கட்டுநாயக்க பண்டாரநாயக்க சர்வதேச விமான நிலையம் மற்றும் அதன் சுற்றுவட்டாரப் பகுதிக்கு திடீரென பெய்த கனமழை காரணமாக, விமான நிலையத்திற்கு வந்த ஆறு விமானங்கள் தரையிறங்க முடியாமல் உயரமான வானத்தில் காத்திருக்க வேண்டியிருந்தது என்பதை விமான நிலைய பொறுப்பு அதிகாரி உறுதிப்படுத்தினார். கடந்த 31ஆம் திகதி இரவு 9.45 மணியளவில் திடீரென இந்த மோசமான வானிலை நிலைமை உருவாகியுள்ளதுடன், இதன் காரணமாக விமானங்கள் தரையிறங்குவது குறிப்பிடத்தக்க நேரத்திற்கு தாமதமாகியுள்ளது.
இவ்வாறு தரையிறங்க முடியாமல் வானில் வட்டமிட்ட விமானங்களில் சீனாவின் குன்மிங்கில் இருந்து வந்த சைனா ஈஸ்டர்ன் விமானம் ஒன்று, துபாயில் இருந்து வந்த எமிரேட்ஸ் விமானம் ஒன்று மற்றும் தாய்லாந்தின் பாங்கொக்கில் இருந்து வந்த ஏர் ஏசியா விமானம் ஒன்று ஆகியவை அடங்கும். அத்துடன், மெல்போர்ன், இந்தியாவின் சென்னை மற்றும் பாகிஸ்தானின் லாகூர் ஆகிய நகரங்களில் இருந்து வந்த ஸ்ரீலங்கன் விமான சேவைக்கு சொந்தமான மூன்று விமானங்களும் இந்த மோசமான வானிலை காரணமாக சிரமத்திற்கு உள்ளாகியிருந்தன.
இந்த விமானங்களில், இரவு 9.49 மணிக்கு கட்டுநாயக்கவில் தரையிறங்கவிருந்த சீனாவின் குன்மிங்கில் இருந்து வந்த விமானம் ஒரு மணி நேரத்திற்கு அருகில் வானத்தில் காத்திருக்க வேண்டியிருந்தது. அவ்வாறு நீண்ட நேரம் வானில் வட்டமிட்டதன் காரணமாக அந்த விமானத்தின் எரிபொருள் அளவு படிப்படியாகக் குறைந்துள்ளதால், அதன்படி, ஒரு பாதுகாப்பு நடவடிக்கையாக இரவு 10.50 மணியளவில் அந்த விமானத்தை மத்தள சர்வதேச விமான நிலையத்திற்கு திருப்பிவிட அதிகாரிகள் நடவடிக்கை எடுத்துள்ளனர்.
பின்னர் கட்டுநாயக்க விமான நிலையத்தைச் சுற்றியிருந்த மோசமான வானிலை நிலைமை நீங்கியவுடன், மத்தளவுக்கு திருப்பி அனுப்பப்பட்ட சைனா ஈஸ்டர்ன் விமானம் அடுத்த நாள் (01) அதிகாலை 1.01 மணிக்கு மீண்டும் கட்டுநாயக்கவுக்கு வந்துள்ளது. அதன்பின் அதிகாலை 2.15 மணியளவில் பயணிகளை ஏற்றிக்கொண்டு அந்த விமானம் மீண்டும் சீனாவின் குன்மிங் நகரை நோக்கி புறப்பட்டுச் சென்றுள்ளது. வானிலை சீரடைந்ததன் காரணமாக அதுவரை உயரமான வானத்தில் வட்டமிட்டுக் கொண்டிருந்த ஏனைய ஐந்து விமானங்களும் எந்தவித இடையூறும் இன்றி கட்டுநாயக்க விமான நிலையத்தில் பாதுகாப்பாக தரையிறக்க நடவடிக்கை எடுக்கப்பட்டதாக பொறுப்பு அதிகாரி மேலும் தெரிவித்தார்.