எட்டப்பட்ட முன்னேற்றம் குறித்து இலங்கை அரசாங்கத்திற்கும் மக்களுக்கும் எனது வாழ்த்துக்கள் - சர்வதேச நாணய நிதியத்தின் தலைவர் கிறிஸ்டலினா

சர்வதேச நாணய நிதியத்தின் (IMF) முகாமைத்துவப் பணிப்பாளர் கலாநிதி கிறிஸ்டலினா ஜோர்ஜியேவா (Kristalina Georgieva) தனது முதல் உத்தியோகபூர்வ விஜயமாக இலங்கைக்கு வருகை தந்துள்ளார். 'தித்வா' (Ditwa) சூறாவளி போன்ற காலநிலை நிலைமைகளால் பொருளாதாரத்திற்கு ஏற்பட்ட கடுமையான பாதிப்புகளுக்குப் பிறகு, இலங்கை பொருளாதாரம் மீட்சியின் பாதையில் ஒரு முக்கியமான திருப்புமுனையில் இருக்கும்போது, இலங்கை IMF ஆதரவு சீர்திருத்தத் திட்டத்தை தொடர்ந்து முன்னெடுத்துச் செல்லும் அதேவேளையில், அடைந்துள்ள முன்னேற்றம் மற்றும் எதிர்கால அபாயங்கள் குறித்து டெரன தொலைக்காட்சி அவருடன் நடத்திய நேர்காணல் கீழே கொடுக்கப்பட்டுள்ளது.

அறிவிப்பாளர்: கலாநிதி ஜோர்ஜியேவா, இது உங்களது இலங்கைக்கு முதல் விஜயம். எமது பொருளாதாரம் மீட்சியின் பாதையில் முன்னேறிச் செல்வதைப் பொறுத்தவரை, குறியீட்டு ரீதியாகவும் நடைமுறை ரீதியாகவும் இது உங்களுக்கும் இலங்கையில் எங்களுக்கும் என்ன அர்த்தத்தை தருகிறது என்பதை நான் அறிய விரும்புகிறேன். மேலும், IMF திட்டம் தொடங்கியதிலிருந்து நாம் அடைந்த மிக முக்கியமான மற்றும் குறிப்பிடத்தக்க சாதனைகளாக நீங்கள் எவற்றைக் குறிப்பிடுவீர்கள்?

கலாநிதி ஜோர்ஜியேவா: பொருளாதாரம் வீழ்ச்சியடையும் நிலையில் இருந்ததிலிருந்து இன்றுவரை நாடு மிகப்பெரிய முன்னேற்றத்தை அடைந்துள்ளதால், நான் இங்கு வந்ததில் மிகவும் மகிழ்ச்சியடைகிறேன். நீங்கள் அடைந்துள்ள முன்னேற்றத்திற்காக இலங்கை அரசாங்கத்திற்கும் மக்களுக்கும் எனது வாழ்த்துக்களைத் தெரிவித்துக் கொள்கிறேன்.

ஆனால் நாட்டின் சில பகுதிகளை அழித்த சூறாவளிக்குப் பிறகு, எமது ஒத்துழைப்பை வெளிப்படுத்தும் நோக்கில் இங்கு வர முடிந்ததில் நான் மகிழ்ச்சியடைகிறேன். நாடு எதிர்கொள்ளும் இந்த மிகப்பெரிய சவாலான நேரத்தில் இலங்கை மக்களின் பலம், நீங்கள் காட்டும் மீள்தன்மை மற்றும் நீங்கள் மிகத் தெளிவாக அடைந்துள்ள ஒற்றுமையைக் காண இது எனக்கு ஒரு வாய்ப்பாக அமைந்தது.

அறிவிப்பாளர்: 'தித்வா' சூறாவளியால் பாதிக்கப்பட்ட பகுதிகளுக்கும் மக்களையும் நீங்கள் சந்திக்கச் சென்றதாக நான் அறிந்தேன். இலங்கை கடந்து செல்லும் இந்த கடினமான சூழ்நிலை உங்களுக்கு தனிப்பட்ட ரீதியிலும் ஒரு நெருக்கமான உணர்வைத் தருவதாகத் தெரிகிறது.

