எரிபொருள் விலை உயர்வுக்கு ஏற்ப, மேல் மாகாணத்தில் இயங்கும் முச்சக்கர வண்டிகளின் பயணக் கட்டணத்தை 10 ரூபாவால் அதிகரிக்க தீர்மானிக்கப்பட்டுள்ளது. நேற்று (23) நள்ளிரவு முதல் இந்த புதிய கட்டணத் திருத்தம் அமுலுக்கு வரும் என மேல் மாகாண வீதிப் பயணிகள் போக்குவரத்து அதிகார சபையின் தலைவர் காமினி ஜாசிங்க நேற்று மாலை உத்தியோகபூர்வமாக அறிவித்தார்.
அதன்படி, இதற்கு முன்னர் 100 ரூபாவாக இருந்த முதல் கிலோமீட்டருக்கான கட்டணம் 110 ரூபாவாக அதிகரிக்கப்பட்டுள்ளது. அத்துடன், இரண்டாவது கிலோமீட்டரில் இருந்து ஒவ்வொரு கிலோமீட்டருக்கும் அறவிடப்பட்ட 85 ரூபா 90 ரூபாவாக அதிகரிக்கப்பட்டுள்ளதுடன், இந்த புதிய கட்டண முறை மேல் மாகாணத்திற்கு மட்டுமே வரையறுக்கப்படும் என்பதையும் தலைவர் மேலும் வலியுறுத்தினார்.முச்சக்கர வண்டி தொழிற்சங்கங்கள் எரிபொருள் விலை உயர்வை அடிப்படையாகக் கொண்டு விடுத்த கோரிக்கையை பரிசீலித்த பின்னர் இந்த நடவடிக்கை எடுக்கப்பட்டுள்ளது. வீதிப் பயணிகள் போக்குவரத்து அதிகார சபைக்குச் சொந்தமான விலைக் குழு 'சூம்' (Zoom) தொழில்நுட்பம் மூலம் கூடி, கட்டண அதிகரிப்பு தொடர்பான முடிவை எடுத்ததாக ஜாசிங்க தெரிவித்தார். மேல் மாகாணத்தைத் தவிர ஏனைய மாகாணங்களில் இயங்கும் முச்சக்கர வண்டி சங்கங்களும் தமது பயணக் கட்டணங்களை அதிகரிக்க எதிர்காலத்தில் நடவடிக்கை எடுக்கும் என இதற்கிடையில் அறிவித்துள்ளன.
இதனுடன் இணையாக, பாடசாலை போக்குவரத்து சேவைக் கட்டணங்கள் தொடர்பாகவும் பல்வேறு சங்கங்கள் கருத்து தெரிவித்துள்ளன. அகில இலங்கை மாகாணங்களுக்கிடையிலான மாணவர் போக்குவரத்து சங்கத்தின் தலைவர் ரூவன் பிரசாத், பாடசாலை வேன் கட்டணங்களையும் 10 சதவீதத்தால் அதிகரிக்க அவர்கள் நடவடிக்கை எடுப்பார்கள் என்று தெரிவித்தார். எவ்வாறாயினும், அகில இலங்கை பாடசாலை மாணவர் போக்குவரத்து சங்கத்தின் தலைவர் லலித் சந்திரசிறி, தமது சங்கம் பாடசாலை வேன் கட்டண அதிகரிப்பு குறித்து பரிசீலிப்பதை எதிர்வரும் மே மாதத்தில் மேற்கொள்ள கவனம் செலுத்தி வருவதாக குறிப்பிட்டார்.