2026 இருபதுக்கு - 20 உலகக் கிண்ணப் போட்டியில் பங்கேற்பது தொடர்பில் பங்களாதேஷ் அணி தற்போது கடுமையான நெருக்கடி நிலையை எதிர்கொண்டுள்ளது. இந்தியாவில் நடைபெறவிருந்த தமது அணியின் போட்டிகளை வேறு நாட்டிற்கு மாற்றுமாறு பங்களாதேஷ் விடுத்த கோரிக்கையை சர்வதேச கிரிக்கெட் சபை (ICC) நிராகரித்துள்ளதுடன், பாகிஸ்தான் கிரிக்கெட் சபையின் (PCB) கடைசி நேர ஆதரவு கூட ICC அதிகாரிகளின் முடிவை மாற்றியமைக்க முடியவில்லை.
புதன்கிழமை (ஜனவரி 21) இது தொடர்பாக முடிவெடுப்பதற்காக நடைபெற்ற ICC அவசர சபைக் கூட்டத்தில், 16 உறுப்பினர்களில் 14 பேர் பங்களாதேஷின் கோரிக்கைக்கு எதிராக வாக்களித்துள்ளனர். பங்களாதேஷ் மற்றும் பாகிஸ்தான் மட்டுமே அதற்கு ஆதரவாக இருந்தன. இந்த மெய்நிகர் (virtual) கலந்துரையாடலுக்குப் பிறகு, தமது போட்டிகளை இந்தியாவிற்கு வெளியே நடத்துமாறு தொடர்ந்து வலியுறுத்தி வந்த பங்களாதேஷ் கிரிக்கெட் வாரியத்திற்கு (BCB) ICC இறுதி அறிவிப்பை வெளியிட்டுள்ளது.
பெப்ரவரி 7 முதல் மார்ச் 8 வரை நடைபெறவுள்ள இந்த உலகக் கிண்ணப் போட்டிக்காக இந்தியாவுக்குச் செல்லத் தயாரா என்பதைத் தீர்மானிக்க பங்களாதேஷ் கிரிக்கெட் வாரியத்திற்கு 24 மணிநேரம் வழங்கப்பட்டுள்ளது. அவ்வாறு செய்யாவிட்டால், அவர்களுக்குப் பதிலாக வேறு நாட்டை நியமிக்க ICC தீர்மானித்துள்ளது. அடுத்த சில மணிநேரங்களில் BCB அதிகாரிகள் இது தொடர்பாக இறுதி முடிவெடுப்பதற்காக அந்நாட்டு அரசாங்கத்தின் ஆலோசனையைப் பெறவுள்ளனர். பங்களாதேஷ் போட்டியிலிருந்து விலகினால், 'C' பிரிவில் உள்ள அந்த வெற்றிடத்தை ஸ்கொட்லாந்து அணி நிரப்ப வாய்ப்புள்ளது எனத் தெரிவிக்கப்படுகிறது.
BCB இன் கோரிக்கைக்கு ஆதரவாக பாகிஸ்தான் கடிதம் அனுப்பியிருந்தாலும், இந்தியாவில் பங்களாதேஷ் வீரர்கள், அதிகாரிகள் அல்லது ஊடகவியலாளர்களுக்கு எந்தவித பாதுகாப்பு அச்சுறுத்தலும் இல்லை என்பதை சுயாதீன பாதுகாப்பு மதிப்பீடுகள் உறுதிப்படுத்தியுள்ளதாக ICC வலியுறுத்தியுள்ளது. இதனால் போட்டிகளை இலங்கைக்கு மாற்றுவதற்கு எந்த நியாயமான காரணமும் இல்லை என்று சுட்டிக்காட்டப்பட்டுள்ளதுடன், இலங்கையில் விளையாடவிருந்த அயர்லாந்து அணியுடன் பிரிவுகளை மாற்றிக்கொள்ள பங்களாதேஷ் கொண்டுவந்த யோசனையும் நிராகரிக்கப்பட்டுள்ளது.
போட்டி அட்டவணைப்படி, பங்களாதேஷ் அணி மேற்கிந்தியத் தீவுகள், இத்தாலி மற்றும் இங்கிலாந்து அணிகளுடன் மூன்று ஆரம்பச் சுற்றுப் போட்டிகளை பெப்ரவரி 7, 9 மற்றும் 14 ஆம் திகதிகளில் கொல்கத்தாவில் விளையாடவுள்ளது. அதன் பின்னர், அவர்களின் இறுதி ஆரம்பச் சுற்றுப் போட்டி நேபாளத்திற்கு எதிராக பெப்ரவரி 17 ஆம் திகதி மும்பையின் வான்கடே மைதானத்தில் நடைபெற திட்டமிடப்பட்டுள்ளது.
சுயாதீன பாதுகாப்பு ஆய்வுகள் உட்பட அனைத்து அறிக்கைகளையும் பரிசீலித்த பின்னரே இந்த முடிவு எடுக்கப்பட்டதாகவும், போட்டி நடைபெறும் எந்த இடத்திலும் பங்களாதேஷ் அணிக்கு அச்சுறுத்தல் இல்லை என்றும் ICC வெளியிட்ட அறிக்கையில் தெரிவிக்கப்பட்டுள்ளது. முஸ்தபிசுர் ரஹ்மானை IPL போட்டியிலிருந்து நீக்கியதற்கும் பாதுகாப்பு அச்சுறுத்தல்களுக்கும் இடையே தொடர்பு இருப்பதாக பங்களாதேஷ் முன்வைத்த வாதத்தை ICC பேச்சாளர் கடுமையாக மறுத்துள்ளார். இது ஒரு தனிப்பட்ட சம்பவம் என்றும், உலகக் கிண்ணப் போட்டியின் பாதுகாப்பு ஏற்பாடுகளுடன் தொடர்புடையது அல்ல என்றும் அவர் வலியுறுத்தியுள்ளார்.