பிக்குமார்களை சிறைச்சாலைகளில் தடுத்து வைத்தல் மற்றும் சிறைச்சாலைக்கு வெளியே அழைத்துச் செல்லுதல் தொடர்பான சட்டங்களை திருத்தி, புதிய நிரந்தர உத்தரவுகள் மற்றும் ஒழுங்குமுறைகளை முன்வைப்பதற்காக ஒரு விசேட குழு இன்று (08) நியமிக்கப்படும் என ஜனாதிபதி அநுர குமார திசாநாயக்க தெரிவித்தார்.
ஜனாதிபதி இன்று முற்பகல் ஜனாதிபதி அலுவலகத்தில் மகா சங்கத்தினருடன் இடம்பெற்ற விசேட கலந்துரையாடலில் கலந்துகொண்ட போதே இதனைத் தெரிவித்தார்.
கௌரவ கலாகொடஅத்தே ஞானசார தேரரை சீவரமின்றி சிறைச்சாலை சீருடையில் நீதிமன்றத்தில் ஆஜர்படுத்தியது தொடர்பாக மகாநாயக்க தேரர்கள் சிறைச்சாலைகள் ஆணையாளருக்கு அனுப்பிய கடிதம் மற்றும் அதன் மூலம் சமூகத்தில் ஏற்பட்ட சர்ச்சைக்குரிய நிலைமையை தணிப்பதுடன், எதிர்காலத்தில் இவ்வாறான நிலைமைகள் ஏற்படுவதைத் தடுப்பதற்கான நடவடிக்கைகள் குறித்து கலந்துரையாடுவதே இச்சந்திப்பின் பிரதான நோக்கமாக இருந்தது.
சட்டமா அதிபர், நீதி அமைச்சு, பொது நிர்வாக அமைச்சு, பௌத்த விவகார அமைச்சு, சிறைச்சாலை அதிகாரிகள் மற்றும் சிறைச்சாலைகள் ஆணையாளர் ஆகியோரின் பங்குபற்றுதலுடன் நியமிக்கப்படும் இக்குழு, இரண்டு வாரங்களுக்குள் சம்பந்தப்பட்ட விடயங்களை ஆராய்ந்து தேவையான திருத்தங்களை முன்வைக்க அறிவுறுத்தப்பட்டுள்ளது. இது ஒரு பெரிய சட்டத்துடன் முரண்படாததால், இரண்டு வார கால அவகாசம் போதுமானது என்று ஜனாதிபதி தெரிவித்தார். பிக்குமார்களுக்குப் பொருந்தும் பகுதிகள் மகா சங்கத்தினருடன் கலந்துரையாடி திருத்தப்படவுள்ளன.
தற்போது சிறைச்சாலைகள் 1877 இல் நிறைவேற்றப்பட்ட சிறைச்சாலைகள் கட்டளைச் சட்டத்தின் மூலம் நிர்வகிக்கப்படுவதாகவும், அது அவ்வப்போது திருத்தப்பட்டுள்ளதாகவும் ஜனாதிபதி சுட்டிக்காட்டினார். அந்தச் சட்டத்தின் 94வது பிரிவின் கீழ் அமைச்சருக்கு ஒழுங்குமுறைகளை இயற்றும் அதிகாரம் உள்ளதுடன், 2022 ஆம் ஆண்டிலும் ஒழுங்குமுறைகள் திருத்தப்பட்டுள்ளன. மேலும், அமைச்சரின் ஒப்புதலுக்கு உட்பட்டு, சிறைச்சாலைகள் ஆணையாளர் சிறைச்சாலைகளை தினசரி நடத்துவதற்கு நிரந்தர உத்தரவுகளை பிறப்பிக்க முடியும். அதன்படி, சிறைச்சாலை அமைப்பு சட்டம், அமைச்சர் ஒழுங்குமுறைகள் மற்றும் ஆணையாளரின் நிரந்தர உத்தரவுகள் ஆகிய மூன்றின் அடிப்படையில் நிர்வகிக்கப்படுகிறது.