கலாநிதி ஜோர்ஜியேவா: தித்வா சூறாவளியால் பாதிக்கப்பட்ட சமூகத்தை சந்திக்க எனக்கு வாய்ப்பு கிடைத்தது. ஏற்பட்ட பேரழிவின் பயங்கரம் அவர்களின் மனதில் இருந்தாலும், மக்கள் இன்னும் பலமாக இருப்பதை நான் கண்டேன். நான் முன்பு மனிதாபிமான ஆணையாளராகப் பணியாற்றினேன். இயற்கை பேரழிவுகள் மற்றும் மோதல்களால் அழிந்த பல இடங்களுக்கு நான் சென்றுள்ளேன். அதன்படி நான் சொல்லக்கூடியது என்னவென்றால், உங்களுக்கு அற்புதமான மக்கள் இருக்கிறார்கள். மிகவும் வேதனையான தருணத்திலும் அவர்கள் ஒன்றிணைந்து எதிர்காலத்தைப் பற்றி சிந்திக்கிறார்கள்.

அரசாங்கம் எவ்வளவு விரைவாகவும் உறுதியாகவும் இதற்காக நடவடிக்கை எடுத்தது என்பதிலும் நான் மிகவும் ஈர்க்கப்பட்டேன். IMF ஆக எங்களால் அவசர நிதி உதவியை வழங்க முடிந்தது. 200 மில்லியன் டாலருக்கும் அதிகமான பணம் சரியான நேரத்தில் கிடைத்தது. எனவே இந்த மக்கள் தங்கள் துயரத்தின் வலியை தனியாகத் தாங்க வேண்டியதில்லை.

நான் உங்களுக்கு இன்னொன்றைச் சொல்கிறேன். அந்த குழந்தைகளின் முகங்களைப் பார்க்கும்போது, நாட்டைப் பற்றிய நம்பிக்கையால் என் இதயம் நிரம்புகிறது. ஏனென்றால், இலங்கையின் உண்மையான இயல்பான அன்பையும் தாராள மனப்பான்மையையும் நான் அவர்களிடமிருந்து காண்கிறேன். சமூகம் இவ்வளவு சிரமங்களை கடந்து வந்திருந்தாலும், உங்கள் நேரமும் உங்கள் வரவேற்பும் மிகவும் தாராளமானது.

அறிவிப்பாளர்: போர் முடிவடைந்த கடந்த 10 ஆண்டுகளில் இலங்கையின் பொருளாதாரம் நிதி, வெளிநாட்டு, அரசியல் அல்லது காலநிலை அதிர்ச்சிகள் என கடுமையான தாக்குதல்களை எதிர்கொண்டது என்று நான் நினைக்கிறேன். நீங்கள் குறிப்பிட்டது போல, சமீபத்தில், அதாவது இன்று காலை நீங்கள் இலங்கை ஜனாதிபதியை சந்தித்தீர்கள். இந்த மிகக் குறுகிய பயணத்தின் போது சூறாவளியால் பாதிக்கப்பட்ட மக்களையும் சந்திக்க நீங்கள் நேரம் ஒதுக்கினீர்கள். இலங்கை இந்த அதிர்ச்சிகளைத் தாங்கி நிற்கும் பின்னணியில், அரசியல் தலைவர்கள் மற்றும் அதிகாரிகளை சந்திக்கும்போது உங்களது செய்தி என்ன?

கலாநிதி ஜோர்ஜியேவா: உண்மையில், கடந்த பத்தாண்டுகளில் இலங்கை பல சவால்களை எதிர்கொண்டது. அது ஒரு உள்நாட்டுப் போரைக் கடந்து வந்தது, ஒரு பயங்கரவாதத் தாக்குதல் நடந்தது, தொற்றுநோய் உங்களைப் பாதித்தது, 2004 சுனாமியால் நாடு பாதிக்கப்பட்டது. அதன் பிறகு மக்களின் அபிலாஷைகளை நிறைவேற்றுவதில் அரசாங்கம் தோல்வியடைந்து வருகிறது என்ற உணர்வு காரணமாக சமூக அமைதியின்மையும் ஏற்பட்டது.

