இத்தாலியின் மிலான் நகரில் உள்ள கோர்சிகோ பகுதியில் அமைந்துள்ள "நவிலியோ கிராண்டே" கால்வாயில் மிதந்து கொண்டிருந்த இலங்கை பிரஜை ஒருவரின் சடலத்தை அந்நாட்டு பாதுகாப்புப் படையினர் கண்டுபிடித்துள்ளனர். இவ்வாறு துரதிர்ஷ்டவசமாக உயிரிழந்தவர் 38 வயதுடைய ஷான் ஹேமால் கோமிஸ் முஹந்திரம்கே என்ற இலங்கை பிரஜை ஆவார்.
கடந்த ஜூன் 16ஆம் திகதி செவ்வாய்க்கிழமை பிற்பகல் மிலான் மாகாண தீயணைப்புப் படையின் நீச்சல் குழுவினரால் இந்த சடலம் தண்ணீரிலிருந்து மீட்கப்பட்டதாக இத்தாலிய ஊடகங்கள் தெரிவிக்கின்றன.உயிரிழந்த இந்த இலங்கை பிரஜை கடந்த திங்கட்கிழமை வேலைக்குச் செல்வதற்காக வீட்டிலிருந்து புறப்பட்டுள்ளார், அதன் பின்னர் அவரைப் பற்றிய எந்த தகவலும் கிடைக்கவில்லை. அவர் மீண்டும் வீட்டிற்கு வராததால், அவரது துணைவியார் அன்றைய தினமே பொலிஸில் முறைப்பாடு செய்திருந்தமை தெரியவந்துள்ளது. காணாமல் போன இந்த நபரின் சடலம் மறுநாள் கால்வாயில் அடித்துச் செல்லப்படுவதை முதலில் கண்டவர்கள் அந்தப் பகுதியால் சென்ற பயணிகள் ஆவர்.
கோர்சிகோவில் அமைந்துள்ள "முசிகா" சைக்கிள் மற்றும் பாதசாரி பாலத்தைக் கடந்து, "வியா அல்சய்யா ட்ரைஸ்டே" என்ற இடத்திற்கு அருகில் இந்த சடலம் மிதந்து கொண்டிருந்த நிலையில் கண்டுபிடிக்கப்பட்டுள்ளது. சம்பவம் தொடர்பான தகவல் கிடைத்தவுடன், 118 அவசர மருத்துவ சேவை ஆம்புலன்ஸ்கள், உள்ளூர் பொலிஸார் மற்றும் கராபினியரி பாதுகாப்புப் படையினர் சம்பவ இடத்திற்கு வந்து விசாரணைகளை ஆரம்பித்துள்ளனர். பாதுகாப்புப் படையினரின் ஆரம்ப முடிவுகளின்படி, சடலம் கண்டுபிடிக்கப்படுவதற்கு முன்னர் பல மணிநேரம் தண்ணீரில் இருந்திருக்கலாம் என்று நம்பப்படுகிறது.
உயிரிழந்தவரின் உடலில் வெளிப்படையாக எந்த வன்முறை அடையாளங்களும் இதுவரை கண்டறியப்படவில்லை என்றாலும், மரணத்திற்கான காரணம் இன்னும் உறுதியாகத் தெரியவில்லை. இது ஒரு தற்செயலான விபத்தினால் கால்வாயில் விழுந்ததா, திடீர் நோய் நிலைமையா, தற்கொலையா அல்லது ஏதேனும் குற்றச் செயலா என்பது குறித்து அந்நாட்டு பொலிஸார் விரிவான விசாரணைகளை மேற்கொண்டு வருகின்றனர். மரணத்திற்கான சரியான காரணத்தை உறுதிப்படுத்த தடயவியல் மருத்துவ அதிகாரியின் பரிசோதனைகள் மற்றும் பிரேத பரிசோதனை அறிக்கை முக்கியத்துவம் வாய்ந்ததாக இருக்கும்.
இந்த நபர் கோர்சிகோ பகுதிக்கு மேலே அமைந்துள்ள ட்ரெசானோ சுல் நவிலியோ அல்லது அபியாடென்சே போன்ற ஒரு பகுதியில் தண்ணீரில் விழுந்து, பின்னர் நீரோட்டத்தில் சிக்கி இங்கு அடித்து வரப்பட்டிருக்கலாம் என்று விசாரணையாளர்கள் சந்தேகிக்கின்றனர். கால்வாயின் சில இடங்களில் உள்ள பாதுகாப்பு வேலிகள் மிகவும் தாழ்வாக இருப்பதால், உடலைக் குளிர்விக்க அல்லது குளிக்க முயன்றபோது அவர் எதிர்பாராதவிதமாக கால்வாயில் விழுந்திருக்கலாம் என்றும் ஊகிக்கப்படுகிறது. இருப்பினும், இந்த அனைத்து விடயங்களும் அடுத்த பொலிஸ் விசாரணைகள் மூலம் உறுதிப்படுத்தப்படவுள்ளன.
