அரசாங்கத்தின் சில அமைச்சர்கள் மதத் தலைவர்களை இலக்கு வைத்து, அவர்களை இழிவுபடுத்தும் வகையில் வெளியிடும் பல்வேறு அறிக்கைகளை தாம் கடுமையாக கண்டிப்பதாக கொழும்பு பேராயர் கர்தினால் மல்கம் ரஞ்சித் ஆண்டகை வலியுறுத்தினார். சுதந்திர தினத்தை முன்னிட்டு நேற்று பொரளை அனைத்து புனிதர்கள் தேவாலயத்தில் நடைபெற்ற கத்தோலிக்க மத வழிபாடுகளில் கலந்துகொண்ட பேராயர் இந்த கருத்துக்களை வெளியிட்டார்.
இலங்கை பௌத்த தத்துவத்தால் ஈர்க்கப்பட்ட நீண்ட மத வரலாற்றையும் பின்னணியையும் கொண்ட நாடு என்பதால், நாட்டின் ஆட்சியாளர்கள் அந்த மத இருப்பிற்கு உரிய மரியாதை அளிக்க வேண்டும் என்று கர்தினால் சுட்டிக்காட்டினார். ஆனால், தற்போது நாட்டை ஆளும் சில நபர்கள் அண்மைக் காலமாக மகா சங்கத்தினர் உட்பட மதத் தலைவர்களை நடத்தும் விதமும், நாட்டின் பொதுப் பிரச்சினைகளின் போது மதத் தலைவர்களுக்கு குரல் கொடுக்க உரிமை இல்லாதது போல செயல்படுவதும் வருந்தத்தக்க நிலைமை என்றும் அவர் குறிப்பிட்டார்.
அரசியலமைப்புச் சட்டத்தின் மூலம் நாட்டின் மத இருப்பிற்கு முன்னுரிமை அளிக்கப்பட்டிருந்தாலும், அரசியல்மயமாக்கப்பட்ட கல்வி முறைகள் மூலம் சுயநலமான மற்றும் வளர்ச்சியடையாத கலாச்சாரத்தின் ஊடாக நாட்டைப் பிளவுபடுத்தும் ஒரு பின்னணி உருவாக்கப்பட்டுள்ளது என்று பேராயர் நினைவுபடுத்தினார். நாட்டின் கலாச்சாரத்திற்கும் நாகரிகத்திற்கும் பொருந்தாத சிந்தனைகளால் நாட்டை ஆள முயற்சிக்கக்கூடாது என்றும், மத சிந்தனையை நாட்டின் முன்னேற்றத்தின் அளவுகோலாகக் கொண்டு செயல்படுவதன் மூலம் எதிர்காலத்தில் இதைவிட சிறந்த நாட்டை உருவாக்க முடியும் என்றும் கர்தினால் மல்கம் ரஞ்சித் ஆண்டகை மேலும் தெரிவித்தார்.