களுபோவில, பீரிஸ் வீதியில் அமைந்துள்ள 'கென்ட் ரெசிடென்ஸ்' (Kent Residence) என்ற நான்கு மாடி குடியிருப்பு வளாகத்தின் இரண்டாவது மாடியில் வாடகைக்கு வசித்து வந்த 28 வயதுடைய சீனப் பெண் ஒருவர் நேற்று (23) மாலை கூரிய ஆயுதத்தால் குத்திக் கொல்லப்பட்டுள்ளார். சம்பவத்தின் போது, அவரது நண்பர் என கூறப்படும் மற்றொரு சீனருக்கும் கத்திக்குத்து விழுந்துள்ளதுடன், அவர் படுகாயமடைந்துள்ளார்.
இந்தக் குற்றத்தைச் செய்ததாக சந்தேகிக்கப்படும் சீனப் பிரஜை ஏற்கனவே அப்பகுதியிலிருந்து தப்பிச் சென்றுள்ளார். அவரைக் கைது செய்வதற்காக கொஹுவளை பொலிஸ் குற்றப் புலனாய்வுப் பிரிவு விசேட விசாரணையை ஆரம்பித்துள்ளது.இவ்வாறு கொல்லப்பட்டவர் லீவா வையான் என்ற சீனப் பெண் ஆவார். பொலிஸ் தகவல்களின்படி, அவர் சுமார் இரண்டு மாதங்களுக்கு முன்பு இந்த குடியிருப்பு வளாகத்தில் உள்ள குறிப்பிட்ட வீட்டை வாடகைக்கு எடுத்து அங்கு குடியேறியுள்ளார். இந்த மனிதாபிமானமற்ற கொலையைச் செய்து தப்பிச் சென்ற சந்தேகநபர் இறந்த பெண்ணின் காதலன் என்று தகவல்கள் வெளியாகியுள்ளன. காதல் உறவில் ஏற்பட்ட தகராறு இந்தக் குற்றத்திற்குக் காரணமாக இருக்கலாம் என்று ஒரு உயர் பொலிஸ் அதிகாரி ஊகிக்கிறார். பொலிஸ் அவசர அழைப்பு எண்ணுக்குக் கிடைத்த விசேட தகவலின் பேரில் உடனடியாகச் செயற்பட்ட அதிகாரிகள், குறிப்பிட்ட அடுக்குமாடி குடியிருப்புக்குச் சென்று சோதனை செய்தபோது இந்த சடலத்தைக் கண்டுபிடித்துள்ளனர். அதன்படி, பொலிஸார் சம்பவ இடத்திற்கு வந்து உடனடியாக ஆரம்பகட்ட விசாரணைகளைத் தொடங்கினர்.
இதுவரை மேற்கொள்ளப்பட்ட பொலிஸ் விசாரணைகளில் இருந்து வெளிவந்துள்ள தகவல்களின்படி, இந்தக் கொலையைச் செய்தவர் இறந்த பெண்ணின் முன்னாள் காதலன் என்று அதிகாரிகள் கடுமையாகச் சந்தேகிக்கின்றனர்.
சம்பந்தப்பட்ட சந்தேகநபர் காதலன், கொலை செய்யப்பட்ட பெண்ணின் வீட்டிற்கு அருகில் உள்ள ஒரு வீட்டை சுமார் மூன்று நாட்களுக்கு முன்பு வாடகைக்கு எடுத்து அங்கு தங்கியிருந்ததாக மேலும் தெரியவந்துள்ளது.
அவர் இந்தக் கொலையை வேண்டுமென்றே திட்டமிட்டுச் செய்திருக்கலாம் என்றும், தாக்கப்பட்ட மற்றொரு சீன இளைஞன் இறந்த பெண்ணின் தற்போதைய காதலன் என்றும் தெரிவிக்கப்பட்டுள்ளது. அந்தப் பெண் முக்கோணக் காதலில் ஈடுபட்டிருந்ததாகவும், அதில் ஏற்பட்ட பிரச்சனைகளால் பழைய காதலனை கைவிட்டதாகவும், பழிவாங்கும் நோக்கத்துடன் இந்தக் கொலையைச் செய்திருக்கலாம் என்றும் தகவல்கள் வெளிவந்து கொண்டிருக்கின்றன.
காதல் தகராறு காரணமாக இந்தக் கொலை நடந்திருக்கலாம் எனச் சந்தேகிக்கப்படுகிறது.
சந்தேகநபரின் கத்திக்குத்துக்கு இலக்கான சீனப் பெண் சம்பவ இடத்திலேயே உயிரிழந்துள்ளார். அவரது சடலத்தை பொலிஸார் அந்த வீட்டிலிருந்து கண்டுபிடித்துள்ளனர்.
இதற்கிடையில், கொலையைச் செய்து தப்பிச் சென்ற சந்தேகநபரான சீனப் பிரஜை நாட்டை விட்டு வெளியேறுவதைத் தடுப்பதற்காக, கட்டுநாயக்க மற்றும் மத்தள விமான நிலைய அதிகாரிகளுக்கு அவரைப் பற்றிய அனைத்து தகவல்களையும் வழங்க பொலிஸார் நடவடிக்கை எடுத்துள்ளனர். அவர் விமான நிலையத்திற்கு வந்தால் உடனடியாகக் கைது செய்யுமாறும் அறிவிக்கப்பட்டுள்ளது. மேல் மாகாணத்திற்குப் பொறுப்பான சிரேஷ்ட பிரதிப் பொலிஸ் மா அதிபர் சஞ்சீவ தர்மரத்ன மற்றும் மேல் மாகாண தெற்கு மாவட்டத்திற்குப் பொறுப்பான பிரதிப் பொலிஸ் மா அதிபர் சமந்த விஜேசேகர ஆகியோரின் அறிவுறுத்தலின் பேரில், கல்கிஸ்ஸை பிரிவுக்குப் பொறுப்பான சிரேஷ்ட பொலிஸ் அத்தியட்சகர் அசோக குணசேகரவின் வழிகாட்டுதலின் கீழ், கொஹுவளை பொலிஸ் குற்றப் புலனாய்வுப் பிரிவு இந்தச் சம்பவம் தொடர்பான மேலதிக விசாரணைகளை மேற்கொண்டு வருகிறது.