இந்தச் சட்டங்களை உருவாக்கும் போது, ஒன்று அல்லது இரண்டு சந்தர்ப்பங்களைத் தவிர, பொதுவான கைதிகள் மீது மட்டுமே கவனம் செலுத்தப்பட்டுள்ளது என்றும், பிக்குமார்கள் பற்றி குறிப்பாக 216வது ஒழுங்குமுறைப் பிரிவில் மட்டுமே குறிப்பிடப்பட்டுள்ளது என்றும் ஜனாதிபதி தெரிவித்தார். பிக்குமார்கள் சிறையில் அடைக்கப்படுவார்கள் என்று எதிர்பார்க்கப்படாததால், ஒருவேளை அது குறித்து கவனம் செலுத்தப்படாமல் இருந்திருக்கலாம் என்றும், ஆனால் இன்றைய சமூகத்தில் ஏற்பட்டுள்ள சீர்குலைவுக்கு பிக்குமார்களும் ஓரளவுக்கு ஆளாகியுள்ளதால், அதற்குப் பொருத்தமான சட்டங்களை உருவாக்குவது அவசியம் என்றும் அவர் கூறினார்.
தடுத்து வைக்கப்பட்டுள்ள கைதிகளுக்கும் தண்டனை பெற்ற கைதிகளுக்கும் இடையிலான வேறுபாட்டையும் ஜனாதிபதி விளக்கினார். விளக்கமறியலில் உள்ள பிக்குமார்கள் சிறைச்சாலையில் தங்கியிருப்பதும், நீதிமன்றத்தில் ஆஜர்படுத்தப்படுவதும் சீவரத்துடனேயே ஆகும். கட்டுநாயக்கவில் போதைப்பொருள் கடத்தல் தொடர்பாக கைது செய்யப்பட்ட சில பிக்குமார்கள் அவ்வாறே விளக்கமறியலில் வைக்கப்பட்டுள்ளனர் என்பதை அவர் உதாரணமாகக் காட்டினார். ஆனால் குற்றவாளியாக அறிவிக்கப்பட்டு தண்டனை பெற்றால் நிலைமை மாறுபடும். இலகுவான வேலைகளுடன் கூடிய சிறைத்தண்டனையின் போது சிறைச்சாலை அத்தியட்சகரின் ஒப்புதலுடன் ஆடையைத் தேர்ந்தெடுக்கும் வாய்ப்பு இருந்தாலும், கடுமையான வேலைகளுடன் கூடிய சிறைத்தண்டனையின் போது சிறைச்சாலை வழங்கும் நிர்ணயிக்கப்பட்ட ஆடையை அனைவரும் அணிய வேண்டும் என்று சட்டத்தில் குறிப்பிடப்பட்டுள்ளதாக அவர் கூறினார்.
தற்போது பல்வேறு குற்றச்சாட்டுகளின் கீழ் சுமார் அறுபத்து மூன்று பிக்குமார்கள் சிறையில் அடைக்கப்பட்டுள்ளதாகவும், அவர்கள் அனைவரும் சிறைச்சாலை சீருடையில் இருப்பதாகவும் ஜனாதிபதி வெளிப்படுத்தினார்.
மகாநாயக்க தேரர்களின் கடிதத்தின்படி, சிறையில் இருக்கும் விதத்தை விட, சிறையிலிருந்து வெளியே அழைத்து வரும் சந்தர்ப்பங்களிலேயே பிரச்சினை அதிகமாக எழுந்துள்ளது என்பதை ஜனாதிபதி ஒப்புக்கொண்டார். சிறைச்சாலை ஒரு திறந்த இடம் இல்லாவிட்டாலும், வெளியே அழைத்து வரும் போது அது ஊடகங்களுக்கும் பொதுமக்களுக்கும் வெளிப்படுத்தப்படுவதால், நீதிமன்ற நடவடிக்கைகளுக்கு மட்டுமல்லாமல், சிறையிலிருந்து வெளியேறும் ஒவ்வொரு சந்தர்ப்பமும் கவனத்தில் கொள்ளப்பட வேண்டும் என்று அவர் கூறினார்.
