யாழ்ப்பாணம் மாவட்ட பாராளுமன்ற உறுப்பினர் இராமநாதன் அர்ச்சூனா இன்று (27) காலை இளவாலை பொலிஸாரால் கைது செய்யப்பட்டார். யாழ்ப்பாணம் பெரியவிளான் பிரதேசத்தில் இரு பெண்களுக்கு துப்பாக்கி காட்டி மரண அச்சுறுத்தல் விடுத்தமை, குற்றவியல் அத்துமீறல் மற்றும் சட்டவிரோதமாக காணிக்குள் பிரவேசித்தமை ஆகிய குற்றச்சாட்டுகளின் கீழ் அவர் கைது செய்யப்பட்டார்.
குறித்த சம்பவம் தொடர்பில் வாக்குமூலம் வழங்குவதற்காக இன்று காலை பாராளுமன்ற உறுப்பினர் பொலிஸ் நிலையத்திற்கு சென்ற சந்தர்ப்பத்தில் அவர் இவ்வாறு கைது செய்யப்பட்டார். அத்துடன், அவரது துப்பாக்கியும் பொலிஸ் பொறுப்பில் எடுக்கப்பட்டுள்ளது.இந்த கைதுக்கு காரணம் கடந்த 25ஆம் திகதி பெரியவிளான் பிரதேசத்தில் காணியொன்றில் ஏற்பட்ட கடும் பதற்ற நிலைமையாகும். குறித்த காணியை துப்பரவு செய்வதற்காக பாராளுமன்ற உறுப்பினர் அங்கு சென்ற சந்தர்ப்பத்தில், காணியின் உரிமை தொடர்பில் இரு பெண்களுடன் கடும் வாக்குவாதம் ஏற்பட்டுள்ளது. அப்போது கோபமடைந்த பாராளுமன்ற உறுப்பினர் தனது கையில் இருந்த பிஸ்டலை நீட்டி குறித்த பெண்களுக்கு பகிரங்கமாக மரண அச்சுறுத்தல் விடுக்கும் காட்சிகள் சமூக ஊடகங்கள் ஊடாகவும் பரவலாகப் பகிரப்பட்டன. அத்துடன், இந்த தகராறை சமாதானப்படுத்த வந்த பெண்களின் உறவினரான இளைஞன் ஒருவருக்கும் பாராளுமன்ற உறுப்பினரால் காலால் உதைக்கப்பட்டதாக உறவினர்கள் குற்றம் சாட்டியிருந்தனர்.
தகராறுக்கு வழிவகுத்த இந்த காணியின் எல்லைகள் மற்றும் உரிமை தொடர்பில் தற்போது நீதிமன்றத்தில் வழக்கு விசாரணையில் உள்ள பின்னணியில் இந்த மோதல் ஏற்பட்டுள்ளது. சம்பவம் நடந்த அன்று அந்த இடத்தில் இருந்த ஒரு சட்டத்தரணியும் குறித்த பெண்களுடன் வாதிட்டு சம்பவத்தை வீடியோ பதிவு செய்துள்ளார். எவ்வாறாயினும், மோதலுக்குப் பிறகு பாராளுமன்ற உறுப்பினர் இளவாலை பொலிஸில் செய்த முறைப்பாட்டின் படி, துப்பாக்கி அச்சுறுத்தலுக்கு உள்ளான ஒரு பெண் பொலிஸாரால் கைது செய்யப்பட்டு மல்லாகம் நீதிவான் நீதிமன்றத்தில் ஆஜர்படுத்தப்பட்ட பின்னர் எதிர்வரும் 29ஆம் திகதி வரை விளக்கமறியலில் வைக்கப்பட்டார். நீதிமன்றத்தின் விசேட அனுமதியுடன் அவரது ஒரு வயது குழந்தைக்கும் தாயுடன் சிறையில் தங்குவதற்கு அங்கு சந்தர்ப்பம் கிடைத்தது.
ஒரு பெண்ணுக்கு பகிரங்கமாக மரண அச்சுறுத்தல் விடுத்தமை மற்றும் இளைஞன் ஒருவரை தாக்கியமை தொடர்பில் பாராளுமன்ற உறுப்பினருக்கு எதிராக ஆரம்பத்தில் எந்த சட்ட நடவடிக்கையும் எடுக்கப்படாமை குறித்து கடும் கவனம் செலுத்தப்பட்டிருந்தது. ஆனால் குறித்த சம்பவம் தொடர்பில் மேற்கொள்ளப்பட்ட மேலதிக விசாரணைகளின் பின்னர் பாராளுமன்ற உறுப்பினர் இராமநாதன் அர்ச்சூனா இன்று இவ்வாறு கைது செய்யப்பட்டார். அவரை மல்லாகம் நீதிவான் நீதிமன்றத்தில் ஆஜர்படுத்துவதற்கு பொலிஸார் தற்போது நடவடிக்கைகளை மேற்கொண்டு வருகின்றனர்.
