சவுதி அரேபியாவில் அமைந்துள்ள பிரின்ஸ் சுல்தான் விமானப்படைத் தளம் (Prince Sultan Air Base) மீது ஈரான் நடத்திய ஒருங்கிணைந்த ஏவுகணை மற்றும் ட்ரோன் தாக்குதலில் அமெரிக்காவிற்குச் சொந்தமான மிகவும் முக்கியமான, விலையுயர்ந்த விமானம் ஒன்று முழுமையாக அழிக்கப்பட்டுள்ளது. 2026 மார்ச் 27 அன்று நடந்த இந்தத் தாக்குதல் காரணமாக அமெரிக்க விமானப்படையின் முக்கிய முன்கூட்டிய எச்சரிக்கை மற்றும் கட்டுப்பாட்டு (AWACS) விமானமான போயிங் E-3G சென்ட்ரி விமானம் இவ்வாறு அழிக்கப்பட்டுள்ளது.
இந்த ரக விமானம் ஒன்று போர்க்களத்தில் அழிக்கப்படுவது வரலாற்றில் இதுவே முதல் முறையாகும், இதன் மூலம் அமெரிக்காவிடம் உள்ள செயலில் உள்ள AWACS விமானங்களின் எண்ணிக்கை 16 இலிருந்து 15 ஆகக் குறைந்துள்ளது.குறைந்தது ஒரு பாலிஸ்டிக் ஏவுகணை மற்றும் பல ட்ரோன் விமானங்களைப் பயன்படுத்தி நடத்தப்பட்ட இந்தத் தாக்குதல், தளத்தின் பிரதான முற்றம் மற்றும் அதிக மதிப்புள்ள விமானங்கள் நிறுத்தப்பட்டிருந்த தனிமைப்படுத்தப்பட்ட ஓடுபாதைகளைத் துல்லியமாக இலக்கு வைத்து நடத்தப்பட்டுள்ளது. தாக்குதலில் 81-0005 என்ற எண் கொண்ட E-3G விமானம் முற்றிலும் எரிந்து சாம்பலாகியுள்ளது, விமானத்தின் பின் பகுதி, என்ஜின்கள் மற்றும் இறக்கைகள் கடுமையாக சேதமடைந்துள்ளதை தரைமட்டத்திலிருந்து எடுக்கப்பட்ட புகைப்படங்கள் உறுதிப்படுத்துகின்றன. சிதறிய குப்பைகளுக்கு மத்தியில் "OK 0005" என்று குறிக்கப்பட்ட விமானத்தின் வால் பகுதி மற்றும் ஒரு அமெரிக்கக் கொடியையும் காண முடிந்தது, மேலும், KC-135 ஸ்ட்ராடோடேங்கர் ரக எரிபொருள் நிரப்பும் விமானங்கள் சிலவும் தாக்குதலில் கடுமையாக சேதமடைந்துள்ளன.
இந்த பாரிய தாக்குதல் காரணமாக தளத்தின் கட்டிடங்களுக்குள் இருந்த 10 முதல் 12 அமெரிக்க இராணுவ வீரர்கள் காயமடைந்துள்ளனர், அவர்களில் சிலரின் நிலைமை கவலைக்கிடமாக இருப்பதாகத் தெரிவிக்கப்பட்டுள்ளது. அமெரிக்க மத்திய கட்டளைப்படை (CENTCOM) இராணுவ வீரர்கள் காயமடைந்ததை அதிகாரப்பூர்வமாக உறுதிப்படுத்தியுள்ளது, ஆனால் விமானங்களுக்கு ஏற்பட்ட சேதம் குறித்து இதுவரை பகிரங்கமாக அறிவிக்கவில்லை. இருப்பினும், தாக்குதலுக்கு முன்னர் இத்தகைய ஆறு E-3 விமானங்கள் பிரின்ஸ் சுல்தான் தளத்தில் நிறுத்தப்பட்டிருந்தன என்பது உறுதிப்படுத்தப்பட்டுள்ளது.
மாற்றியமைக்கப்பட்ட போயிங் 707 விமான அமைப்பின் மீது 30 அடி சுழலும் ரேடார் கோளத்துடன் வடிவமைக்கப்பட்ட E-3 சென்ட்ரி விமானம் ஒன்று 500 மில்லியன் முதல் 700 மில்லியன் டாலர்கள் வரையிலான பாரிய மதிப்புடையது. எந்த வானிலை நிலையிலும் கண்காணிப்பு நடவடிக்கைகளை மேற்கொள்ளக்கூடிய இந்த விமானங்கள், 250 மைல்களுக்கும் அதிகமான தூரத்திலிருந்து நூற்றுக்கணக்கான வான்வழி இலக்குகளை ஒரே நேரத்தில் அடையாளம் காணவும், தாக்குதல் விமானங்களுக்கு நேரடி அறிவுறுத்தல்களை வழங்கவும் திறன் கொண்டவை. ரியாத் நகரத்தின் தென்கிழக்கே அமைந்துள்ள பிரின்ஸ் சுல்தான் விமானப்படைத் தளம், ஈரான், யேமன், ஈராக் மற்றும் சிரியா போன்ற நாடுகளின் நடவடிக்கைகளை 24 மணி நேரமும் கண்காணிப்பதற்காக அமெரிக்கா மற்றும் சவுதி அரேபியாவால் 2019 ஆம் ஆண்டு முதல் பயன்படுத்தப்படும் ஒரு முக்கிய செயல்பாட்டு மையமாகும்.
இந்தத் தாக்குதல் மத்திய கிழக்குப் பிராந்தியத்தில் அமெரிக்காவின் வான் சக்திக்கு ஒரு பாரிய அடியாக விமர்சகர்கள் சுட்டிக்காட்டுகின்றனர். உயர் தொழில்நுட்ப அமெரிக்க விமானங்களை, பலத்த பாதுகாப்பு கொண்ட தளத்திற்குள் இவ்வாறு இலக்கு வைத்ததன் மூலம் ஈரான் தனது ஏவுகணைகள் மற்றும் ட்ரோன் விமானங்களின் துல்லியத்தை வெளிப்படுத்தியுள்ளது. பிராந்தியத்தில் பதட்டமான சூழ்நிலை நிலவும் வேளையில், அமெரிக்க கண்காணிப்பு விமானப் படையில் சுமார் 40% நிறுத்தப்பட்டிருந்த ஒரு பிராந்தியத்திலிருந்து இத்தகைய ஒரு விமானத்தை இழந்தது, ஹூதி கிளர்ச்சியாளர்கள் அல்லது பிற இலக்குகளுக்கு எதிரான எதிர்கால நடவடிக்கைகளை நேரடியாகப் பாதிக்கும். மேலும், இந்த பழைய E-3 விமானங்களுக்குப் பதிலாக புதிய E-7 வெட்ஜ்டெயில் விமானங்களை விரைவாகச் சேவையில் இணைக்க வேண்டியதன் அவசியமும் இந்தச் சம்பவத்துடன் தீவிரமடைந்துள்ளது.
