எரிபொருள் விலை உயர்வுக்கு இணையாக அமுல்படுத்தப்பட்ட 12.5 சதவீத பேருந்துக் கட்டண திருத்தத்தைப் பயன்படுத்தி, தனியார் பேருந்து ஊழியர்கள் பயணிகளிடம் தன்னிச்சையாக கட்டணம் வசூலிப்பதாக கடும் எதிர்ப்பு கிளம்பியுள்ளது. குறிப்பாக, மேல் மாகாணத்தை மையமாகக் கொண்டு இயங்கும் பல தனியார் பேருந்துகளின் நடத்துநர்கள் நிர்ணயிக்கப்பட்ட கட்டணத்தை விட அதிக தொகையை பயணிகளிடம் வசூலிப்பதாக தெரிவிக்கப்பட்டுள்ளது.
புதிய கட்டண உயர்வு அமுல்படுத்தப்பட்டு ஒரு வார காலமாகியும், எந்தவொரு பேருந்திலும் திருத்தப்பட்ட புதிய கட்டணப் பட்டியல் காட்சிப்படுத்தப்படாமை இந்த சிக்கலை மேலும் தீவிரப்படுத்தியுள்ளது. அத்துடன், பயணிக்கும் தூரம் மற்றும் அதற்கான கட்டணம் குறிப்பிடப்பட்ட பயணச்சீட்டு பயணிகளுக்கு வழங்கப்படுவது பல பிரதேசங்களில் முழுமையாக தவிர்க்கப்பட்டுள்ளதால், பொதுமக்கள் பெரும் குழப்பத்திற்கும் சிரமத்திற்கும் ஆளாகியுள்ளனர்.
இது தவிர, பத்து ரூபாய்க்கும் குறைவான மீதிப் பணத்தை பயணிகளுக்கு வழங்க மறுக்கும் சில நடத்துநர்கள், சில்லறை இல்லை என்று கூறி அந்தப் பணத்தையும் தங்களுக்குச் சொந்தமாக்கிக் கொள்வதாக பயணிகள் புகார் தெரிவிக்கின்றனர். தினசரி அவர்களுக்கு கிடைக்கும் சில்லறை நாணயங்களை மறுநாள் சேவைக்கு வரும்போது பேருந்துக்கு கொண்டு வராததால் இந்த செயற்கையான சில்லறைத் தட்டுப்பாடு ஏற்பட்டுள்ளது.
இந்த அநியாயமான செயல் காரணமாக தினசரி பொதுப் போக்குவரத்தைப் பயன்படுத்தும் பயணிகள் பெரும் சிரமங்களை எதிர்கொள்கின்றனர். எனவே, அனைத்துப் பேருந்துகளிலும் புதிய பேருந்துக் கட்டணப் பலகைகளை உடனடியாகக் காட்சிப்படுத்தவும், ஒவ்வொரு பயணிக்கும் கட்டாயம் பயணச்சீட்டு வழங்குவதை உறுதிப்படுத்தவும் சம்பந்தப்பட்ட அதிகாரிகள் விரைந்து நடவடிக்கை எடுக்க வேண்டும் என்று அவர்கள் வலியுறுத்துகின்றனர்.