குழந்தை துஷ்பிரயோக குற்றச்சாட்டுகளில் குற்றவாளியாக அறிவிக்கப்பட்ட பின்னரும் கூட, ஜெஃப்ரி எப்ஸ்டைனுடன் உலக கோடீஸ்வரர்களான எலான் மஸ்க் மற்றும் மார்க் சக்கர்பெர்க் இரவு விருந்தில் கலந்துகொண்ட புகைப்படம் தற்போது வெளிவந்துள்ளது. அமெரிக்க நீதித்துறையால் வெளியிடப்பட்ட சமீபத்திய கோப்புகளுக்கு மத்தியில் கண்டறியப்பட்ட இந்தப் புகைப்படம், 2015 ஆகஸ்ட் 02 அன்று நடைபெற்ற இந்த ஆடம்பர விருந்தில் பேஸ்புக் நிறுவனர் மற்றும் மஸ்க் ஒரே மேசையில் அமர்ந்திருந்தனர் என்பதை உறுதிப்படுத்துகிறது.
எப்ஸ்டைன் பீட்டர் அட்டியா மற்றும் டாம் பிரிட்ஸ்கர் ஆகியோருக்கு அனுப்பிய மின்னஞ்சல் செய்திகள் மூலம் இந்த சந்திப்பு குறித்து பெருமை பேசியுள்ளார், மேலும் பேபால் (PayPal) இணை நிறுவனர் பீட்டர் தீல் மற்றும் லிங்க்ட்இன் (LinkedIn) இணை நிறுவனர் ரீட் ஹாஃப்மேன் ஆகியோரும் இதில் கலந்துகொண்டதாகக் குறிப்பிடப்பட்டுள்ளது.குழந்தை துஷ்பிரயோக குற்றங்களில் குற்றவாளியாக இருந்தபோதிலும் கூட, எப்ஸ்டைன் இதுபோன்ற உயர்மட்ட வணிகர்களுடன் பழகி அதைப் பற்றி தனிப்பட்ட முறையில் மகிழ்ச்சியடைந்திருக்கிறார் என்பது இந்த வெளிப்பாட்டின் மூலம் புலப்படுகிறது. எப்ஸ்டைன் அனுப்பிய ஒரு செய்தியில் இந்த சந்திப்பு "மிகவும் விசேஷமானது" (wild) என்று குறிப்பிடப்பட்டிருந்தது, மேலும் வனிட்டி ஃபேர் (Vanity Fair) பத்திரிகை 2019 இல் தெரிவித்தபடி, இந்த விருந்தை லிங்க்ட்இன் இணை நிறுவனர் ரீட் ஹாஃப்மேன் ஏற்பாடு செய்திருந்தார். தகவல்களின்படி, கலிபோர்னியாவின் பாலோ ஆல்டோவில் நடைபெற்ற இந்த சந்திப்பு எம்.ஐ.டி (MIT) நரம்பியல் விஞ்ஞானி எட் பாய்டன் என்பவருக்காக நடத்தப்பட்டது.
இந்த சம்பவம் குறித்து கருத்து தெரிவித்த மெட்டா (Meta) நிறுவனத்தின் செய்தித் தொடர்பாளர் ஒருவர், சம்பந்தப்பட்ட விருந்து எப்ஸ்டைனால் ஏற்பாடு செய்யப்படவில்லை என்றும், அங்கு சக்கர்பெர்க் அவரை தற்செயலாகவே சந்தித்தார் என்றும், அதன் பிறகு அவர்கள் ஒருபோதும் சந்திக்கவில்லை என்றும் கூறியுள்ளார். மேலும், இந்த சந்திப்பில் தான் சக்கர்பெர்க்கை எப்ஸ்டைனுக்கு அறிமுகப்படுத்தியதாகக் கூறப்படும் குற்றச்சாட்டுகளை எலான் மஸ்க் மறுத்து, எப்ஸ்டைன் ஒரு விரும்பத்தகாத நபர் என்றும், அவர் ஏற்பாடு செய்த எந்தவொரு விருந்திலும் தான் கலந்துகொள்ளவில்லை என்றும் வலியுறுத்தியுள்ளார். ரீட் ஹாஃப்மேனும் எப்ஸ்டைனுடன் பழகியதற்காக வருத்தம் தெரிவித்துள்ளார், புதிய வெளிப்பாடுகளுடன் மஸ்க் மற்றும் ஹாஃப்மேன் இடையே வார்த்தைப் போர்களும் பரிமாறப்பட்டுள்ளன.