இப்போது நாட்டிற்கு ஒரு பெரிய வாய்ப்பு கிடைத்துள்ளது. முதல் முறையாக மக்களின் நம்பிக்கையை வென்ற ஒரு அரசாங்கம் உள்ளது என்று நான் நினைக்கிறேன், மேலும் அந்த நம்பிக்கையை நிலைநிறுத்த அவர்கள் தங்கள் பங்கைச் செய்து வருகிறார்கள். எங்கள் அனுபவத்தின் அடிப்படையில் நான் சில விஷயங்களைச் சொல்ல விரும்புகிறேன். முதலாவதாக, குறுகிய காலத்தில் இலங்கை பேரியல் பொருளாதார மற்றும் நிதி ஸ்திரத்தன்மையை மீண்டும் பெற்றது. பணவீக்கம் 70% ஆக இருந்தது. இப்போது அது 2% ஆக குறைந்துள்ளது. பொருளாதார வளர்ச்சி எதிர்மறையாக இருந்தது. இப்போது எங்களுக்கு சுமார் 5% பொருளாதார வளர்ச்சி உள்ளது.

மற்றொரு மிக முக்கியமான விஷயம் என்னவென்றால், பொதுச் சேவையின் மீது நம்பிக்கை இருக்க வேண்டும் என்பது அரசாங்கத்தின் கருத்து. இதன் பொருள் ஊழல் ஒழிக்கப்பட வேண்டும் என்பதாகும். ஊழலை ஒழிக்கும் இந்த போராட்டத்தில் எங்களுக்கு உதவக்கூடிய வகையில், ஆசியாவிலேயே இலங்கைதான் அரசாங்க மதிப்பீட்டை (governance assessment) செய்யுமாறு எங்களிடம் கோரிய முதல் நாடு. மேலும் ஜனாதிபதி மற்றும் அரசாங்க உறுப்பினர்களிடம் மக்களின் நலனில் உண்மையான அக்கறை இருப்பதையும் நான் கண்டேன். ஒரு நாடு ஒன்றுபடும்போது வெற்றி கிடைக்கும் என்பதை நான் அறிவேன். இந்த அரசாங்கம் அதை அடைய பெரும் முயற்சி செய்து வருகிறது.

அறிவிப்பாளர்: இது இலங்கையை IMF ஆதரவு திட்டத்திற்கு ஒப்புக்கொள்ள முடிவு செய்த காலத்திற்கு நம்மை மீண்டும் கொண்டு செல்கிறது. இலங்கையின் அந்த முடிவு அப்போது சர்ச்சைக்குரியதாக இருந்தது, பொதுமக்களின் எதிர்ப்பு மற்றும் சில சர்ச்சைக்குரிய அரசியல் எதிர்ப்புகளும் இருந்தன. ஆனால் இன்று நீங்கள் பேசும் இடத்திலிருந்து பார்க்கும்போது, கடுமையான நெருக்கடி காலங்களில் நம்மைப் போன்ற நாடுகளுக்கு (வளர்ந்து வரும் சந்தைகளுக்கு) வரையறுக்கப்பட்ட தேர்வுகள் மட்டுமே உள்ளன. இன்று நீங்கள் விவரித்தபடி இலங்கை அடைந்துள்ள குறிப்பிடத்தக்க மீட்சி மற்றும் உங்கள் அனுபவத்தின் அடிப்படையில், அந்த முடிவை நீங்கள் எவ்வாறு பார்க்கிறீர்கள்?

