பிரபலமான தொலைக்காட்சி நாடக மற்றும் திரைப்பட நடிகர் விராஜ் தனுஷ விதானகே கொக்கெய்ன் போதைப்பொருளை வைத்திருந்தபோது மத்தேகொட பொலிஸாரால் கைது செய்யப்பட்டுள்ளார். பிலியந்தலை நகருக்கு அருகிலுள்ள ஒரு வாடகை அறையில் தங்கியிருந்தபோது மேற்கொள்ளப்பட்ட திடீர் சோதனையின்போது இந்த கைது இடம்பெற்றுள்ளதுடன், அவரிடமிருந்து 10 மில்லிகிராம் கொக்கெய்ன் போதைப்பொருள் பொலிஸ் பொறுப்பில் எடுக்கப்பட்டுள்ளது.
இவ்வாறு பொலிஸாரால் கைது செய்யப்பட்டுள்ள 26 வயதுடைய இந்த சந்தேகநபர் அனுராதபுரம் பிரதேசத்தைச் சேர்ந்தவர். 2017 ஆம் ஆண்டு வெளியான 'ஏ லெவல்' திரைப்படத்தின் மூலம் கலைத்துறைக்கு அறிமுகமான இவர், 'நாடகம்காரயோ' தொலைக்காட்சி நாடகத்தில் நடித்த 'சுத்தா' என்ற கதாபாத்திரத்தின் மூலம் பார்வையாளர்கள் மத்தியில் மிகவும் பிரபலமானார். அத்துடன், ஜோரா, லியா, பாட்ட குருல்லோ மற்றும் பேக்கரி கெதர போன்ற பல தொலைக்காட்சி படைப்புகளுக்கு தனது நடிப்பு பங்களிப்பை வழங்கியுள்ள இந்த நடிகருடன் மேலும் சில சந்தேகநபர்களும் குறித்த சுற்றிவளைப்பின்போது கைது செய்யப்பட்டுள்ளதாக தெரிவிக்கப்படுகிறது.
கல்கிசை பிரிவுக்குப் பொறுப்பான சிரேஷ்ட பொலிஸ் அத்தியட்சகர் அசோக குணசேகரவின் நேரடி உத்தரவின் பேரிலும் உதவிப் பொலிஸ் அத்தியட்சகர் எம். டி. டி. நிலங்கவின் வழிகாட்டலின் கீழும் மத்தேகொட பொலிஸ் நிலைய பொறுப்பதிகாரி பொலிஸ் பரிசோதகர் இந்திக குமார உள்ளிட்ட அதிகாரிகள் குழுவினால் இந்த போதைப்பொருள் சுற்றிவளைப்பு மேற்கொள்ளப்பட்டுள்ளது. கைது செய்யப்பட்ட சந்தேகநபரான நடிகர் உள்ளிட்டோர் மேலதிக சட்ட நடவடிக்கைக்காக கெஸ்பேவ நீதவான் நீதிமன்றத்தில் ஆஜர்படுத்தப்படவுள்ளனர்.
