இலங்கை கிரிக்கெட் நிறுவனத்தின் முன்னாள் தலைவரும், நாட்டின் முன்னணி வர்த்தகருமான ஹேவா கொமானகே உபாலி தர்மதாச (எச். கே.
உபாலி தர்மதாச) காலமானார். இலங்கை கிரிக்கெட் கட்டுப்பாட்டுச் சபையின் பல முக்கிய பதவிகளை வகித்த அவரது மறைவு குறித்த மேலதிக தகவல்களும், இறுதிச் சடங்குகளும் விரைவில் அறிவிக்கப்படவுள்ளன. பிரபல நவலோக வர்த்தகக் குழுமத்தின் பல முன்னணி நிறுவனங்களின் முகாமைத்துவப் பணிப்பாளராகப் பணியாற்றிய அவர், உள்ளூர் உணவு கலாச்சாரத்தை மேம்படுத்தி கொழும்பில் அமைந்துள்ள பிரபலமான ‘உபாலிஸ் பை நவலோக’ (Upali’s by Nawaloka) உணவகத்தை ஆரம்பித்த நிறுவனராகவும் அறியப்பட்டார்.பிரபல வர்த்தகரும் சமூக சேவையாளருமான தேசமான்ய எச். கே. தர்மதாச (நவலோக முதலாளி) மற்றும் மீலின் தர்மதாச ஆகியோரின் இளைய மகனான உபாலி தர்மதாச, நவலோக வைத்தியசாலைக் குழுமத்தின் தலைவர் ஜயந்த தர்மதாச மற்றும் மாலினி, ருக்மணி, புஷ்பா, பிரியாணி ஆகியோரின் சகோதரர் ஆவார். கொழும்பு ஆனந்தா கல்லூரியில் பாடசாலைக் கல்வியைப் பெற்று, பின்னர் ஐக்கிய இராச்சியத்தின் வான்ட்ஸ்வொர்த் தொழில்நுட்பக் கல்லூரியில் (Wandsworth Technical College) உயர்கல்வியைப் பயின்ற அவர், நிறுவன நிர்வாகத்தில் மூன்று தசாப்தங்களுக்கும் மேலான அனுபவத்தைப் பெற்றிருந்தார். கொழும்பு 7, சி.டபிள்யூ.டபிள்யூ. கன்னங்கரா மாவத்தையில் அமைந்துள்ள குடும்பத்தின் பிரதான வீடு அவர் சிறுவயதிலிருந்து வளர்ந்த இடமாகும்.
நவலோக குழும நிறுவனங்களில் குறிப்பிடத்தக்க பங்களிப்பை வழங்கிய அவர், நவலோக பைலிங், நவலோக பொலிசாக்ஸ், நவலோக டிம்பர் ஸ்டோர்ஸ், நவலோக இன்டஸ்ட்ரீஸ், நியூ நவலோக டிரேடிங் மற்றும் நவலோக டெவலப்மென்ட்ஸ் போன்ற பல நிறுவனங்களின் முகாமைத்துவப் பணிப்பாளராகவும் தலைவராகவும் பணியாற்றினார். வணிகத் துறைக்கு மேலதிகமாக, இலங்கை காப்புறுதிக் கூட்டுத்தாபனத்தின் தலைவராகவும், செளலான் வங்கியின் பணிப்பாளராகவும், இலங்கை மர வியாபாரிகள் சங்கத்தின் தலைவராகவும், கைத்தொழில் அபிவிருத்திச் சபையின் பணிப்பாளராகவும் அவர் பணியாற்றினார். மேலும், இலங்கையில் மொரோக்கோ இராச்சியத்தின் கௌரவ தூதுவராகவும் அவர் இராஜதந்திர மட்டத்தில் பணியாற்றினார்.
இலங்கையின் கிரிக்கெட் நிர்வாகத்தில் நீண்டகாலமாக தீவிரமாகப் பணியாற்றிய உபாலி தர்மதாச, 1989 இல் இலங்கை கிரிக்கெட் கட்டுப்பாட்டுச் சபையின் உப தலைவராக நியமிக்கப்பட்டு கிரிக்கெட் நிர்வாகத்திற்குள் நுழைந்தார். பின்னர் 1996 இல் அனா புஞ்சிஹேவாவைத் தோற்கடித்து கிரிக்கெட் கட்டுப்பாட்டுச் சபையின் தலைவராகப் பதவியேற்ற அவர், 1998 வரை அப்பதவியில் பணியாற்றினார். அதன்பிறகு 2011 இல் கிரிக்கெட் இடைக்கால நிர்வாகக் குழுவின் தலைவராகப் பணியாற்றிய அவர், சர்வதேச கிரிக்கெட் சபையின் வழிகாட்டுதலின் கீழ் 2012 இல் நடைபெற்ற தேர்தலில் போட்டியின்றி இலங்கை கிரிக்கெட் தலைவராக மீண்டும் தேர்ந்தெடுக்கப்பட்டார்.
வணிக மற்றும் விளையாட்டுத் துறைகளில் ஈடுபட்டிருந்த போதிலும், சமையல் கலையில் அவருக்கு இருந்த தனிப்பட்ட ஆர்வம் காரணமாக, 2013 ஆம் ஆண்டில் தனது பெற்றோருக்கு அஞ்சலி செலுத்தும் விதமாக, அவர் வளர்ந்த கொழும்பில் உள்ள பிரதான வீட்டில் ‘உபாலிஸ் பை நவலோக’ உணவகத்தை ஆரம்பித்தார். உள்ளூர் பாணியிலான பாரம்பரிய இலங்கை உணவுகளை வழங்கிய இந்த உணவகம், மீன் தலைக் கறி, மாத்தறை எம்பூல் தியல், யாழ்ப்பாண நண்டுக்கறி, கிராமிய கத்தரிக்காய் மோஜு, அப்பம், இடியப்பம் மற்றும் கொத்து போன்ற உள்ளூர் உணவுகளுக்கு மிகவும் பிரபலமானது. Tripadvisor Travellers' Choice விருதையும் World’s 50 Best Discovery பட்டியலிலும் இடம்பெற்ற இந்த வணிகத்திற்கு அவரது மனைவி சந்தியா தர்மதாசவும் தீவிரமாகப் பங்களித்தார்.