கர்ப்ப காலத்தில் தாயின் கருப்பையில் உள்ள குழந்தையின் நிலையைத் தொடர்ந்து கண்காணிக்க அணியக்கூடிய அல்ட்ராசவுண்ட் (ultrasound) பேட்ச் ஒன்றை விஞ்ஞானிகள் குழு வெற்றிகரமாக உருவாக்கியுள்ளது. இந்த புதிய கண்டுபிடிப்பின் முக்கிய நோக்கம், கர்ப்ப காலத்தில் ஏற்படக்கூடிய சிக்கல்களை முன்கூட்டியே கண்டறிய உதவுவதாகும்.
தற்போதுள்ள பாரம்பரிய அல்ட்ராசவுண்ட் ஸ்கேன் பரிசோதனைகள் குழந்தையின் இதயத்துடிப்பு மற்றும் கருப்பை சுருக்கங்களை கண்காணித்தாலும், அவை பெரும்பாலும் தவறான எச்சரிக்கைகளை வழங்குவதாகவும், அதற்கு சிறப்பு பயிற்சி பெற்ற ஒருவரின் உதவி அத்தியாவசியம் என்றும் ஆராய்ச்சியாளர்கள் சுட்டிக்காட்டுகின்றனர். ஸ்டான்போர்ட் பல்கலைக்கழகப் பேராசிரியர் ஷெங் ஷு (Sheng Xu) குறிப்பிட்டது போல, தற்போதுள்ள கருவிகள் குழந்தையின் நிலையைப் பற்றிய ஒரு குறிப்பிட்ட தருணத்தின் படங்களை மட்டுமே வழங்குவதால், மருத்துவமனை வருகைகளுக்கு இடையில் பல முக்கியமான தகவல்கள் விடுபட்டுப் போகலாம்.இந்த பிரச்சனைக்கு ஒரு வெற்றிகரமான தீர்வாக, தொடர்ச்சியான தரவுகளைப் பெறக்கூடிய இந்த அணியக்கூடிய புதிய கருவி செயல்படுகிறது. இதன் மூலம் எந்த இடத்திலும் தாய் மற்றும் குழந்தையின் நிலையை கண்காணிக்க முடியும், மேலும் நோயாளியின் அடிப்படை அறிகுறிகளைக் கண்டறிந்து அவற்றில் ஏற்படும் மாற்றங்களை பகுப்பாய்வு செய்ய மருத்துவர்களுக்கு வாய்ப்பு கிடைக்கும். இது துல்லியமான நோயறிதல்களை அடைய உதவும். இந்த கருவி மூலம் கருப்பையில் உள்ள கருவின் படங்கள் மற்றும் தொப்புள் கொடி போன்ற நகரும் கட்டமைப்புகளில் இரத்த ஓட்டத்தை கூட உண்மையான நேரத்தில் (real-time) பல மணிநேரம் தொடர்ந்து கண்காணிக்க முடியும். தற்போது, இந்த கருவி வெளிப்புற மின்னணு சாதனங்களுடன் கம்பிகள் மூலம் இணைக்கப்பட்ட ஒரு அடிப்படை கருத்தாக்க மாதிரியாக (proof-of-concept) உள்ளது, மேலும் அதை முதல் முறையாக அணியும்போது சரியான இடத்தைக் கண்டறிய பாரம்பரிய ஸ்கேன் இயந்திரத்தின் உதவி தேவைப்படும். இருப்பினும், "UPatch" என்று பெயரிடப்பட்டுள்ள இந்த தொழில்நுட்பம் இத்தகைய முதல் கண்டுபிடிப்பாகக் கருதப்படுகிறது.
