வாகன இறக்குமதியின்போது விதிக்கப்படும் மேலதிகக் கட்டணத்தை 50 சதவீதத்தால் அதிகரிக்க அரசாங்கம் நடவடிக்கை எடுத்துள்ளது. கடந்த 15ஆம் திகதி முதல் மூன்று மாத காலப்பகுதிக்கு அமுலுக்கு வரும் வகையில் நடைமுறைப்படுத்தப்பட்டுள்ள இந்த வரித் திருத்தம் காரணமாக, எதிர்காலத்தில் நாட்டில் வாகனங்களின் விலைகள் நிச்சயமாக உயரும் என வாகன இறக்குமதியாளர்கள் தெரிவிக்கின்றனர்.
இதன் மூலம் இத்துறைக்கு நேரடி மற்றும் மறைமுக தாக்கங்கள் பல ஏற்பட்டுள்ளன. சந்தையில் வாகன விலைகள் குறையாததால், அதிகரிக்கப்பட்ட மேலதிகக் கட்டணத்தை வாகன விற்பனையாளர்களால் தனியாக தாங்கிக்கொள்ள முடியவில்லை. இதனால், மத்தியதர வர்க்கத்தினரிடையே மிகவும் பிரபலமான சிறிய ரக வாகனங்களின் விலை 5 லட்சம் ரூபாய் முதல் 10 லட்சம் ரூபாய் வரை உயரும் என அவர்கள் சுட்டிக்காட்டுகின்றனர்.புதிய வரி முறையின் கீழ், புதிய வாகனங்களை வெளியிடும்போது, சிறிய மோட்டார் வாகனத்திற்கு கூட 5 லட்சம் முதல் 10 லட்சம் ரூபாய் வரை கூடுதல் தொகையை வரியாக செலுத்த வாகன விற்பனையாளர்கள் நிர்பந்திக்கப்பட்டுள்ளனர். இந்தச் செலவு இறுதியில் நுகர்வோரிடமிருந்து வசூலிக்கப்பட வேண்டியிருப்பதால், வாகன விலைகள் உயர்வதைத் தடுக்க முடியாது என்று அவர்கள் கூறுகின்றனர். அதன்படி, தற்போது சுமார் 70 லட்சம் ரூபாய்க்கு விற்கப்படும் ஜப்பானிய ஆல்டோ காரின் விலை 75 லட்சம் ரூபாய் வரை அதிகரிக்கும் என எதிர்பார்க்கப்படுகிறது. மேலும், சுமார் 100 லட்சம் ரூபாய்க்கு விற்கப்படும் டொயோட்டா யாரிஸ் வகை மோட்டார் காரின் விலையும் எதிர்காலத்தில் மேலும் 7.5 லட்சம் ரூபாய் வரை உயரும் என வாகன இறக்குமதியாளர்கள் சுட்டிக்காட்டியுள்ளனர்.
இதற்கிடையில், இந்தியாவிலிருந்து ஒரு வாகனத்தை நாட்டிற்கு கொண்டு வர இரண்டு வாரங்கள் போன்ற குறுகிய காலமே ஆவதால், அங்கிருந்து இறக்குமதி செய்யப்பட்ட வாகனங்களின் விலைகள் ஏற்கனவே சந்தையில் உயர்ந்துள்ளதாக தகவல்கள் தெரிவிக்கின்றன. இருப்பினும், இந்த புதிய மேலதிகக் கட்டணம் விதிக்கப்படுவதற்கு முன்னர் நாட்டிற்கு இறக்குமதி செய்யப்பட்ட வாகனங்களின் விலைகளில் எந்த மாற்றமும் ஏற்படவில்லை என்றும் கூறப்படுகிறது. இதன் காரணமாக, பழைய விலைகளில் உள்ள வாகனங்கள் சந்தையில் இருக்கும்போது, அதிக விலையுள்ள புதிதாக இறக்குமதி செய்யப்படும் வாகனங்களை வாங்குவதற்கு நுகர்வோர் தயக்கம் காட்டுவதாக இறக்குமதியாளர்கள் தெரிவிக்கின்றனர்.
தற்போதைய சூழ்நிலையில், சந்தையில் தற்போதுள்ள வாகன இருப்புக்கள் விற்றுத் தீரும் வரை புதிய வாகனங்களை இறக்குமதி செய்வதைத் முடிந்தவரை தவிர்ப்பதற்கு இறக்குமதியாளர்கள் தீர்மானித்துள்ளனர். இந்த முடிவின் விளைவாக, கடந்த 15ஆம் திகதிக்குப் பிறகு வாகன இறக்குமதிக்காக திறக்கப்படும் கடன் கடிதங்களின் (LC) அளவும் கணிசமான அளவில் குறைந்துள்ளதாக வாகன இறக்குமதியாளர்கள் மேலும் தெரிவிக்கின்றனர்.