மலேசிய பத்திக் ஏர் இன்று முதல் கொழும்புக்கு விமான சேவையை ஆரம்பிக்கிறது

மலேசியாவின் கோலாலம்பூர் மற்றும் கொழும்பு இடையே மீண்டும் தொடங்கப்பட்ட நேரடி விமான சேவையான படிக் ஏர் (Batik Air) விமானத்தின் முதல் விமானம் இன்று (30) காலை கட்டுநாயக்க பண்டாரநாயக்க சர்வதேச விமான நிலையத்தை வெற்றிகரமாக வந்தடைந்தது. போயிங் 737 800 ரக விமானத்தைப் பயன்படுத்தி இயக்கப்படும் இந்த சேவை ஒவ்வொரு வாரமும் திங்கள், செவ்வாய், வியாழன் மற்றும் சனிக்கிழமை ஆகிய நான்கு நாட்களில் இயக்கப்படவுள்ளதுடன், இலங்கையில் படிக் ஏர் விமான சேவையின் பிரதான விற்பனை முகவராக 'M and C Companies Pvt.

Ltd' நிறுவனம் செயல்படுகிறது.

இந்த விமான சேவைகள் ஆரம்பிக்கப்பட்டதற்கு இணையாக, ஸ்ரீலங்கன் விமான நிறுவனத்தின் பொறியியல் பிரிவு (SriLankan Engineering) மற்றும் மலேசியாவின் படிக் ஏர் விமான சேவைக்கும் இடையே ஒரு புதிய நீண்டகால வரிசை பராமரிப்பு ஒப்பந்தம் கடந்த 25 ஆம் திகதி உத்தியோகபூர்வமாக கைச்சாத்திடப்பட்டது. அதன்படி, கொழும்புக்கு வரும் அனைத்து படிக் ஏர் விமானங்களுக்கும் தேவையான பராமரிப்பு சேவைகளை வழங்குவதற்கான முழுப் பொறுப்பும் ஸ்ரீலங்கன் பொறியியல் பிரிவுக்கு வழங்கப்படும். இதன் மூலம் விமானங்களின் பாதுகாப்பு, செயல்பாட்டுத் திறன் மற்றும் தயார்நிலை மேலும் மேம்படுத்தப்படும்.

இந்த புதிய உறவின் மூலம் தென்கிழக்கு ஆசியாவுக்கும் இலங்கைக்கும் இடையிலான பிராந்திய சுற்றுலா வாய்ப்புகள் மேலும் மேம்படும் என்று படிக் ஏர் விமான சேவையின் விற்பனைப் பிரிவுத் தலைவர் திரு. அரசு சௌந்தரராஜன் தெரிவித்தார். அவர் சுட்டிக்காட்டியபடி, 2023 ஆம் ஆண்டில் 61,775 ஆகப் பதிவான இலங்கையர்களின் மலேசிய சுற்றுலா வருகைகள் தற்போது 77,202 ஆக, அதாவது கிட்டத்தட்ட 25 சதவீதத்தால் அதிகரித்துள்ளதால், இந்த வாராந்திர நான்கு விமான சேவைகளை அறிமுகப்படுத்துவதன் மூலம் பயணிகளின் எண்ணிக்கை மேலும் அதிகரிக்கும் என எதிர்பார்க்கப்படுகிறது.

சிவில் விமானப் போக்குவரத்து பணிப்பாளர் நாயகமும், இலங்கை சிவில் விமானப் போக்குவரத்து அதிகார சபையின் பிரதம நிறைவேற்று அதிகாரியுமான கப்டன் தமின்ட ரம்புக்கவெல்ல அவர்கள் குறிப்பிட்டபடி, இந்த புதிய விமான சேவைகளை ஆரம்பிப்பது கொழும்பு விமானப் போக்குவரத்துத் துறையை விரிவுபடுத்துவதற்கான ஒரு குறிப்பிடத்தக்க படியாகும். இரு நாடுகளுக்கும் இடையிலான சுற்றுலா வருகைகளை மேலும் அதிகரிக்க விளையாட்டு சுற்றுலாத் துறையையும் ஒருங்கிணைந்த திட்டங்களையும் மேம்படுத்த மலேசியா தற்போது செயல்பட்டு வருவதாக இலங்கை மற்றும் மாலைதீவுகளுக்கான மலேசிய உயர்ஸ்தானிகர் பத்லி ஹிஷாம் ஆடம் அவர்களும் இங்கு மேலும் தெரிவித்தார்.