'Nature Biotechnology' இதழில் வெளியிடப்பட்ட இந்த ஆய்வு அறிக்கையின்படி, குழந்தை கருப்பையில் நகரும்போது சிக்னல்கள் இழக்கப்படுதல் மற்றும் இரத்த நாளங்களின் ஆழமான இருப்பிடம் காரணமாக பலவீனமான சிக்னல்களைப் பெறுதல் போன்ற சவால்களை சமாளிக்க பல்வேறு மின்னணு சாதனங்கள் மற்றும் அல்காரிதம்கள் பயன்படுத்தப்பட்டுள்ளன. இந்த ஆய்வுக்காக அமெரிக்கா மற்றும் ஐக்கிய இராச்சியத்தில் மருத்துவ பரிசோதனைகள் நடத்தப்பட்டுள்ளன. 62 கர்ப்பிணிப் பெண்களைப் பயன்படுத்தி நடத்தப்பட்ட ஒரு சோதனையில், இந்த புதிய அணியக்கூடிய UPatch கருவி மற்றும் பாரம்பரிய கையடக்க ஸ்கேன் இயந்திரங்களில் இருந்து பெறப்பட்ட இரத்த ஓட்டத் தரவுகள் ஒன்றுக்கொன்று மிக நெருக்கமாகப் பொருந்தியதாக கலிபோர்னியா பல்கலைக்கழகத்தின் (UC San Diego) பொறியியல் பீடத்தின் முனைவர் பட்ட மாணவரும், ஆய்வின் முக்கிய ஆசிரியருமான டாம் பார்க் (Tom Park) தெரிவித்தார்.
இந்த கருவியைப் பயன்படுத்தி 52 கர்ப்பிணிப் பெண்களின் குழந்தைகளின் இதயத்துடிப்பு மற்றும் இரத்த ஓட்டம் தொடர்ந்து கண்காணிக்கப்பட்டது, ஒரு சந்தர்ப்பத்தில் கருப்பையில் வளர்ச்சி குறைபாட்டின் கடுமையான நிலைமையை ஆராய்ச்சியாளர்களால் முன்கூட்டியே கண்டறிய முடிந்தது. இதன் மூலம் நிகழவிருந்த ஒரு சிசு மரணத்தைத் தவிர்த்து, சிசேரியன் அறுவை சிகிச்சை மூலம் குழந்தையை பாதுகாப்பாக வெளியே எடுக்க மருத்துவர்கள் வெற்றி பெற்றனர். கருவின் இரத்த ஓட்டம் காலப்போக்கில் மாறும் தன்மை கொண்டது என்பதால், குறுகிய கால ஸ்கேன் பரிசோதனைகளை மட்டும் நம்பியிருப்பதில் உள்ள ஆபத்தை இது தெளிவாக விளக்குகிறது என்று பார்க் வலியுறுத்துகிறார். தற்போது, ஆய்வு குழு அன்றாட வாழ்க்கையிலும் வீட்டிலும் சாதாரண நடவடிக்கைகளில் ஈடுபடும்போது பயன்படுத்தக்கூடிய இந்த தொழில்நுட்பத்தின் வயர்லெஸ் (wireless) பதிப்பை உருவாக்கி வருகிறது.
ஆக்ஸ்போர்டு பல்கலைக்கழகத்தின் மூத்த ஆசிரியர் டாக்டர் அன்டோனியா ஜார்ஜீவா (Antoniya Georgieva) கருத்துப்படி, இந்த தொழில்நுட்பம் நடைமுறையில் எவ்வாறு பயன்படுத்தப்படலாம் என்பதைக் காட்டும் ஒரு மிக முக்கியமான மைல்கல்லாகும். குறைந்த மற்றும் நடுத்தர வருவாய் கொண்ட நாடுகள் போன்ற வரையறுக்கப்பட்ட வளங்களைக் கொண்ட பகுதிகளுக்கு இத்தகைய அணியக்கூடிய சாதனங்கள் மிகவும் பொருத்தமானவை என்று பேராசிரியர் ஷு சுட்டிக்காட்டுகிறார். சிசு மரணங்களைத் நேரடியாகத் தடுப்பதற்கான பெரிய ஆற்றல் இந்த தொழில்நுட்பத்தில் உள்ளது, மேலும் கருப்பையில் சில குழந்தைகள் ஏன் பாதுகாப்பாக வாழ்கிறார்கள், மற்ற குழந்தைகள் ஏன் இழக்கப்படுகிறார்கள் என்பது குறித்த முக்கியமான அறிவியல் புரிதலைப் பெறவும் இந்த தொடர்ச்சியான தரவுகள் எதிர்காலத்தில் வழிவகுக்கும்.
