஏற்பட்ட இடையூறுகள் மற்றும் சூடான வாக்குவாதம் முற்றி தாக்குதலாக மாறியுள்ளது. இந்த சம்பவம் காரணமாக 2022 ஆம் ஆண்டில் அசர்பைஜான் அதிகாரிகள் இந்த மூன்று இலங்கையர்களையும் கைது செய்து சிறையில் அடைத்துள்ளனர். தற்போது அவர்களுக்கு 15 ஆண்டுகள் சிறைத்தண்டனை விதிக்கப்பட்டுள்ளதுடன், சம்பவத்திற்குப் பின்னர் சம்பந்தப்பட்ட போலி வேலைவாய்ப்பு முகவர் மீண்டும் தலைமறைவாகிவிட்டதாக வெளிவிவகார அமைச்சு தெரிவித்துள்ளது.
இங்கு மோசடிக்கு இலக்காகி சிறைத்தண்டனை அனுபவிக்க நேர்ந்த இலங்கையர்களுக்கு நிவாரணம் வழங்கி அவர்களை விடுவிக்க நடவடிக்கை எடுக்குமாறு அமைச்சர் விஜேதா ஹேரத் அசர்பைஜான் அதிகாரிகளிடம் கோரிக்கை விடுத்தார். அந்தக் கோரிக்கைக்கு சாதகமான பதிலளித்த அசர்பைஜான் அதிகாரிகள், சம்பந்தப்பட்ட வழக்கை மீண்டும் மறுபரிசீலனை செய்ய தற்போது இணக்கம் தெரிவித்துள்ளனர்.