பாணந்துறை வலான மத்திய ஊழல் தடுப்புப் படையின் கட்டளை அதிகாரி, பிரதான பொலிஸ் பரிசோதகர் இந்திக்க வீரசிங்கவின் அடையாளத்தை சமூக ஊடகங்கள் மூலம் போலியாகப் பயன்படுத்தி பாரிய அளவில் கப்பம் வசூலிப்பதில் ஈடுபட்ட பாதாள உலகத்துடன் தொடர்புடையவர் என சந்தேகிக்கப்படும் ஒருவர் பொலிஸாரால் கைது செய்யப்பட்டுள்ளார். நேற்று (25) மாலை பண்டாரகம பிரதேசத்தில் இந்த கைது இடம்பெற்றுள்ளதுடன், சந்தேகநபரிடம் இருந்து 25 கிராம் 620 மில்லிகிராம் ஹெரோயின் போதைப்பொருள் கைப்பற்றப்பட்டதாகவும் விசாரண அதிகாரிகள் தெரிவித்தனர்.
சந்தேகநபர் ஒரு பேஸ்புக் கணக்கு மூலம் பொலிஸ் நிலைய பொறுப்பதிகாரியாக நடித்து, நாடு முழுவதும் உள்ள பணக்கார வர்த்தகர்களை இலக்காகக் கொண்டு இந்த மோசடியை நடத்தியுள்ளார். சம்பந்தப்பட்ட வர்த்தகர்கள் சட்டவிரோத நடவடிக்கைகளில் ஈடுபட்டு வருவதாக தனக்கு மனுக்கள் கிடைத்துள்ளதாகக் கூறி அவர்களை அச்சுறுத்தி, அதன் மூலம் பல இலட்சம் ரூபாய்களை கப்பமாகப் பெற்றுள்ளதாக பொலிஸ் விசாரணைகளில் தெரியவந்துள்ளது. நேற்று ஒரு வர்த்தகரிடம் இருந்து ஒரு இலட்சம் ரூபாயைப் பெறுவதற்காக பண்டாரகம அதிவேக நெடுஞ்சாலை நுழைவாயிலுக்கு வந்தபோது, வலான ஊழல் தடுப்புப் படையினர் மேற்கொண்ட திடீர் சுற்றிவளைப்பில் இவர் பிடிபட்டுள்ளார்.
இது தவிர, நாட்டின் பல்வேறு பகுதிகளில் உள்ள விகாரைகள் மற்றும் மடங்களில் வசிக்கும் பிக்குகள் மற்றும் பிக்குணிகளும் இந்த மோசடிக்காரரின் ஏமாற்று வேலைகளுக்கு பலியாகியுள்ளனர். பிரதான பொலிஸ் பரிசோதகரின் இங்கிலாந்தில் வசிக்கும் சகோதரி ஒரு தான தர்மத்தை ஏற்பாடு செய்துள்ளதாகக் கூறி அவர்களின் நம்பிக்கையைப் பெற்றுள்ள இவர், பின்னர் தொழில்நுட்ப உத்திகளைப் பயன்படுத்தி சம்பந்தப்பட்ட விகாரைகள் மற்றும் மடங்களின் வங்கிக் கணக்குகளில் இருந்த பணத்தை நுட்பமாக அபகரித்துள்ளதாக தகவல்கள் வெளியாகியுள்ளன.
இவ்வாறு சட்டத்தின் பிடியில் சிக்கிய நபருக்கு நிரந்தர வதிவிடம் இல்லை என பொலிஸார் தெரிவித்துள்ளனர். அவர் தனது அடையாளம் மற்றும் வதிவிடத்தை மறைத்து மாத்தறை, அம்பலாந்தோட்டை, காலி மற்றும் மாரவில போன்ற பகுதிகளில் அவ்வப்போது தற்காலிகமாக தங்கியிருந்து இந்த குற்றச் செயல்களை இயக்கி வந்துள்ளதாக மேலதிக விசாரணைகளில் தெரியவந்துள்ளது.