பொதுப் பாதுகாப்பு அமைச்சர் ஆனந்த விஜேபால பாராளுமன்றத்தில் ஆற்றிய விசேட உரைக்கமைய, போலி நிறுவனங்களை ஸ்தாபித்து பொருட்களை இறக்குமதி செய்வதாகக் கூறி, சுமார் ஐந்து கோடி அமெரிக்க டொலர்களை சட்டவிரோதமாக வெளிநாடுகளுக்கு அனுப்பும் பாரிய நிதி மோசடி தொடர்பான தகவல்கள் தற்போது வெளியாகியுள்ளன. அண்மைக் காலத்தில் பெரும் சர்ச்சையை ஏற்படுத்திய என்.டி.பி வங்கி தொடர்பான 1300 கோடி ரூபா நிதி மோசடிப் பணமும் இந்த வலையமைப்பு மூலமாகவே நாட்டிலிருந்து வெளியேற்றப்பட்டுள்ளதாக மேலதிக தகவல்கள் வெளியாகியுள்ளன.
எந்தவொரு பொருளையும் நாட்டிற்கு இறக்குமதி செய்யாமல், வெறுமனே வர்த்தக நடவடிக்கைகளில் ஈடுபடுவதாகப் போலியாகக் காட்டிக்கொண்டு இந்த ஒழுங்கமைக்கப்பட்ட வலையமைப்பு செயற்பட்டுள்ளது.இந்த பாரிய மோசடியின் பின்னணி, பேலியகொட பிரதேசத்தில் பொலிஸார் சந்தேகத்திற்கிடமான முச்சக்கரவண்டியொன்றைச் சோதனையிட்டபோது, அதனுள் சுமார் மூன்று கோடி ரூபா பெறுமதியான அமெரிக்க டொலர்கள் கண்டுபிடிக்கப்பட்டதன் மூலம் வெளிச்சத்திற்கு வந்துள்ளது. அப்போது கைது செய்யப்பட்ட இரண்டு சந்தேகநபர்களிடமும், பின்னர் கைது செய்யப்பட்ட மேலும் ஆறு சந்தேகநபர்களிடமும் மேற்கொள்ளப்பட்ட விசாரணைகளில், இந்த பணத்திற்கான சட்டபூர்வமான மூலத்தை அவர்களால் காட்ட முடியவில்லை என்பதுடன், அவை போதைப்பொருள் கடத்தல் மூலம் சம்பாதிக்கப்பட்டவை என பொலிஸார் சந்தேகிக்கின்றனர். பொலிஸ் மா அதிபரின் தலையீட்டின் பேரில் இந்த விசாரணைகள் மத்திய குற்றப் புலனாய்வுப் பிரிவிடம் ஒப்படைக்கப்பட்ட பின்னர், இந்த நிதி 'நெஸ் ஜெம்' (Nes Gem) எனப்படும் தனியார் நிறுவனத்தால் வெளியிடப்பட்டது என்பது உறுதிப்படுத்தப்பட்டுள்ளது. 2025 ஆம் ஆண்டில் ஒரு பணிப்பாளர் மற்றும் ஒரு பங்குதாரரின் கீழ் பதிவு செய்யப்பட்ட இந்த நிறுவனம் எந்தவொரு சட்டபூர்வமான வர்த்தகத்திலும் ஈடுபடவில்லை என்பதுடன், 953 சந்தர்ப்பங்களில் மின்னணு முறைகள் மூலம் 1289 கோடி ரூபா அதாவது 42.7 மில்லியன் அமெரிக்க டொலர்கள் 26 நாடுகளில் அமைந்துள்ள 256 நிறுவனங்களுக்கு அனுப்பப்பட்டுள்ளன. தற்போது, அந்த நிறுவனத்திற்குச் சொந்தமான கொலன்னாவ மக்கள் வங்கி கிளையிலும், வெல்லம்பிட்டி சம்பத் வங்கி கிளையிலும் பராமரிக்கப்பட்டு வந்த கணக்குகளை செயலிழக்கச் செய்ய நடவடிக்கை எடுக்கப்பட்டுள்ளது.
