சுற்றுலாவுக்காக இலங்கைக்கு வந்த ஜேர்மன் நாட்டுப் பெண் ஒருவர் திடீர் சுகவீனமடைந்த நிலையில் பேராதனை போதனா வைத்தியசாலையில் சிகிச்சை பெற்று வந்த நிலையில் உயிரிழந்துள்ளார். இவ்வாறு துரதிர்ஷ்டவசமாக உயிரிழந்தவர் அன்ட்ரியா சில்வியா என்ற ஐம்பத்தொன்பது வயதுடைய வெளிநாட்டுப் பெண் ஆவார்.
கடந்த 26ஆம் திகதி அவர் தனது கணவர் மற்றும் மேலும் சிலருடன் இலங்கைக்கு வந்துள்ளார். கொழும்பு மற்றும் ஹபரண பிரதேசங்களுக்குச் சென்று வந்த பின்னர், கடந்த 28ஆம் திகதி கண்டி பிரதேசத்திற்கு வந்துள்ளனர். அங்கு தொடம்வல லேடி மெக்லம் வீதியில் அமைந்துள்ள சுற்றுலா ஹோட்டல் ஒன்றில் தங்கியுள்ளனர். எவ்வாறாயினும், கடந்த 29ஆம் திகதி பகல் வேளையில் இந்த பெண் திடீர் சுகவீனமடைந்த நிலையில், ஹோட்டல் வளாகத்தில் உள்ள குளியலறைக்கு அருகில் திடீரென மயங்கி விழுந்துள்ளார்.
சம்பவத்தைக் கண்ட ஹோட்டல் ஊழியர்கள் உடனடியாகச் செயற்பட்டு அவரை பேராதனை போதனா வைத்தியசாலையில் அனுமதிப்பதற்கான நடவடிக்கைகளை மேற்கொண்ட போதிலும், அன்றைய தினம் பிற்பகலில் சிகிச்சை பெற்று வந்த நிலையிலேயே அவர் உயிரிழந்துள்ளார். பின்னர், ஹோட்டல் முகாமையாளர் இது தொடர்பாக கட்டுக்கஸ்தோட்டை பொலிஸில் முறைப்பாடு செய்துள்ளார். அதன்படி, பொலிஸின் பல்வேறு முறைப்பாட்டுப் பிரிவு உரிய விசாரணைகளை ஆரம்பித்துள்ளது.
உயிரிழந்த பெண்ணின் திடீர் மரண விசாரணை உடுநுவர திடீர் மரண விசாரணை அதிகாரி எஸ்.சி.கே. வீரகே அவர்களால் நடத்தப்பட்டது. பிரேத பரிசோதனை பேராதனை போதனா வைத்தியசாலையின் சட்ட வைத்திய அதிகாரி வைத்தியர் பாத்தலி வெதமுல்ல அவர்களால் கடந்த 31ஆம் திகதி மேற்கொள்ளப்பட்டது. நீண்டகாலமாக அவரது குடலில் இருந்த தொற்று நிலைமை தீவிரமடைந்ததே இந்த மரணத்திற்கு காரணம் என இதில் தெரியவந்துள்ளது. மேலும், இந்த நோய் நிலைமை காரணமாக சுமார் ஒரு மாதத்திற்கு முன்னர் அவர் சத்திரசிகிச்சைக்கும் உட்படுத்தப்பட்டுள்ளார் என்பதும் மேலதிக விசாரணைகளில் உறுதிப்படுத்தப்பட்டுள்ளது.
