பிரித்தானியாவில் இருந்து பதிவாகும் அதிர்ச்சியூட்டும் மரணங்கள், தங்கள் தாயின் மரணம் நிகழ்ந்த அதே இடத்தில் தற்கொலை செய்துகொண்ட மூன்று மகள்களைப் பற்றி கூறுகின்றன. 16 ஆண்டுகளுக்கு முன்பு தங்கள் தாய் தற்கொலை செய்துகொண்ட இடத்திற்குச் சென்று திரும்பிய மூன்று சகோதரிகள், பிரைட்டன் கடற்கரையில் தற்கொலை ஒப்பந்தத்தின்படி கடலில் மூழ்கி இறந்துள்ளனர் என்பதை மரண விசாரணை வெளிப்படுத்தியுள்ளது.
கடந்த மே 13 அன்று கடலில் இருந்து மீட்கப்பட்டவை 36 வயதுடைய ஜேன் அடெட்டோரோ, 32 வயதுடைய கிறிஸ்டினா வால்டர்ஸ் மற்றும் 31 வயதுடைய ரெபேக்கா வால்டர்ஸ் ஆகிய மூன்று சகோதரிகளின் சடலங்கள் ஆகும்.அதிகாலை 5.45 மணியளவில் பொலிஸாருக்கும் கடலோரக் காவல்படைக்கும் இது குறித்து அறிவிக்கப்பட்டிருந்தது, அவர்கள் சம்பவ இடத்திற்கு வந்தபோது இந்த மூவரும் ஏற்கனவே இறந்துவிட்டதாக அதிகாரிகள் உறுதிப்படுத்தினர். வூட்வேல் மரண விசாரணை நீதிமன்றத்தில் நடைபெற்ற விசாரணையில் தெரியவந்தது என்னவென்றால், இந்த துயரச் சம்பவம் நடப்பதற்கு 48 மணி நேரத்திற்கும் குறைவான நேரத்திற்கு முன்பு அவர்கள் மேற்கு லண்டனின் அக்ஸ்பிரிட்ஜில் உள்ள தங்கள் வீட்டிலிருந்து பர்மிங்காமில் உள்ள எர்டிங்டனுக்குப் பயணம் செய்துள்ளனர். 2010 ஆம் ஆண்டில் தங்கள் தாய் மூழ்கி இறந்த ப்ரூக்வேல் பார்க் ஏரிக்கு அருகில் ஒரு வாகனத்தில் ஏறுவதற்கு முன்பு, அவர்கள் தங்கள் தாயின் பழைய வீட்டிற்குச் சென்றது சிசிடிவி காட்சிகளால் உறுதிப்படுத்தப்பட்டுள்ளது. மேலும் அவர்கள் தங்கள் தாயின் கல்லறைக்குச் சென்றிருக்கலாம் என்றும் மரண விசாரணையில் மேலும் ஊகிக்கப்பட்டது. பர்மிங்காமில் சுமார் 90 நிமிடங்கள் குறுகிய நேரம் செலவழித்த பிறகு, மே 12 அன்று அதிகாலையில் ஒரு வாடகை வண்டியில் மீண்டும் லண்டனுக்கு வந்து, அன்றைய தினம் மாலையில் பிரைட்டனுக்குப் புறப்பட்டுள்ளனர்.
அதிகாலை 2.42 மணியளவில் மூன்று பேர் கடற்கரையை நோக்கிச் செல்வது காட்சிகளில் பதிவாகியிருந்தது, பிரேதப் பரிசோதனையில் அவர்கள் மூவரும் நீரில் மூழ்கி இறந்துள்ளனர் என்பதும், அப்போது எந்த போதைப்பொருளோ அல்லது மதுபானமோ பயன்படுத்தப்படவில்லை என்பதும் உறுதிப்படுத்தப்பட்டது. அவர்களின் தந்தை ஜோசப் ஜேக்கப்சன் மரண விசாரணையில் தெரிவித்ததாவது, தனது மகள்களின் இழப்பு தனது இதயத்தில் எதனாலும் நிரப்ப முடியாத ஒரு வெற்றிடத்தை ஏற்படுத்தியுள்ளது. இறப்பதற்கு முன் இந்த மூன்று சகோதரிகளும் அனைத்து கடன்களையும் அடைத்து, வங்கிக் கணக்குகளை மூடி, அவர்கள் வசித்த வீட்டையும் முழுமையாக காலி செய்திருந்தனர் என்பதும் விசாரணைகளில் மேலும் தெரியவந்தது.
