கொம்பஞ்ஞவீதிய பிரதேசத்தில் அமைந்துள்ள அல்டேர் ஆடம்பர குடியிருப்பு தொகுதியின் 67வது மாடியில் இருந்து கீழே விழுந்து மாணவன் மற்றும் மாணவி உயிரிழந்த சம்பவம் தொடர்பில் விரிவான விசாரணையை நடத்தி விரிவான அறிக்கையை சமர்ப்பிக்குமாறு கோட்டை நீதவான் பசன் அமரசேன கொம்பஞ்ஞவீதிய பொலிஸாருக்கு உத்தரவிட்டுள்ளார்.
கடந்த 2024 ஆம் ஆண்டு இடம்பெற்ற இந்த துரதிர்ஷ்டவசமான சம்பவம் தொடர்பான விசாரணையின் முன்னேற்றத்தை விசாரிப்பதற்காக உயிரிழந்த மாணவனின் தாயார் சார்பில் ஜனாதிபதி சட்டத்தரணி மைத்ரி குணரத்ன சமர்ப்பித்த மனுவை பரிசீலித்த பின்னர் நீதவான் இந்த உத்தரவை பிறப்பித்துள்ளார். இந்த மரணங்கள் தொடர்பான நீதவான் விசாரணை இதுவரை நடத்தப்படவில்லை என ஜனாதிபதி சட்டத்தரணி நீதிமன்றத்தில் தெரிவித்தார்.
இந்த விடயங்களுக்கு பதிலளித்த கொம்பஞ்ஞவீதிய பொலிஸார், குறித்த சம்பவம் தொடர்பில் திடீர் மரண விசாரணை அதிகாரி மரண விசாரணையை நடத்தியுள்ளதாக நீதிமன்றத்தில் தெரிவித்தனர். மேலும், தேவையான சாட்சியங்களை அழைத்த பின்னர், அடுத்த ஒரு வார காலத்திற்குள் நீதவான் விசாரணையை நடத்த நடவடிக்கை எடுக்கப்படும் என்றும் பொலிஸார் நீதிமன்றத்தில் குறிப்பிட்டனர்.
மேலும், உயிரிழந்த மாணவன் மற்றும் மாணவி பயன்படுத்திய இரண்டு கைபேசிகளின் சிம் கார்டுகள் தொடர்பான தொலைபேசி தரவு பகுப்பாய்வு அறிக்கைகளை கொம்பஞ்ஞவீதிய பொலிஸ் நிலையத்திற்கு வழங்குமாறு முந்தைய நீதவான் ஏற்கனவே உத்தரவிட்டிருந்ததும் இங்கு தெரியவந்துள்ளது.
