ஹம்பாந்தோட்டை எரிபொருள் நிரப்பு நிலையத்திற்கு சமல் வழங்கிய காணி மீண்டும் செஞ்சிலுவைச் சங்கத்திற்கு

ஹம்பாந்தோட்டை பிரதேசத்தில் எரிபொருள் நிரப்பு நிலையம் அமைப்பதற்காக இலங்கை செஞ்சிலுவைச் சங்கத்திற்கு ஒதுக்கப்பட்டிருந்த காணியை வேறு தரப்பினருக்கு மாற்றுவதற்கு அதிகாரிகள் எடுத்த தீர்மானத்தை இரத்துச் செய்து மேன்முறையீட்டு நீதிமன்றம் ரிட் உத்தரவைப் பிறப்பித்துள்ளது. அதன்படி, குறித்த காணியை நீண்டகால குத்தகை அடிப்படையில் மீண்டும் செஞ்சிலுவைச் சங்கத்திற்கே வழங்குமாறு நீதிமன்றம் உத்தரவிட்டுள்ளது.

தமது சமூக சேவை நடவடிக்கைகளுக்கான நிதியை திரட்டும் நோக்குடன் ஹம்பாந்தோட்டை பிரதேசத்தில் எரிபொருள் நிரப்பு நிலையமொன்றை ஆரம்பிக்க செஞ்சிலுவைச் சங்க அதிகாரிகள் தீர்மானித்திருந்தனர். அப்போதைய காணி அமைச்சராக இருந்த சமல் ராஜபக்ஷ, அதற்காக 65 பேர்ச் காணியை ஒதுக்க ஒப்புதல் அளித்திருந்தார். எனினும், இந்த உடன்படிக்கையை மீறி, அதிகாரிகள் பின்னர் அந்தக் காணியை மாகம்புர சமூக அபிவிருத்தி அறக்கட்டளைக்கு வழங்க நடவடிக்கை எடுத்தனர். இந்தத் தீர்மானம் சட்டவிரோதமானது எனக் கூறி செஞ்சிலுவைச் சங்கம் நீதிமன்றத்தை நாடியது.

இந்த அநீதியான தீர்மானத்திற்கு எதிராக இலங்கை செஞ்சிலுவைச் சங்கத்தால் தாக்கல் செய்யப்பட்ட ரிட் மனு, மேன்முறையீட்டு நீதிமன்ற நீதிபதிகளான தம்மிக கணேபொல மற்றும் ஆதித்ய பட்டபெந்திகே ஆகியோர் முன்னிலையில் விசாரணைக்கு எடுத்துக்கொள்ளப்பட்டது. இதில் பிரதிவாதிகளாக காணி ஆணையாளர், வீதி அபிவிருத்தி அதிகார சபை, ஹம்பாந்தோட்டை மாவட்ட செயலாளர் மற்றும் மாகம்புர சமூக அபிவிருத்தி அறக்கட்டளை உள்ளிட்ட பல தரப்பினர் பெயரிடப்பட்டிருந்தனர்.

நீதிபதி ஆதித்ய பட்டபெந்திகே பகிரங்க நீதிமன்றத்தில் அறிவித்த தீர்ப்பில், மனுதாரர் நிறுவனம் குறித்த காணியைப் பெறுவதற்கு முழு எதிர்பார்ப்புடன் இருந்ததும், அது தொடர்பாக அரசாங்கத் தரப்பிலிருந்து முன்னர் ஒரு வாக்குறுதி கிடைத்திருந்ததும் தெளிவாகிறது. இவ்வாறான சூழ்நிலையில், செஞ்சிலுவைச் சங்கம் அந்தக் காணி தொடர்பான அனைத்து எதிர்பார்ப்புகளையும் கொண்டிருந்தபோது, அதை வேறு நிறுவனத்திற்கு மாற்றுவதற்கு அதிகாரிகள் எடுத்த முடிவு சட்டவிரோதமான செயல் என்று நீதிமன்றம் வலியுறுத்தியது.

இந்த வழக்கு விசாரணையில் மனுதாரர் செஞ்சிலுவைச் சங்கம் சார்பில் ஜனாதிபதி சட்டத்தரணி சலிய பீரிஸ் ஆஜரானார். பிரதிவாதி நிறுவனம் சார்பில் ஜனாதிபதி சட்டத்தரணி குவேர டி சொய்சா வாதங்களை முன்வைத்தார். மேலும், பிரதிவாதி சட்டமா அதிபர் சார்பில் பிரதி சொலிசிட்டர் ஜெனரல் சாயா ஸ்ரீ நம்முனி நீதிமன்றத்தில் ஆஜரானார்.