கொழும்பு கொள்ளுப்பிட்டி பிரதேசத்தில் சீனப் பிரஜைக்குச் சொந்தமான இரண்டு கோடி ரூபாய்க்கும் அதிகமான பணம் கொள்ளையிடப்பட்ட சம்பவம் தொடர்பில் கைது செய்யப்பட்ட முன்னாள் இராஜாங்க அமைச்சர் சாந்த பண்டாரவின் புதல்வரான அநுஜ தினுஜித் பண்டார என்ற சந்தேகநபரை மத்திய குற்றப் புலனாய்வுப் பிரிவின் பொறுப்பில் 24 மணி நேரம் தடுத்து வைத்து விசாரிப்பதற்கு கோட்டை நீதவான் பசன் அமரசேன நேற்று (22) அனுமதி வழங்கினார்.
இந்தக் கொள்ளைச் சம்பவம் தொடர்பான மேலதிக விசாரணைகளை மத்திய குற்றப் புலனாய்வுப் பிரிவிடம் ஒப்படைக்குமாறு பொலிஸ்மா அதிபர் பிறப்பித்த உத்தரவுக்கு அமைய, அந்தப் பிரிவின் அதிகாரிகள் விடுத்த கோரிக்கையை பரிசீலித்த நீதவான் இவ்வாறு உத்தரவிட்டார். ஆரம்பத்தில் கொள்ளுப்பிட்டி பொலிஸாரால் கைது செய்யப்பட்ட இந்த சந்தேகநபர் நீதிமன்றத்தில் ஆஜர்படுத்தப்பட்ட பின்னர், சம்பவம் தொடர்பான விசாரணைகள் வேறு ஒரு பிரிவிடம் ஒப்படைக்கப்பட்டுள்ளதாக கோட்டை பொலிஸ் அதிகாரிகள் நீதிமன்றத்தில் உறுதிப்படுத்தினர்.
இந்தச் சம்பவம் தொடர்பில் கைது செய்யப்பட்ட மேலும் நான்கு சந்தேகநபர்கள் ஏற்கனவே விளக்கமறியலில் வைக்கப்பட்டுள்ளனர். பொலிஸ்மா அதிபரின் அறிவுறுத்தலின் பேரில் விசாரணைகளை மேற்கொண்ட மத்திய குற்றப் புலனாய்வுப் பிரிவின் சார்ஜன்ட் பண்டார (74773) அவர்கள், புதிய விசாரணைகள் ஆரம்பிக்கப்பட்டுள்ளதால் சந்தேகநபரிடம் மேலதிக விசாரணை நடத்துவதற்கு 24 மணி நேர தடுப்புக் காவல் உத்தரவு தேவை என சுட்டிக்காட்டினார்.
சந்தேகநபருக்காக ஆஜரான சட்டத்தரணிகள் குழு நீதிமன்றத்தில் வாதிடுகையில், தமது கட்சிக்காரர் ஒரு தனியார் பல்கலைக்கழகத்தில் கல்வி கற்கும் மாணவர் என்றும், இந்த கொள்ளைச் சம்பவத்துடனோ அல்லது முறைப்பாட்டாளரான சீனப் பிரஜையுடனோ அவருக்கு எந்த தொடர்பும் இல்லை என்றும் தெரிவித்தனர். கொழும்பு றோயல் கல்லூரியில் தமது கட்சிக்காரருடன் ஒன்றாகப் படித்த பிரமில் என்ற நண்பர் மூலம் அறிமுகமான சீனப் பிரஜையின் பாதுகாப்புக்காக சந்தேகநபர் அறிந்த அஜித் என்பவரை அறிமுகப்படுத்தியதாகவும், அதற்கு அப்பால் நடந்த எந்தவொரு சம்பவத்துடனும் தமது கட்சிக்காரருக்கு தொடர்பு இல்லை என்றும் சட்டத்தரணிகள் மேலும் தெரிவித்தனர்.
அத்துடன், இந்த குற்றத்துடன் சந்தேகநபர் எவ்வாறு தொடர்புபட்டார் என்பதை தெளிவுபடுத்தும் எந்தவொரு சாட்சியச் சுருக்க அறிக்கையையும் பொலிஸார் நீதிமன்றத்தில் சமர்ப்பிக்கவில்லை என்றும் பிரதிவாதி சட்டத்தரணிகள் வலியுறுத்தினர். இரு தரப்பினராலும் முன்வைக்கப்பட்ட விடயங்களை கருத்தில் கொண்ட நீதவான், சந்தேகநபரை 24 மணி நேரம் தடுத்து வைத்து விசாரிப்பதற்கு அனுமதி வழங்கியதுடன், இன்று (23) அவரை மீண்டும் நீதிமன்றத்தில் ஆஜர்படுத்துமாறு பொலிஸாருக்கு உத்தரவிட்டார்.