பிரபல கோடீஸ்வரர் பில் கேட்ஸ் தனது தனிப்பட்ட வாழ்க்கையில் ஜெஃப்ரி எப்ஸ்டீன் ஏற்படுத்திய தாக்கங்கள் குறித்து அமெரிக்க காங்கிரஸ் மேற்பார்வைக் குழுவிடம் ஒரு அறிக்கையை வெளியிட்டுள்ளார். தனது திருமண வாழ்க்கையில் ஏற்பட்ட தவறுகள் மற்றும் தனிப்பட்ட தகவல்களை எப்ஸ்டீன் அறிந்திருந்ததாகவும், அந்தத் தகவல்களைப் பயன்படுத்தி தன்னை ஒருவித தேவையற்ற உறவுக்குள் இழுக்க அவர் முயன்றதாகவும் திரு. கேட்ஸ் அங்கு குறிப்பிட்டுள்ளார்.
தனக்கும் ஜெஃப்ரி எப்ஸ்டீனுக்கும் இடையிலான உறவு மிகவும் வரையறுக்கப்பட்ட ஒன்று என்றும், 2011 இல் தொடங்கிய அந்த நட்பு 2014 ஆம் ஆண்டளவில் முழுமையாக நிறுத்த நடவடிக்கை எடுத்ததாகவும் திரு. கேட்ஸ் கூறுகிறார். உலகளாவிய பொது சுகாதார முயற்சிகளுக்கு பெரும் நிதி திரட்ட எப்ஸ்டீனின் ஆதரவு கிடைக்கும் என்று ஆரம்பத்தில் நம்பியிருந்தாலும், பின்னர் அவரது நடவடிக்கைகளை ஆழமாக ஆய்வு செய்யாதது ஒரு பெரிய தவறு என்று அவர் வலியுறுத்தினார்.
எப்ஸ்டீன் தரப்பிலிருந்து தனக்கு எதிராக மேற்கொள்ளப்பட்ட அந்த முயற்சிகள் வெற்றியடையவில்லை என்றும், அவர் தனது தனிப்பட்ட தகவல்களை ஒரு ஆயுதமாகப் பயன்படுத்த முயன்றதாகவும் பில் கேட்ஸ் கூறுகிறார். இருப்பினும், அந்த சம்பவங்கள் குடும்ப வாழ்க்கையில் கடுமையான தாக்கத்தை ஏற்படுத்தியதாகவும், எப்ஸ்டீன் போன்ற ஒருவருடன் நட்பு கொண்டதற்காக தான் வருந்துவதாகவும் அவர் குறிப்பிடுகிறார்.
எப்ஸ்டீன் தொடர்பாக வெளிவந்துள்ள சமீபத்திய தகவல்கள் மற்றும் அவர் செய்த குற்றங்களின் தன்மை ஆகியவற்றைக் கருத்தில் கொண்டு, இத்தகைய ஒருவருடன் உறவு வைத்திருப்பது மிகவும் கடுமையான தவறு என்பதையும் திரு. கேட்ஸ் ஒப்புக்கொண்டார். எப்ஸ்டீனின் செயல்களை தான் கடுமையாக வெறுப்பதாகவும், இத்தகைய துன்புறுத்தலுக்கு ஆளான பெண்கள் குறித்து தான் மிகவும் அதிர்ச்சியடைந்துள்ளதாகவும் அவர் மேலும் தெரிவித்தார்.
