மேற்கிந்தியத் தீவுகள் அணிக்கு எதிரான கிரிக்கெட் தொடருக்காக இலங்கை தேசிய கிரிக்கெட் அணி இன்று (26) தீவிலிருந்து புறப்படுகிறது. இந்த சுற்றுப்பயணத்தில் இரண்டு டெஸ்ட் போட்டிகள், மூன்று ஒருநாள் போட்டிகள் மற்றும் மூன்று இருபதுக்கு - 20 போட்டிகள் அடங்கும். தொடரின் முதல் ஒருநாள் போட்டி அடுத்த மாதம் 03 ஆம் திகதி கிங்ஸ்டன் நகரில் ஆரம்பமாகவுள்ளது.
இலங்கை அணியின் புதிய தலைமைப் பயிற்சியாளராக கேரி கிர்ஸ்டன் நியமிக்கப்பட்ட பின்னர் இலங்கை அணி எதிர்கொள்ளும் முதல் சர்வதேச கிரிக்கெட் தொடர் இது என்பதும் குறிப்பிடத்தக்கது.இந்தத் தொடருக்காக பெயரிடப்பட்ட அணிகளின் தலைமைப் பதவிகளில் சில குறிப்பிடத்தக்க மாற்றங்கள் செய்யப்பட்டுள்ளன. அதன்படி, ஒருநாள் மற்றும் இருபதுக்கு - 20 அணிகள் இரண்டின் தலைமைப் பதவியும் குசல் மெண்டிஸிடம் ஒப்படைக்கப்பட்டுள்ளதுடன், தனஞ்சய டி சில்வா டெஸ்ட் அணியின் தலைவராகத் தொடர்ந்து செயற்படுவார். மூன்று வடிவங்களிலும் உள்ள அணிகளின் உப தலைவராக கமிந்து மெண்டிஸ் பெயரிடப்பட்டிருப்பது ஒரு குறிப்பிடத்தக்க விடயமாகும். இந்த தலைமைத்துவ மாற்றங்கள் காரணமாக, முன்னாள் ஒருநாள் தலைவர் சரித் அசலங்க மற்றும் முன்னாள் இருபதுக்கு - 20 தலைவர் தசுன் ஷானக ஆகியோர் சாதாரண வீரர்களாக அணியில் சேர்க்கப்பட்டுள்ளனர். தற்போதைய சர்வதேச கிரிக்கெட் கவுன்சில் தரவரிசையின்படி, இலங்கை டெஸ்ட் மற்றும் ஒருநாள் பிரிவுகளில் 6வது இடத்திலும், இருபதுக்கு - 20 பிரிவில் 9வது இடத்திலும் உள்ளது.
விளையாட்டுத்துறை அமைச்சர் அண்மையில் இலங்கை கிரிக்கெட் தெரிவுக்குழுவை மாற்றியமைத்த போதிலும், இந்த மேற்கிந்தியத் தீவுகள் சுற்றுப்பயணத்திற்கான வீரர்கள், பிரமோத்யா விக்ரமசிங்கவின் தலைமையில் இருந்த முந்தைய தெரிவுக்குழுவால் தேர்ந்தெடுக்கப்பட்டுள்ளனர். 2027 ஒருநாள் உலகக் கோப்பையை இலக்காகக் கொண்டு குசல் மெண்டிஸுக்கு வரையறுக்கப்பட்ட ஓவர் தலைமைப் பதவி வழங்கப்பட்டுள்ளதாகவும், கமிந்து மெண்டிஸ் உப தலைவராக நியமிக்கப்பட்டிருப்பதும் அடுத்த சில ஆண்டுகளுக்கான பரந்த பார்வையுடன் என்றும் தெரிவிக்கப்பட்டுள்ளது. எவ்வாறாயினும், எதிர்காலத்தில் ஏற்படக்கூடிய சூழ்நிலைகளின் அடிப்படையில் நியாயமான காரணங்களுக்காக வரையறுக்கப்பட்ட ஓவர் தலைமைப் பதவியில் மாற்றம் ஏற்பட வாய்ப்புள்ளதாகவும் குறிப்பிடப்பட்டுள்ளது. மேலும், நியூசிலாந்து 'ஏ' அணிக்கு எதிராக பேட்டிங்கில் சிறப்பாக செயல்பட்டு, முதல் தரப் போட்டிகளில் 130 விக்கெட்டுகளை வீழ்த்தியுள்ள இடது கை சுழற்பந்து வீச்சு சகலதுறை வீரர் சொனால் தினூஷ டெஸ்ட் அணிக்கு முதல் முறையாக அழைக்கப்பட்டுள்ளார்.
இந்தத் தொடருக்காக பெயரிடப்பட்ட இலங்கை டெஸ்ட் அணியில் தனஞ்சய டி சில்வா (தலைவர்), கமிந்து மெண்டிஸ் (உப தலைவர்), பதும் நிஸ்ஸங்க, லஹிரு உதார, நிஷான் மதுஷ்க, தினேஷ் சந்திமால், பசிந்து சூரியபண்டார, சொனால் தினூஷ, குசல் மெண்டிஸ், மிலான் ரத்நாயக்க, பிரபாத் ஜெயசூரிய, ரமேஷ் மெண்டிஸ், அசித பெர்னாண்டோ, விஷ்வ பெர்னாண்டோ, லஹிரு குமார, இசித விஜேசுந்தர மற்றும் கசுன் ராஜித ஆகியோர் இடம்பெற்றுள்ளனர்.
ஒருநாள் தொடரில் இலங்கை அணியை பிரதிநிதித்துவப்படுத்தும் அணியில் குசல் மெண்டிஸ் (தலைவர்), கமிந்து மெண்டிஸ் (உப தலைவர்), பதும் நிஸ்ஸங்க, கமில் மிஷார, பவன் ரத்நாயக்க, ஜனித் லியனகே, சரித் அசலங்க, மிலான் ரத்நாயக்க, வனிந்து ஹசரங்க, துனித் வெல்லாலகே, மஹீஷ் தீக்ஷன, துஷ்மந்த சமீர, தில்ஷான் மதுஷங்க, இஷான் மாலிங்க, அசித பெர்னாண்டோ மற்றும் பிரமோத் மதுஷான் ஆகியோர் தேர்ந்தெடுக்கப்பட்டுள்ளனர்.
இருபதுக்கு - 20 தொடருக்கான இலங்கை அணியில் குசல் மெண்டிஸ் (தலைவர்), கமிந்து மெண்டிஸ் (உப தலைவர்), பதும் நிஸ்ஸங்க, கமில் மிஷார, லசித் குரூஸ்புள்ளே, பவன் ரத்நாயக்க, தசுன் ஷானக, மிலான் ரத்நாயக்க, துனித் வெல்லாலகே, வனிந்து ஹசரங்க, மஹீஷ் தீக்ஷன, துஷ்மந்த சமீர, தில்ஷான் மதுஷங்க, இஷான் மாலிங்க, பினுர பெர்னாண்டோ மற்றும் நுவன் துஷார ஆகியோர் சேர்க்கப்பட்டுள்ளனர்.