ருமேனியாவில் வேலைவாய்ப்பு வழங்குவதாக உறுதியளித்து மேற்கொள்ளப்பட்ட நிதி மோசடி தொடர்பில் இலங்கை பொதுஜன பெரமுனவை பிரதிநிதித்துவப்படுத்திய ஹங்குரன்கெத்த பிரதேச சபையின் முன்னாள் உறுப்பினர் ஒருவர் கைது செய்யப்பட்டதாக இலங்கை வெளிநாட்டு வேலைவாய்ப்பு பணியகம் தெரிவித்துள்ளது. பணியகத்தின் சிறப்பு விசாரணைப் பிரிவின் அதிகாரிகளால் கடந்த மே மாதம் முதலாம் திகதி இந்த சந்தேகநபர் கைது செய்யப்பட்டுள்ளார்.
சந்தேகநபரான முன்னாள் உறுப்பினரும் அவரது மனைவியும் இணைந்து 16 பேரிடம் இருந்து சுமார் 21.3 மில்லியன் ரூபாவை இவ்வாறு மோசடி செய்துள்ளதாக குற்றச்சாட்டுகள் முன்வைக்கப்பட்டுள்ளன. ருமேனியாவில் கட்டுமானத் துறையில் வேலைவாய்ப்பு வழங்குவதாகக் கூறி அவர்கள் இந்த பணத்தைப் பெற்றுக்கொண்டதாகவும், பணத்தைப் பெற்ற பிறகு சம்பந்தப்பட்டவர்களுக்கு போலியான வேலை ஒப்பந்தங்களையும் வழங்கியதாகவும் முறைப்பாட்டாளர்கள் மேலும் குற்றம் சாட்டியுள்ளனர்.
இந்த முக்கிய சந்தேகநபர் இதற்கு முன்னர் சுமார் இரண்டு வருடங்கள் ருமேனியாவில் பணிபுரிந்துள்ளார் என்றும், அங்கு பெற்ற அனுபவத்தைப் பயன்படுத்தி இந்த மோசடியை மிகவும் சூட்சுமமாக செயல்படுத்தியுள்ளார் என்றும் விசாரணைகளில் தெரியவந்துள்ளது.
சம்பந்தப்பட்ட சம்பவம் தொடர்பில் குற்றச்சாட்டுகள் முன்வைக்கப்பட்டதை அடுத்து, ரிகில்லகஸ்கட பிரதேசத்தில் உள்ள தனது வீட்டிலிருந்து தப்பிச் சென்று கடுகண்ணாவ பிரதேசத்தில் உள்ள வாடகை வீட்டில் மறைந்திருந்தபோது அதிகாரிகள் சந்தேகநபரை கண்டுபிடித்துள்ளனர். இந்த முழுமையான விசாரணை நடவடிக்கைகளுக்கும் அரச புலனாய்வு சேவையின் (SIS) அதிகாரிகளின் உதவியும் கிடைத்துள்ளது.