இதற்கு இணையாக, நீர்கொழும்பு பொலிஸார் ஹெரோயின் போதைப்பொருளுடன் கைது செய்யப்பட்ட நான்கு சந்தேகநபர்கள் மூலம் மற்றொரு பாரிய மோசடியை வெளிப்படுத்தியுள்ளனர். இந்த சந்தேகநபர்கள் போதைப்பொருள் விற்பனை மூலம் சம்பாதித்த பணத்தை திவுலப்பிட்டியவில் அமைந்துள்ள வங்கிக் கணக்கொன்றில் வைப்பிலிட்டுள்ளனர். அந்தக் கணக்கு துபாயில் உள்ள ஒரு போதைப்பொருள் கடத்தல்காரருக்குச் சொந்தமானது என அடையாளம் காணப்பட்டுள்ளது. பின்னர் அந்தப் பணம் 'ஏ வை இன்வெஸ்ட்மென்ட்' (A Y Investment) எனப்படும் நிறுவனத்தின் கீழ் புறக்கோட்டை கொமர்ஷல் வங்கி கிளையில் பராமரிக்கப்பட்டு வந்த கணக்கிற்கு மாற்றப்பட்டுள்ளது. 2014 ஆம் ஆண்டில் ஆரம்பிக்கப்பட்ட இந்தக் கணக்கில் 2.2 பில்லியன் ரூபா பணம் புழக்கத்தில் இருந்துள்ளதுடன், சில நாட்களுக்கு ஒருமுறை காசோலைகள் மூலம் பெறப்பட்ட பணம் யூனியன் வங்கியின் நான்கு நடப்புக் கணக்குகளுக்கு அனுப்பப்பட்டு, பின்னர் தந்திப் பரிமாற்ற (T.T.) முறை மூலம் 1300 கோடி ரூபா வெளிநாடுகளுக்கு அனுப்பப்பட்டுள்ளது. சுங்கத்தில் பதிவு செய்யப்படாத இந்த நிறுவனங்கள் மூலம் 43 மில்லியன் அமெரிக்க டொலருக்கும் அதிகமான பணம் குறுகிய காலத்தில் நாட்டிலிருந்து வெளியேற்றப்பட்டுள்ளதுடன், தற்போது அதில் சுமார் 5.5 கோடி ரூபா (536 இலட்சம்) பணத்தை நிறுத்தி வைக்க அதிகாரிகள் நடவடிக்கை எடுத்துள்ளனர்.
சட்டபூர்வமான வர்த்தகர்கள் போல் நடித்து சுமார் 10,525 உள்ளூர் நிறுவனங்கள் இவ்வாறான சட்டவிரோத நடவடிக்கைகளில் ஈடுபட்டுள்ளமை தொடர்பான தகவல்கள் வெளியாகியுள்ளதை அடுத்து, ஜனாதிபதியின் தலைமையில் சம்பந்தப்பட்ட அதிகாரிகளை அழைத்து விசேட கலந்துரையாடல் ஒன்றும் நடத்தப்பட்டுள்ளது. இதன் விளைவாக, பொருட்களை இறக்குமதி செய்யும் அனைத்து நிறுவனங்களும், நிறுவனப் பதிவாளருடன் மேலதிகமாக இலங்கை சுங்கத்திலும் பதிவு செய்வது கட்டாயமாக்கப்பட்டுள்ளதுடன், அதற்காக வரி அடையாள எண் (TIN) பயன்படுத்துவதும் கட்டாயமாக்கப்பட்டுள்ளது. அரசியல் பாதுகாப்பின் கீழ் இவ்வளவு காலம் வளர்ந்த இந்த நிதி குற்றங்களை ஒடுக்குவதற்காக, அந்நிய செலாவணி கட்டுப்பாட்டுச் சட்டத்தின் கீழ் நிகழும் தவறுகளை விசாரிப்பதற்கு புதிய சட்டங்களை இயற்றுவதற்கும், கடுமையான சட்ட நடவடிக்கைகளை மேற்கொண்டு நாட்டில் மீண்டும் கடுமையான நிதி ஒழுக்கத்தை நிலைநாட்டுவதற்கும் அரசாங்கம் நடவடிக்கை எடுத்துள்ளது.