கலாநிதி ஜோர்ஜியேவா: கடந்த சில தசாப்தங்களாக IMF மாறிவிட்டது. நாங்கள் இனி அந்த பழைய பாரம்பரிய IMF அல்ல. எங்கள் திட்டங்களில் நாங்கள் மக்கள் மீது அதிக கவனம் செலுத்துகிறோம். உண்மையில், ஒரு நாடு ஒரு திட்டத்தின் மூலம் செல்லும்போது, கல்வி, சுகாதாரப் பாதுகாப்பு மற்றும் சமூகப் பாதுகாப்புக்கு இடையூறு ஏற்படாத வகையில் சமூக செலவினங்களுக்கு ஒரு குறைந்தபட்ச அளவை (floor) நிர்ணயிக்குமாறு நாங்கள் அரசாங்கங்களைக் கேட்டுக்கொள்கிறோம். எங்களிடம் தற்போது 50 திட்டங்கள் உள்ளன. ஐந்து, பூஜ்ஜியம். ஏன் இவ்வளவு பெரிய எண்? ஏனென்றால் நாம் மிக வேகமாக மாறிவரும் உலகில் வாழ்கிறோம். இது அதிர்ச்சிகளுக்கு ஆளாகக்கூடிய ஒரு உலகம், மேலும் பல நாடுகளுக்கு IMF இன் நிதி உதவி தேவைப்பட்டுள்ளது.

இதை உங்கள் உரிமை என்று நினைத்துப் பாருங்கள். ஒரு கடினமான தருணத்தில் தனிமைப்படுத்தப்படாமல் இருக்கவும், உதவிக்கரம் பெறவும், நாட்டை ஒரு சிறந்த பாதைக்கு திருப்பவும் IMF ஊழியர்களின் நிபுணத்துவத்தைப் பெறுவதற்கான உங்கள் உரிமை என்று கருதுங்கள். எங்களுக்கு 191 உறுப்பு நாடுகள் உள்ளன. நாங்கள் ஒவ்வொரு நாட்டிலிருந்தும் கற்றுக்கொள்கிறோம், மேலும் இந்த அனுபவங்களை மற்றவர்களுடன் பகிர்ந்து கொள்கிறோம். நாங்கள் ஒரு நாட்டிலிருந்து மற்றொரு நாட்டிற்கு சிறந்த நடைமுறைகளை கடத்தும் ஒரு இணைப்பு போன்றவர்கள்.

நான் ஒரு ஐரோப்பியர். அதனால் நான் உங்களுக்கு இதைச் சொல்கிறேன், இன்று ஐரோப்பாவில் சிறந்த பொருளாதார செயல்திறனைக் கொண்ட போர்ச்சுகல், அயர்லாந்து மற்றும் கிரீஸ் ஆகிய நாடுகள் அனைத்தும் சமீபத்தில் IMF திட்டங்களை செயல்படுத்தின. எனவே இலங்கை மக்களுக்கு நான் சொல்வது என்னவென்றால், நாங்கள் உங்கள் நண்பர்கள், நாங்கள் உங்கள் சேவைக்கு வருகிறோம். ஆனால் ஆம், தீர்க்கப்பட வேண்டிய பிரச்சினைகளுக்கு நாங்கள் கவனம் கோருகிறோம்.

முதலில், நிதி வலிமை. ஒரு குடும்பம் தான் சம்பாதிப்பதை விட அதிகமாக செலவு செய்யக்கூடாது என்பது போலவே, ஒரு நாடும் தான் சம்பாதிப்பதை விட அதிகமாக செலவு செய்யக்கூடாது. இரண்டாவதாக, குறிப்பாக ஏழைகளுக்கு வரிச்சுமையாக இருக்கும் பணவீக்கத்தால் மக்கள் பாதிக்கப்படாமல் இருக்க, விலை ஸ்திரத்தன்மை குறித்த முடிவுகளை எடுக்கக்கூடிய ஒரு சுதந்திரமான மத்திய வங்கி இருப்பது. மூன்றாவதாக, ஒரு பொருளாதார வளர்ச்சி உத்தியைப் பற்றி சிந்திப்பது. இலங்கையின் இளைஞர்களுக்காக வேலைவாய்ப்புகளை உருவாக்கும் வகையில் தனியார் துறை வளர்ச்சி அடைய நாம் எவ்வாறு வாய்ப்புகளைத் திறக்க முடியும் என்பதைக் கண்டறிவது.