"நேற்று நாம் வணங்கிய ஒரு தேரரை இன்று வேறு விதமாகப் பார்க்கும்போது, அது ஒவ்வொரு பௌத்தனின் இதயத்திலும் ஒரு அதிர்ச்சியை ஏற்படுத்துகிறது. ஆனால் இதுதான் நடந்த செயல்முறை," என்று ஜனாதிபதி குறிப்பிட்டார்.
சட்டங்கள் நிரந்தரமாக மாறாமல் இருக்கும் விஷயங்கள் அல்ல என்றும், புதிய சட்டங்கள் தொடர்ந்து உருவாக்கப்படுகின்றன என்றும், தற்போதுள்ள சட்டங்கள் மீண்டும் மீண்டும் திருத்தப்படுகின்றன என்றும் ஜனாதிபதி கூறினார்.
"சாதாரண அரசியலில், சட்டம் என்பது ஆட்சியாளரின் விருப்பம் என்று கூறப்படுகிறது. நான் ஒருபோதும் சட்டத்தை என் விருப்பமாக மாற்ற விரும்பவில்லை. சட்டம் என் விருப்பமாக மாறினால், நான் விரும்புவதையும் விரும்பாததையும் பொறுத்தே சட்டம் விளக்கப்படும். அது பொருத்தமானதல்ல," என்று ஜனாதிபதி வலியுறுத்தினார்.
சட்டம் இருக்கும் பின்னணியில், ஒரு பிக்குவை இலக்காகக் கொண்டு ஒரு விதமாகவும், மற்ற பிக்குமார்களை வேறு விதமாகவும் நடத்த உத்தரவிடுவது பொருத்தமற்றது என்றும், சட்டம் தற்போதைய சூழ்நிலைக்குப் பொருந்தவில்லை என்றால், அதை முறையாகத் திருத்துவதே செய்ய வேண்டியது என்றும் அவர் மேலும் குறிப்பிட்டார்.
இந்தக் கலந்துரையாடலின் போது, தற்போதுள்ள சட்டங்களில் உள்ள வேறு சில காலாவதியான விடயங்களும் வெளிவந்ததாக ஜனாதிபதி தெரிவித்தார். விடுதலை செய்யப்பட்டு சிறையிலிருந்து வெளியேறும் கைதிகளுக்கு வழங்கப்படும் "விடுதலை ஆடை" 1947 இல் வரையறுக்கப்பட்ட ஐரோப்பிய, சிங்கள, தமிழ் மற்றும் முஸ்லிம் வடிவங்களின்படி இன்னும் உள்ளது என்றும், அத்தகைய ஆடைகளை தற்போது யாரும் அணிவதில்லை என்றும் அவர் சுட்டிக்காட்டினார். அதன்படி, பிக்குமார்கள் தொடர்பான விடயங்கள் மட்டுமல்லாமல், பொதுவாக சிறைச்சாலை ஒழுங்குமுறைகள் மற்றும் பல நிரந்தர உத்தரவுகளை தற்போதைய சூழ்நிலைக்கு ஏற்ப மாற்ற வேண்டியது அவசியம் என்று ஜனாதிபதி வலியுறுத்தினார்.
நீதி அமைச்சர் மற்றும் புத்தசாசன அமைச்சர் ஆகியோருடன் கலந்துரையாடி இந்த முடிவு எட்டப்பட்டதாகவும் ஜனாதிபதி குறிப்பிட்டார்.
ஜனாதிபதியின் அறிக்கை வீடியோ இங்கு வெளியிடப்பட்டுள்ளது
