பிரபல போதைப்பொருள் கடத்தல்காரரான 'தெமட்டகொட ருவன்' என்பவருக்கு பிணை வழங்குவதற்காக தலையிட்டமைக்காக ஐம்பது இலட்சம் ரூபா பணத்தை இலஞ்சமாகப் பெற்றுக்கொண்ட சம்பவம் தொடர்பில், தேசிய வீடமைப்பு அபிவிருத்தி அதிகார சபையின் முன்னாள் தலைவரும் முன்னாள் பாராளுமன்ற உறுப்பினருமான ஆர். துமிந்த சில்வா அவர்களை சந்தேகநபராகப் பெயரிட இலஞ்சம் அல்லது ஊழல் குற்றச்சாட்டுகள் விசாரணை ஆணைக்குழு தீர்மானித்துள்ளது.
இலஞ்ச ஆணைக்குழு அதிகாரிகள் நேற்று (03) கொழும்பு பிரதான நீதவான் அசாங்க எஸ். போதரகம் முன்னிலையில் விடயங்களை முன்வைத்து இதனை அறிவித்ததோடு, குறித்த சம்பவத்துடன் தொடர்புடையதாக அவர்களால் ஏற்கனவே கைது செய்யப்பட்டுள்ள மொஹமட் மொஹிதீன் சப்ராஸ் நவாஸ் என்ற நபரை எதிர்வரும் 13ஆம் திகதி வரை விளக்கமறியலில் வைக்க இதன்போது நீதவான் உத்தரவிட்டார்.
ஆர். துமிந்த சில்வா தேசிய வீடமைப்பு அபிவிருத்தி அதிகார சபையின் தலைவராக இருந்த காலத்தில் அவரது முழுமையான அறிவுடன் சம்பந்தப்பட்ட சந்தேகநபர்களால் இந்த ஐம்பது இலட்சம் ரூபா இலஞ்சப் பணம் பெறப்பட்டுள்ளது என இலஞ்ச ஆணைக்குழு மேற்கொண்ட விசாரணைகளில் இதுவரை தெரியவந்துள்ளது.
இதற்கு இணையாக, மேலும் நூறு இலட்சம் ரூபா இலஞ்சப் பணத்தைப் பெற்றுக்கொண்ட மற்றொரு சந்தேகநபரும் இந்த சம்பவத்துடன் தொடர்புபட்டுள்ளார் ஆனால், தற்போது அவர் உயிருடன் இல்லை என்றும் விசாரணை அதிகாரிகள் நீதிமன்றத்தில் மேலும் தெரிவித்தனர்.
அதன்படி, இந்த சம்பவம் தொடர்பில் புதிதாக சந்தேகநபராகப் பெயரிடப்பட்ட ஆர். துமிந்த சில்வா அவர்களுக்கு எதிராக விரிவான விசாரணையை மேற்கொண்டு அது குறித்து விரைவாக நீதிமன்றத்திற்கு அறிக்கை சமர்ப்பிக்குமாறு கொழும்பு பிரதான நீதவான் இலஞ்ச ஆணைக்குழுவுக்கு உத்தரவிட்டுள்ளார்.