அறிவிப்பாளர்: நிச்சயமற்ற தன்மை என்பது "புதிய இயல்பு" (new normal) என்று நீங்கள் தொடர்ந்து விவரித்துள்ளீர்கள். மேலும் உலகப் பொருளாதாரத்திலிருந்து வரும் அபாயங்கள், நிதி இறுக்கம் மற்றும் மூலதனப் பாய்ச்சல்கள் பற்றி நாம் பேசுகிறோம். எனவே இந்த கடினமான மற்றும் நிச்சயமற்ற காலகட்டத்தை கடந்து செல்லும் போது இலங்கை போன்ற சிறிய நாடுகளுக்கு IMF இன் பங்கு என்ன? மேலும் சிறிய நாடுகள் IMF இன் உதவியை எவ்வாறு எதிர்பார்க்கலாம்?

கலாநிதி ஜோர்ஜியேவா: ஒரு காலத்திற்கு முன்பு இருந்ததை விட புவிசார் அரசியல் காரணிகள் இன்று ஒரு பெரிய பங்கை வகிக்கின்றன. வர்த்தகக் கொள்கை மாறிக்கொண்டிருக்கிறது, தொழில்நுட்பம் நாம் வாழும் மற்றும் வேலை செய்யும் விதத்தை மாற்றியமைக்கிறது. கூடுதலாக காலநிலை மாற்றமும் உள்ளது. இவை அனைத்தும் ஒன்றிணைந்து அசாதாரணமாக உயர்ந்த மற்றும் நீடித்த நிச்சயமற்ற தன்மையை உருவாக்குகின்றன.

IMF ஆக நாங்கள் செய்வது என்னவென்றால், அனைத்து நாடுகளிலிருந்தும் தகவல்களைச் சேகரித்து, இன்று உலகம் எங்கு உள்ளது மற்றும் அது எங்கு செல்கிறது என்பது பற்றிய தெளிவான படத்தை உருவாக்குவதுதான். நிச்சயமற்ற காலங்களில், நாங்கள் எங்கள் ஒவ்வொரு உறுப்பினருக்கும் அதிக நம்பிக்கையை வழங்குகிறோம். நாட்டின் மக்களுக்கு சாதகமான எதிர்காலப் பாதை என்ன என்பதை நாம் ஒன்றிணைந்து வரையறுக்க முடியும். இலங்கை அற்புதமானது. இது ஒரு அழகான நாடு, இங்குள்ள மக்கள் மிகவும் அன்பானவர்கள் மற்றும் கனிவானவர்கள். உங்களுக்கு ஒரு சிறந்த எதிர்காலம் வருவதைக் காண நாங்கள் விரும்புகிறோம், மேலும் எங்களுக்குத் தெரிந்த அனைத்தையும் உங்கள் சேவைக்கு வழங்க நாங்கள் தயாராக இருக்கிறோம்.

அறிவிப்பாளர்: நாம் முன்பு பேசிய அபாயங்கள் மற்றும் அடிக்கடி ஏற்படும் அதிர்ச்சிகளுக்கு மத்தியில், தங்கள் பொருளாதாரங்களையும் மக்களையும் பாதுகாக்க மற்றும் மீள்தன்மையை பராமரிக்க அரசாங்கங்கள் எந்த வகையான பாதுகாப்பு இருப்புக்களை (buffers) வைத்திருக்க வேண்டும் என்று நீங்கள் பரிந்துரைக்கிறீர்கள்?

கலாநிதி ஜோர்ஜியேவா: எங்கள் பரிந்துரை என்னவென்றால், முதலாவதாக, ஒரு நல்ல வெளிநாட்டு நாணய இருப்பை பராமரிப்பது. உண்மையில் அந்த இருப்பு மட்டத்தை உயர்த்துவதற்காக நாங்கள் இலங்கையுடன் பணியாற்றி வருகிறோம். இரண்டாவதாக, வலுவான நிதி கொள்கையை பராமரிப்பதன் மூலம் நிதி இருப்புக்களை உருவாக்குவது. அப்போது ஒரு அதிர்ச்சி ஏற்படும்போது உங்கள் மக்களையும் வணிகங்களையும் பாதுகாக்க முடியும். மூன்றாவதாக, தனியார் துறையின் படைப்பாற்றல் மற்றும் தகவமைக்கும் திறனை அதிகம் சார்ந்த ஒரு வளர்ச்சி உத்தியைக் கொண்டிருப்பது. ஏனென்றால் விரைவான மாற்றங்கள் நிகழும் காலங்களில், உண்மையான பொருளாதார வாய்ப்புகளை அடையாளம் காண்பது அரசாங்கங்களுக்கு மிகவும் கடினம், மேலும் வணிகங்கள் மாற்றங்களுக்கு அதைவிட வேகமாக தகவமைத்துக் கொள்ள முடியும்.

