பாடசாலைகளில் மாணவர்களைச் சேர்த்துக்கொள்வதற்கும் புலமைப்பரிசில்களை வழங்குவதற்கும் ஆண்டுதோறும் நடத்தப்படும் 5 ஆம் தர புலமைப்பரிசில் பரீட்சை 2026 ஆம் ஆண்டு ஆகஸ்ட் மாதம் 09 ஆம் திகதி ஞாயிற்றுக்கிழமை நடைபெறும் என பரீட்சைகள் ஆணையாளர் நாயகம் அறிவித்துள்ளார்.
இந்த பரீட்சைக்கான விண்ணப்பங்கள் முழுமையாக இணையவழி (online) முறை மூலம் மட்டுமே ஏற்றுக்கொள்ளப்படும். இதற்காக 2026 மார்ச் மாதம் 30 ஆம் திகதி முதல் ஏப்ரல் மாதம் 30 ஆம் திகதி வரை கால அவகாசம் வழங்கப்பட்டுள்ளது. ஏப்ரல் 30 ஆம் திகதி நள்ளிரவு 12.00 மணிக்குப் பிறகு இணையவழி அணுகல் மூடப்படும் என்றும், எந்தவொரு காரணத்திற்காகவும் விண்ணப்பங்களை ஏற்றுக்கொள்ளும் இறுதித் திகதி நீட்டிக்கப்பட மாட்டாது என்றும் பரீட்சைகள் திணைக்களம் கடுமையாக வலியுறுத்துகிறது.
இந்த முறை புலமைப்பரிசில் பரீட்சைக்குத் தோற்றும் வாய்ப்பு அரச பாடசாலைகள் அல்லது அரச அங்கீகாரம் பெற்ற தனியார் பாடசாலைகளில் 5 ஆம் தரத்தில் கல்வி கற்கும் மாணவர்களுக்கு மட்டுமே கிடைக்கும். மேலும், புலமைப்பரிசில் கொடுப்பனவைப் பெறுவதற்கு குறைந்த வருமானம் பெறும் குடும்பங்களைச் சேர்ந்த, 2027 ஜனவரி 31 ஆம் திகதிக்கு 11 வயதுக்கு மேற்படாத மாணவர்கள் மட்டுமே தகுதி பெறுவார்கள் என்றும் அந்த அறிவிப்பில் மேலும் குறிப்பிடப்பட்டுள்ளது.
விண்ணப்பிக்கும் செயல்முறை தொடர்பான முழுமையான வழிகாட்டுதல்கள் மற்றும் விதிமுறைகளை https://onlineexams.gov.lk/eic என்ற உத்தியோகபூர்வ இணையத்தளத்திற்குச் சென்று இலகுவாகப் பெற்றுக்கொள்ளலாம். விசேட தேவையுடைய மாணவர்களுக்கான விண்ணப்ப நடைமுறையும் அந்த வழிகாட்டுதலில் விரிவாக உள்ளடக்கப்பட்டுள்ளது. பரீட்சை தொடர்பான மேலதிக தகவல்களை அறிந்துகொள்ள விரும்பினால் 011-2784537, 011-2786616, 011-2784208, 011-2486200, மற்றும் 011-2784201 ஆகிய தொலைபேசி இலக்கங்கள் மூலமாகவோ அல்லது 1911 என்ற அவசர அழைப்பு இலக்கம் மூலமாகவோ விசாரணைகளை மேற்கொள்ளலாம். மேலும், gr5schexam@gmail.com என்ற மின்னஞ்சல் முகவரியும் 011-2784422 என்ற தொலைநகல் இலக்கமும் அதற்காகத் திறந்திருக்கும்.
