இலங்கை மின்சார சபை இந்த ஆண்டின் இரண்டாம் காலாண்டிற்கான மின் கட்டணத்தை 13.56 சதவீதம் அதிகரிக்க முன்மொழிந்துள்ள நிலையில், அரசாங்கம் செயல்படுத்த எதிர்பார்க்கும் மூன்று வருட நீண்டகால திட்டத்தின் மூலம் மின் கட்டணங்கள் குறைக்கப்படும் என்றும், இத்தகைய விலை உயர்வுகள்தற்காலிகமானவை என்றும் நிதி இராஜாங்க அமைச்சர் அனில் ஜயந்த பெர்னாண்டோ தெரிவித்துள்ளார். மின் உற்பத்திச் செலவை ஈடுசெய்வதற்கான ஒரு பொறிமுறைக்கு அமைய இந்தக் கட்டணங்கள் தீர்மானிக்கப்படும் என்றும், குறைந்த வருமானம் கொண்ட குடும்பங்கள் மற்றும் மத வழிபாட்டுத் தலங்கள் போன்ற சிறப்பு வகைகளுக்கு உற்பத்திச் செலவை விடக் குறைவான சலுகை முறையை அரசாங்கம் அறிமுகப்படுத்தியுள்ளதாகவும் இராஜாங்க அமைச்சர் மேலும் சுட்டிக்காட்டியுள்ளார்.
இலங்கை பொதுப் பயன்பாடுகள் ஆணைக்குழுவுக்கு இலங்கை மின்சார சபையின் பொது முகாமையாளர் பொறியியலாளர் கே.எஸ்.ஐ. குமாரவின் கையொப்பத்துடன் சமர்ப்பிக்கப்பட்டுள்ள இந்த புதிய யோசனைக்கு அமைய, எதிர்வரும் ஏப்ரல் 01 ஆம் திகதி முதல் ஜூன் 30 ஆம் திகதி வரையான காலப்பகுதிக்கான கட்டண திருத்தங்கள் கோரப்பட்டுள்ளன. இலங்கை மின்சார சபையை மறுசீரமைக்கும் போது, தானாக முன்வந்து ஓய்வுபெறும் ஊழியர்களுக்கு சுமார் 150 கோடி ரூபாய் பணிக்கொடை வழங்க வேண்டியுள்ளது இதற்கு ஒரு முக்கிய காரணமாகும். மேலும், ரந்தெணிகல, விக்டோரியா மற்றும் சமனல ஆகிய முக்கிய நீர்மின் நிலையங்களில் பராமரிப்புப் பணிகள் காரணமாக பல வாரங்களுக்கு அவற்றின் செயல்பாடுகளை நிறுத்த வேண்டியிருப்பதால், அந்தக் காலப்பகுதியில் அதிக செலவில் எரிபொருள் மின் நிலையங்களில் இருந்து மின்சாரம் கொள்வனவு செய்ய வேண்டியிருப்பதும், மின் பரிமாற்றச் செலவுகள் அதிகரிப்பதும் இந்தக் கட்டண உயர்வுக்குப் பங்களித்த மற்ற காரணிகளாகும்.
புதிய யோசனைக்கு அமைய, ஒரு மின் அலகின் விலை கணிசமாக அதிகரிக்கும். அதன்படி, 0-30 அலகுகள் பிரிவுக்கு தற்போது அறவிடப்படும் 4.50 ரூபாய் 5.11 ரூபாயாகவும், 31-60 அலகுகள் பிரிவுக்கு 8.00 ரூபாயாக உள்ள கட்டணம் 9.08 ரூபாயாகவும் அதிகரிக்கப்படவுள்ளது. 61-90 அலகுகளுக்கு இடையிலான பயன்பாட்டிற்கான ஒரு அலகின் விலை 18.50 ரூபாயிலிருந்து 21.01 ரூபாயாகவும், 91-120 அலகுகளுக்கு இடையிலான பயன்பாட்டிற்கான 24 ரூபாய் கட்டணம் 27.25 ரூபாயாகவும் அதிகரிக்க முன்மொழியப்பட்டுள்ளது. மேலும், 121-180 அலகுகள் பிரிவுக்கு 41 ரூபாயிலிருந்து 46.56 ரூபாயாகவும், 181 அலகுகளுக்கு மேற்பட்ட பிரிவுக்கு 61 ரூபாயிலிருந்து 69.27 ரூபாயாகவும் ஒரு அலகின் விலையை அதிகரிக்க மின்சார சபை கோரியுள்ளது.
நுகரப்படும் அலகுகளின் எண்ணிக்கைக்கு மேலதிகமாக, நுகர்வோரிடமிருந்து அறவிடப்படும் மாதாந்த நிலையான கட்டணமும் இந்த யோசனை மூலம் அதிகரிக்க திட்டமிடப்பட்டுள்ளது. 0-30 அலகுகள் பிரிவின் நுகர்வோருக்கான 80 ரூபாயாக இருந்த நிலையான கட்டணம் 90.85 ரூபாயாகவும், 31-60 அலகுகள் பிரிவுக்கு 210 ரூபாயிலிருந்து 238.48 ரூபாயாகவும் அதிகரிக்கப்படும். 61-90 அலகுகள் பிரிவுக்கு அது 400 ரூபாயிலிருந்து 454.24 ரூபாயாக அதிகரிக்கப்படவுள்ளதுடன், 91-120 அலகுகள் பிரிவுக்கு 1,000 ரூபாயாக இருந்த நிலையான கட்டணம் 1135.60 ரூபாயாக அதிகரிக்கும். 121-180 அலகுகளுக்கு இடையிலான பிரிவுக்கு 1500 ரூபாய்க்கு பதிலாக 1703.40 ரூபாயாகவும், 181 அலகுகளுக்கு மேற்பட்ட பிரிவுக்கு 2100 ரூபாய்க்கு பதிலாக 2384.76 ரூபாயாகவும் நிலையான கட்டணங்களைத் திருத்த முன்மொழியப்பட்டுள்ளது.
இந்தக் கட்டண உயர்வுகளுக்கான யோசனை குறித்து கருத்துத் தெரிவித்த பொதுப் பயன்பாடுகள் ஆணைக்குழுவின் உயர் அதிகாரி ஒருவர், ஆணைக்குழுச் சட்டத்திற்கு அமைய இந்தக் விடயங்கள் விரிவாகக் கருத்தில் கொள்ளப்படும் என்று குறிப்பிட்டுள்ளார். அதன்படி, மின் கட்டணத் திருத்தம் தொடர்பான இறுதித் தீர்மானம் எதிர்வரும் மார்ச் மாதத்தின் இறுதி வாரத்தில் அறிவிக்கப்படவுள்ளது. இதற்கு முன்னர், இந்த ஆண்டின் முதல் காலாண்டிற்கான மின் கட்டணத்தை அதிகரிக்க இலங்கை மின்சார சபை சமர்ப்பித்த யோசனையும் தொழில்நுட்ப சிக்கல்களின் அடிப்படையில் பொதுப் பயன்பாடுகள் ஆணைக்குழுவால் நிராகரிக்கப்பட்டது.