அறிவிப்பாளர்: சிறிய பொருளாதாரங்கள் பற்றி நாம் பேசினோம், ஆனால் புவிசார் அரசியல் பதட்டங்கள் மற்றும் காலநிலை அதிர்ச்சிகளைக் காணும்போது, இந்த சிறிய பொருளாதாரங்களுக்கு ஏற்படும் தாக்கம் குறித்து நான் மீண்டும் உங்களிடம் வலியுறுத்திக் கேட்க விரும்புகிறேன். அதன்படி மீண்டும் ஏற்படும் அபாயங்கள் என்ன?

கலாநிதி ஜோர்ஜியேவா: சிறிய திறந்த பொருளாதாரங்கள், மற்ற நாடுகள் செய்யும் மாற்றங்களால் பாதிக்கப்படும் என்று எதிர்பார்க்கப்படுகிறது. எனது செய்தி என்னவென்றால், "முதலில் உங்கள் வீட்டை ஒழுங்காக வைத்துக் கொள்ளுங்கள்" என்பதுதான். உங்கள் வீட்டை ஒழுங்காக வைத்துக் கொள்வது உங்கள் பொறுப்பு. மற்றவர்கள் செய்வதை நீங்கள் பாதிக்க முடியாது என்றாலும், உங்கள் சொந்த விதியை நீங்கள் பாதிக்க முடியும். மேலும் சிறிய பொருளாதாரங்கள் ஒத்த எண்ணம் கொண்டவர்களுடன் ஒன்றிணைய வேண்டும் என்றும் நாங்கள் உறுதியாக பரிந்துரைக்கிறோம். நாங்கள் பிராந்திய ஒருங்கிணைப்பை மேலும் ஊக்குவிக்கிறோம். உண்மையில், இங்கு தெற்காசியாவில் உள்ள நாடுகளுக்கு, குறிப்பிடத்தக்க வேறுபாடுகள் கொண்ட இந்த உலகில் அவர்களுக்கு உதவக்கூடிய பொருளாதார ஒத்துழைப்பை உருவாக்குவதற்காக ஒருவருக்கொருவர் அதிகமாக வர்த்தகம் செய்ய ஒரு வாய்ப்பு உள்ளது.

நாம் சுற்றிலும் பார்க்கும்போது, உலகளாவிய ஒத்துழைப்பு இப்போது மிகவும் கடினமாக இருக்கலாம் என்பதற்கு பல பிராந்தியங்களிலிருந்து பிரதிபலிப்புகளைக் காண்கிறோம். எனவே எங்கள் பிராந்திய ஒத்துழைப்பை ஆழப்படுத்துவதன் மூலம் அதை சமன் செய்வோம். வளைகுடா ஒத்துழைப்பு கவுன்சிலில் (GCC), இங்கு தென்கிழக்கு ஆசியாவில் உங்கள் அண்டை நாடுகளான ஆசியான் (ASEAN) அமைப்பில் அதைக் காண்கிறோம். இது இங்கும் அதிகமாகக் காணப்பட வேண்டும் என்று நாங்கள் நிச்சயமாக விரும்புகிறோம்.

அறிவிப்பாளர்: இது நம்மை கடன் பிரச்சினைக்கு இட்டுச் செல்கிறது. இலங்கையின் பொருளாதாரத்திற்கு கடன் ஒரு முக்கிய பிரச்சினையாக உள்ளது. கடனை மறுசீரமைக்க இலங்கைக்கு உதவ IMF முன்வந்தது. ஆனால் நாம் கடனைப் பற்றி பேசும்போது, இலங்கைக்கு மட்டுமல்ல, இது போன்ற சூழ்நிலைக்கு வரும் பொருளாதாரங்களுக்கு நீங்கள் கொடுக்கக்கூடிய கொள்கை ஆலோசனைகள் என்ன?

