ஒரு தனியார் பயிற்சி வகுப்புக்குச் சென்று வீடு திரும்பிக் கொண்டிருந்த 17 வயது பாடசாலை மாணவியை ஏமாற்றி, மோட்டார் சைக்கிளில் கடத்த முயன்ற முன்னாள் இராணுவ வீரர் ஒருவர் தெனியாய பொலிஸாரால் கடந்த 14ஆம் திகதி சந்தேகத்தின் பேரில் கைது செய்யப்பட்டுள்ளார். சந்தேகநபர் இந்த யுவதியை கடத்திச் சென்றது, அவர் கழுத்தில் அணிந்திருந்த தங்கச் சங்கிலியைக் கொள்ளையடிக்கும் நோக்கத்துடன் என்பது பொலிஸ் விசாரணைகளின் போது தெரியவந்துள்ளது.
குறித்த மாணவி வகுப்பு முடிந்து வீதியில் சென்று கொண்டிருந்த போது, மோட்டார் சைக்கிளில் வந்த இந்த நபர் அவர் அருகில் நிறுத்தியுள்ளார். தான் அவளது தந்தையின் நெருங்கிய நண்பர் என்றும், வீட்டின் அருகில் கொண்டு சென்று விடுவதாகவும் கூறி, அவளை மோட்டார் சைக்கிளில் ஏற்றியுள்ளார். அவரது கூற்று உண்மை என்று நம்பிய மாணவியும் எந்த சந்தேகமும் இன்றி மோட்டார் சைக்கிளின் பின் இருக்கையில் ஏறியுள்ளார்.
இருப்பினும், பாதுகாப்பு தலைக்கவசம் (ஹெல்மெட்) அணியாமல் ஒரு யுவதி மோட்டார் சைக்கிளில் செல்வதைக் கண்ட வீதியில் கடமையில் ஈடுபட்டிருந்த இரண்டு பொலிஸ் அதிகாரிகள் இந்த மோட்டார் சைக்கிளை நிறுத்தி சோதனை செய்துள்ளனர். அப்போது மோட்டார் சைக்கிள் ஓட்டுநர் முரண்பட்ட கருத்துக்களை தெரிவித்ததால் சந்தேகமடைந்த பொலிஸ் அதிகாரிகள் மாணவியிடமும் விசாரித்துள்ளனர். பின்னர் மேற்கொள்ளப்பட்ட விரிவான விசாரணைகளில், இந்த நபர் மாணவியின் தந்தைக்கு எந்த வகையிலும் அறிமுகமானவர் அல்ல என்பது தெரியவந்துள்ளது.
தங்கச் சங்கிலியைக் கொள்ளையடிக்கும் நோக்கத்துடன் இந்த குற்றத்தைச் செய்ததாக ஒப்புக்கொண்ட சந்தேகநபர் குருவிட்ட பிரதேசத்தைச் சேர்ந்தவர். அண்மையில் மொணராகலை பிரதேசத்திலும் இதேபோன்று ஒரு சிறுமியை கடத்தி அவளது தங்க நகைகளை கொள்ளையடித்தவர் என்பது பொலிஸ் விசாரணைகளில் மேலும் தெரியவந்துள்ளது. அது தொடர்பாகவும் பொலிஸார் விசேட விசாரணைகளை ஆரம்பித்துள்ளனர்.
தென் மாகாணத்திற்குப் பொறுப்பான சிரேஷ்ட பிரதிப் பொலிஸ் மா அதிபர் வசந்த கித்ஸிரி ஜயலத் அவர்களின் நேரடி மேற்பார்வையின் கீழ் மற்றும் மாத்தறை பிரிவுக்குப் பொறுப்பான சிரேஷ்ட பொலிஸ் அத்தியட்சகர் வசந்த குமார அவர்களின் அறிவுறுத்தலின் பேரில், தெனியாய பொலிஸ் நிலைய பொறுப்பதிகாரி பிரதான பொலிஸ் பரிசோதகர் சந்தன அமரரத்ன உள்ளிட்ட அதிகாரிகள் குழுவினர் இது தொடர்பான மேலதிக விசாரணைகளை மேற்கொண்டு வருகின்றனர்.