கலாநிதி ஜோர்ஜியேவா: கடனுடன் சமாளிக்க சிறந்த வழி முதலில் கடனை உருவாக்காமல் இருப்பதுதான். எனவே கடன் குவிவதைத் தடுக்க வலுவான கடன் மேலாண்மை கொள்கைகள் மற்றும் அலுவலகங்களை உருவாக்குவதற்காக நாங்கள் எங்கள் உறுப்பினர்களுடன் மிக நெருக்கமாக பணியாற்றுகிறோம். அது ஏற்கனவே நடந்திருந்தால், உறுதியாகவும் விரைவாகவும் செயல்படுங்கள். இலங்கை தனது கடனை மறுசீரமைக்க நடவடிக்கை எடுத்துள்ளது, மேலும் அது சரியாகவே, இப்போது பெரும்பாலும் முடிந்துவிட்டது. நீங்கள் முன்னேறும்போது எங்கள் ஆலோசனை என்னவென்றால், கவனமாக இருங்கள். மீண்டும் கடன் குவிய விடாதீர்கள் என்பதுதான்.

அறிவிப்பாளர்: கடினமான மாற்றங்களை சகித்துக்கொண்டிருக்கும் இலங்கையர்களாக, எப்போது நிவாரணம் கிடைக்கும் மற்றும் அனைவரும் எதிர்பார்க்கும் பொருளாதார செழிப்பு எப்போது சமூகத்தின் அடிமட்டத்தை அடையும் என்று யோசித்துக்கொண்டிருக்கிறோம். அதன்படி மேடம், இலங்கை மக்களுக்கு நீங்கள் கொடுக்க விரும்பும் செய்தி என்ன?

கலாநிதி ஜோர்ஜியேவா: ஒன்றாக இருங்கள் மற்றும் உங்கள் ஒற்றுமையை மதியுங்கள். நீங்கள் மிகவும் பலமாகி, நாட்டின் தனித்துவமான குணாதிசயங்களை முழுமையாகப் பயன்படுத்துங்கள். இது விருந்தோம்பல் நிறைந்த, சுற்றுலாத் துறைக்கு மிகவும் பொருத்தமான ஒரு நாடு. ஐரோப்பாவிற்கும் சுற்றுலா ஒரு முக்கியமான துறையாகும். தொழில்முனைவு நிறைந்த நாடு என்பதால் புதிய வணிகங்கள், புதிய யோசனைகளை செயல்படுத்த முடியும். சிரமங்களை எதிர்கொள்ளும் மக்கள் ஒருவரையொருவர் நம்பக்கூடிய ஒரு நாடு இது. தற்போது உங்களுக்கு ஒரு நம்பகமான அரசாங்கமும் உள்ளது. ஒரு சிறந்த எதிர்காலத்திற்காக ஒன்றாக வேலை செய்யுங்கள்.

அறிவிப்பாளர்: அடுத்த முறை நீங்கள் வரும்போது இலங்கையில் சுற்றுப்பயணம் செய்ய உங்களுக்கு சிறிது நேரம் கிடைக்கும் என்று நான் நம்புகிறேன். இலங்கையில் பார்க்க நிறைய இடங்கள் உள்ளன.

கலாநிதி ஜோர்ஜியேவா: ஆம், அங்கு பார்க்க நிறைய இடங்கள் உள்ளன என்பதை நான் அறிவேன். எனது தனிப்பட்ட பயணத்திற்கான திட்டம் உள்ளது. இலங்கையின் அழகையும் இலங்கை மக்களின் விருந்தோம்பலையும் அனுபவிக்க என் பேரக்குழந்தைகளையும் இங்கு அழைத்து வருவேன்.

அறிவிப்பாளர்: மிக்க நன்றி. இலங்கைக்கு உங்களை மீண்டும் வரவேற்க நாங்கள் ஆவலுடன் காத்திருக்கிறோம். உங்கள் நேரத்திற்காக மீண்டும் நன்றி.

கலாநிதி ஜோர்ஜியேவா: நன்றி.